Premalo rezultatija andi jekh anketa koja hine ćerdi ki Amerika, 80 procentija ando terne molinena pe, ama samo ekvaš olendar molinena pe svako dive. Disave olendar pućena pe: „Da li i molitva šaj te pomožini tut samo te osetine tut pošukar ja tani diso pobuter?“

•  Soj tani i molitva?

•  Da li o Devel šunela amare molitve?

•  Aso so šaj te molinav man?

•  So phenena te vrsnikija?

 Ked molinaja amen, amen vaćeraja okoleja kova sa ćerđa. Razmislin hari so značini odova. Iako o Jehova tano najbaro, ov „nane dur nikastar amendar“ (Dela apostolska 17:27). Odolese, ki Biblija pisini: „Oven paše e Devleja, hem ov ka ovel paše tumencar“ (Jakovljeva 4:8).

 Sar šaj te ove paše e Devleja?

•   Molin tut – ađahar tu vaćereja e Devleja.

•   Proučin e Devleso Lafi – ađahar o Devel „vaćeri“ tuvaja.

 Ked molineja tut hem ked proučineja e Devleso Lafi, odova ka pomožini tut te ovel tut zoralo amalipe e Devleja.

 „Odova so šaj te vaćera e Jehovaja, kova tano Najbaro ko celo svemir, tani najbari čast koja šaj o manuša te ovel len“ (Džeremi).

 „Ked ćućarava mo vilo e Jehovase, tegani ovava pana popaše oleja“ (Miranda).

 Šaj verujineja ko Devel hem čak molineja tut olese, ama šaj tano tuće pharo te verujine so ov ćaće šunela tut. Ama, i Biblija phenela so o Jehova tano „okova kova šunela o molitve“ (Psalam 65:2). Ov čak podstaknini tut sa te brige te forde koro leste sose ov brinini pe tuće (1. Petrova 5:7).

 Razmislin: Da li arakheja vreme te vaćere te amaleja? Isto ađahar, valjani te arakhe vreme te vaćere e Devleja. Redovno vaćer oleja ki molitva hem koristin oleso anav, Jehova (Psalam 86:5-7; 88:9). I Biblija podstaknini tut uvek te moline tut (1. Solunjanima 5:17).

 „I molitva tani razgovor maškaro mande hem mo nebesko Dad, tegani phravava lese mo vilo“ (Mojsis).

 „E Jehovaja vaćerava ando sa, čak ando najtikne buća, isto sar ked vaćerava me dajaja ja dijekha paše amalinjaja“ (Karen).

 Ki Biblija pisini: „Sa tumare brige vaćeren e Devlese ki molitva, celone vileja molinen tumen olese hem zahvalinen tumen olese“ (Filipljanima 4:6).

 Da li odova značini so šaj te moline tut aso te problemija? Ja! Ki Biblija pisini: „Forde to pharipe upro Jehova, hem ov ka podržini tut“ (Psalam 55:22).

 Naravno, ked molineja tut e Devlese, na valjani te vaćere oleja samo ando te problemija. „Ako rodava e Jehova samo ked valjani maje diso, savo tano odova amalipe?“, phenela i Šantal. „Mislinava so najangleder valjani te zahvalinav man olese, hem na samo asi jekh buti već aso but buća.“

 Razmislin: Aso so hijan zahvalno e Jehovase? Šaj li svako dive te arakhe trin buća aso kola šaj te zahvaline tut e Jehovase?

 „Čak diso jednostavno, sar soj tani jekh šuži luludi, šaj te podstaknini amen te zahvalina amen e Jehovase“ (Anita).

 „Razmislin ando stvorime buća kola posebno sviđinena pe tuće ja ando disavo stih kotar Biblija kova but mangeja hem palo odova zahvalin tut e Jehovase aso odova“ (Brajan).