O Jehova a kergja o prvo brako. I Biblija vakerela amenge kaj o Devel kergja e prvo džuvlja hem angja la e Adameske. O Adam sine but bahtalo hem vakergja: „Ake kokalo taro me kokala hem mas taro mo mas“ (1. Mojseeva 2:22, 23). O Jehova mangela o manuša so i ko brako te oven bahtale. Ki akaja brošura, keda spomninela pe brako mislinela pe bašo rom hem romni so i venčime.

Keda prandinea tu, šaj mislinea kaj sa ka ovel najšukar. Ama kobor te mangen pe o rom hem i romni, palem ka ovel len nesave problemija (1. Korinkjanite 7:28). Ki akaja brošura, ka arakhe sovetija tari Biblija. Ako ikerea len ka šaj to brako hem ti familija te oven bahtale (Psalm 19:8-11).

SO VAKERELA I BIBLIJA: O rom tano poglavari ki familija (Efešanite 5:23).

O Jehova, tutar sar rom, adžikerela te grižine tu te romnjake hem te ove nežno laja (1. Petrovo 3:7). O Devel kergja la te pomožinel tu hem ov mangela te sikave lake kaj mangea la hem poštujnea la (1. Mojseeva 2:18). Mora doborom but te mange te romnja so ka ove spremno lakere potrebe te čhive angleder tle (Efešanite 5:25-29).

O Jehova, tutar sar romni, adžikerela taro vilo te poštujne te rome hem te pomožine le te kerel adava so rodela lestar o Devel (1. Korinkjanite 11:3; Efešanite 5:33). Tergjov pali leste ko leskere odluke hem taro vilo pomožin le (Kološanite 3:18). Ako kerea adava, ka ove but vredno anglo te romeskere jakjha hem anglo Jehova (1. Petrovo 3:1-6).

SO ŠAJ TE KERE:

• Puč te bračno partnere sar šaj te ove pošukar rom ili romni. Šun so ka vakerel hem trudin tu te kere o bukja pošukar.

• Ov strplivo. Ka valjani tumenge vreme te sikljoven sar te keren jekh jekhe bahtale.

SO VAKERELA I BIBLIJA: Mislin ko adava sar osetinela pe ti romni ili to rom (Filipjanite 2:3, 4). Ponašin tu laja ili lea sar nešto so i but vredno, hem ma bistre kaj o Jehova rodela pe slugendar te oven ljubezna sarinencar (2. Timotej 2:24). „Adava so kerela lafi bizo te mislinel, te phene posavela mačea, a e gogjaverengiri čhib tani iljači“ (Izreki 12:18). Adaleske pazin sar kerea lafi. O Jehova ka pomožinel tu te lafija te oven ljubezna hem te vakere len mangipaja (Galatite 5:22, 23; Kološanite 4:6).

SO ŠAJ TE KERE:

• Angleder te keren lafi baši nesavi važno buti, molin tu te ačhove smirimo hem te ove spremno te šune so mislinela o javer.

• Šukar razmislin so ka vakere hem sar ka vakere adava.

SO VAKERELA I BIBLIJA: Keda lena pe, o rom hem i romni ovena jekh (Matej 19:5). Ama ko brako, ponadari da sien duj džene kola so šaj ka razmisinen javer čhane bašo nesave bukja. Adaleske, valjani te sikljon te oven jekh ko misle hem ko adava so osetinena (Filipjanite 2:2). Adava tano but važno keda valjani te anen odluke. I Biblija vakerela: „Keda rodea sovet, o planija ka uspejnen“ (Izreki 20:18). Mukh o sovetija tari Biblija te vodinen tumen keda zaedno anena važna odluke (Izreki 8:32, 33).

SO ŠAJ TE KERE:

• Vaker te romnjake ili romeske sar osetinea tu, a na samo sar dikhea ko bukja.

• Angleder te ane nesavi odluka, ker lafi te romnjaja ili te romea.