Šaj li te zamisline o životi ki Phuv bizo kham? O kham dela energija e kaštenđe te šaj te barjon o lišća, o luluđa, o voće, o semija, o akhora hem slična plodija. Isto ađahar, prekalo kham o kašta lena pani andi phuv prekalo korenija hem ov đala upre đi o lišća, a palo odova isparini ko vazduh.

O Devel dela boršim kova ćerela i Phuv te ovel plodno. Odolese isi amen pherdo hrana hem hijam but bahtale.

But dada brininena pe da li olenge porodice ka ovel len dovoljno hrana hem šeja. Dikh so phenela e Devleso Lafi: „Dikhen e ćiriklen – on na sejinena, ni na ćedena, ni na anena ko žitnice, ama palem tumaro nebesko Dad parvari len. Tumen na hijen li povredna olendar?“ (Matej 6:25, 26).

„Dikhen o ljiljanija kola barjona ko polje [...] phenava tumenđe so ni o [kralj] Solomon ki celo pikli slava na hine uravdo sar jekh olendar. Ako o Devel ađahar uravi o poljsko bilje [...] zar na ka uravi poviše tumen?“ (Matej 6:28-30).

Odova so o Devel dela amen hrana hem šeja, uverini amen so šaj te del amen hem avera buća kola valjanena amenđe. Ako mangaja te ćera e Devlesi volja ov šaj te blagoslovini amaro trud te sejina te bi ovela amen hajbase. Ili šaj te pomožini amen te arakha buti te šaj te ćina odova so valjani amenđe (Matej 6:32, 33).

Ked razmislinaja ando sa o buća kola stvorinđa o Devel, sar soj tane o kham, o boršim, o ćiriklja hem o luluđa, tegani ćaće barjola amaro mangipe premalo oleste. Ko aver članko ka dikha sar amaro Stvoritelj vaćerđa e manušencar.