На. О керде споредбе таро пуране ракописија е Библијакере сикавена кај ој ки основа на сине меними иако сине препишими ко материјалија со распадинена пе адалеске со накхле бут берша.

 Аракхле тане повише таро милја пуране библиска ракописија. Несаве лендар иси лен тикне разлике, со сикавена кај ко препишибе сине керде несаве грешке. Повише таро адала грешке тане тикне хем на менинена и смисла ко тексти. Ама, откриме тане хем несаве побаре разлике, колендар со несаве сине керде англедер бут берша. Изгледа и цел ленгири сине те менинен и порака е Библијакири. Те дикха дуј примерија:

1.   Ко 1. Јованово 5:7 ко несаве попуране преводија е Библијакере чхивде тане акала да лафија: „ко небо: о Дад, о Лафи хем о Свети дух; акала Трин тане јекх“. Ама, о веродостојна ракописија потврдинена кај акала лафија на сине дело таро оригинално тексти. Ола сине додајме покасно. a Адалеске, адала лафија нане дело таро авдисутне веродостојна преводија е Библијакере.

2.   Е Девлескоро анав појавинела пе милја пути ко пуране ракописија е Библијакере. Сепак, ко бут преводија е Библијакере адава сине заменимо титуленцар сар сој „Господ“ хем „Девла“.

 Џи акана тане откриме бут ракописија со керела бут полокхо те откринен пе о грешке. b Со откринѓа пе адалеа со сине споредиме акала примерокија баши и точност е авдисутне Библијаја?

•   Башо о тексти ко Хебрејска списија (пенџарде сар „Пурано Завет“), о изучувачи Вилијам Грин вакерѓа: „Слободно шај те вакерел пе кај ко са акала векија нијекх јавер пурано дело нане пренесимо добором точно“.

•   Башо о Христијанска грчка списија, или „о Нево Завет“, о библиско изучувачи Фредерик Брус пишинѓа: „О доказија таро Нево завет башо адава кобор тано точно тане бут побаре таро доказија башо јавера лила сој тане таро класично авторија, кова со ленгири точност никој ни на мислинела те оспоринел“.

•   О Сер Фредерик Кенјон, пенџардо изучувачи башо библиска ракописија, вакерѓа кај мануш „шај те лел и Библија ко вас хем бизи нисави дар хем бизи сумња те вакерел кај икерела о чачутно Лафи е Девлескоро, кова со сине веконцар пренесимо тари генерација ки генерација бизо несаве важна промене“.

•   Хем о еврејска хем о христијанска препишувачија верно препишинѓе о извештаија ко кола тане истакниме о грешке со керѓа лен е Девлескоро народо c (4. Мојсеева 20:12; 2. Самоилова 11:2-4; Галатите 2:11-14). Исто аѓаар, препишинѓе о стихија ко кола о еврејско народо сине осудимо баши пли непослушност, а иси стихија да кола откринена о сикљојба измислиме таро мануша (Осија 4:2; Малахија 2:8, 9; Матеј 23:8, 9; 1. Јованово 5:21). Адалеа со точно препишинѓе акала извештаија, о мануша со керѓе адава сикавѓе кај шај те овел амен доверба ки ленде хем кај ола бут ценинена сине е Девлескоро свето Лафи.

•   Ако о Девел денѓа те пишинел пе и Библија, нане ли логично исто аѓаар те грижинел пе ој те ачхол точно? d (Исаија 40:8; 1. Петрово 1:24, 25). Ле на сине ле намера и Библија те користинел е манушенге само ко пурано време, него аменге да авдиве (1. Коринќаните 10:11). Уствари, са со сине пишимо ки лате, „пишимо тано баши амари поука, хем иси амен надеж соске е Девлескоро лафи дела амен сила хем поможинела амен те издржина“ (Римјаните 15:4).

•   О Исус хем лескере следбеникија цитиринѓе таро несаве преписија таро Хебрејска списија бизо те сумнинен пе дали ола тане точна (Лука 4:16-21; Дела 17:1-3).