O Devel obećinđa e prorokose, e Avrahamese, so jekh ando olese potomkija ka anel o blagoslovija aso „sa o narodija ki phuv“ (Postanak 22:18). Ko ka ovel odova potomko?

Skoro 2 000 berš angleder, o Devel dinđa e Isusese, kova hine e Avrahameso potomko, moć te ćerel bare čudija. Disave ando odola čudija mothovđe so o obećanje kova hine dindo e Avrahamese, ka avel ko sa o narodija prekalo Isus (Galatima 3:14).

O čudija kola o Isus ćerđa pomožinđe e manušenđe te haljon soj tano ov odova kas o Devel birinđa te blagoslovini e manušen. Isto ađahar, odola čudija mothovđe sar o Devel ka koristini ole te šaj te anel večna blagoslovija e manušenđe. Hajde te dikha sar e Isusese čudija mothovena disave olese šukar osobine.

Samilost – O Isus saćarđa e nabormen.

Jekh puti, jekh gubavco molinđa e Isuse te saćari le. O Isus takinđa le hem phenđa lese: „Mangava.“ Odmah palo odova i guba cidinđa pe olestar (Marko 1:40-42).

Velikodušnost – O Isus parvarđa e bokhalen.

O Isus na manglja o manuša te đan pese bokhale. Ko barem duj situacije, o Isus ćerđa jekh čudo. Ov ćerđa ando samo nekobor maćhe hem mare te han nekobor hiljada manuša (Matej 14:17-21; 15:32-38). Palo odova so halje, sare hine zadovoljna hem aćhilji but hrana.

Saosećanje – O Isus uskrsninđa e mulen.

O Isus uskrsninđa jekhe udovicake ćhave sose „sažalinđa pe upro late“. Oj hine la samo jekh ćhavo kova šaj hine te brinini pe olatar (Luka 7:12-15).