40. ČLANKO PROUČIBASE
ĐILI 30 Mo Dad, amal hem Devel
O Jehova „saćari okolen soj tane phage vileja“
Ov saćari okolen soj tane phage vileja hem paćari olenge rane (PS. 147:3)
SO KA SIKLJOVA?
O Jehova brinini pe ando okola soj tane phage vileja. Ko akava članko ka dikha sar ov pomožini amen ked hijam ko pharipa hem ka dikha sar šaj amen te utešina averen.
1. So o Jehova osetini premalo pe sluge?
O JEHOVA dikhela so desini pe olese slugenđe. Ov đanela ked hijam bahtale, a ked hijam tužna (Ps. 37:18). Ked dikhela so daja sa amendar te služina lese, čak iako isi amen disavi bari dukh ko vilo, ov tano but ponosno upro amende. Ama, na samo odova, ov mangela te pomožini amen hem te utešini amen.
2. So o Jehova ćerela aso okola kola tane phage vileja hem sar šaj te pomožini amen olesi briga?
2 Ko Psalam 147:3 pisini so o Jehova „paćari o rane“ ando okola soj tane phage vileja. Ko akava stih, o Jehova tano mothovdo sar nežno brinini pe ando okola so isi len disavi dukh ko vilo. Ama, so valjani te ćera te šaj te osetina so o Jehova brinini pe amendar? Aće jekh primer. Jekh šukar doktori šaj but te ćerel te šaj te pomožini e osobaće koja tani povredimi. Ama, ov šaj te pomožini laće jedino ako oj šunela odova so phenđa laće te ćerel. Ko akava članko ka dikha so o Jehova phenela ko po Lafi okolenđe kola isi len disavi bari dukh ko vilo. Isto ađahar, ka dikha sar šaj te primenina olese savetija.
O JEHOVA UVERINI AMEN SO HIJAM LESE BUT VREDNA
3. Sose disave mislinena so na vredinena?
3 Ko akava sveto nane mangipe, sebepi odova but đene mislinena so na vredinena. Amari phen, i Helen a, phenela: „Me roditeljija niked na mothovđe maje mangipe. Mo dad hine nasilno hem svako dive vaćerđa amenđe so na hijam nisose.“ Šaj sar e Helena hem tut neko maltretirinđa, često kritikujinđa ili ćerđa te osetine tut so na vredineja. Odolese, šaj te ovel tuće pharo te verujine so neko ćaće mangela tut.
4. Premalo Psalam 34:18, ko so o Jehova uverini amen?
4 Čak iako avera maltretirinđe tut, ov sigurno so o Jehova mangela tut hem but cenini tut. Ov „tano paše okolencar kola tane phage vileja.“ (Čitin Psalam 34:18.) Ako hijan obeshrabrimo, ma bistri so o Jehova dikhlja odova soj tano šukar ko to vilo hem so privucinđa tut koro peste (Jov. 6:44). Ov tano uvek odothe te pomožini tut, odolese so mangela tut.
5. So šaj te sikljova ando odova sar o Isus ponašinđa pe premalo okola kola mislinđe so nane vredna?
5 Amen šaj but te sikljova savo tano o Jehova ađahar so ka razmotrina e Isuseso primer. Đi hine ki phuv, o Isus brininđa pe ando okola kola mislinđe so na vredinena hem mothovđa lenđe saosećanje (Mat. 9:9-12). Ked i romni koja nadinđa pe so ka saćol ando po nabormipe pipinđa olese šeja, o Isus utešinđa la hem pohvalinđa la asi olaki vera (Mar. 5:25-34). Đanaja so o Isus savršeno oponašinđa pe Dade (Jov. 14:9). Odolese, šaj te ove sigurno so o Jehova hem tut cenini hem dikhela te šukar osobine, sar soj tane ti vera hem to mangipe premalo leste.
6. So šaj te ćere ako mislineja so na vredineja?
6 So šaj te ćere ako osetineja tut so na vredineja? Čitin o stihija ki Biblija kola vaćerena kobor hijan vredno e Jehovase hem razmislin olendar (Ps. 94:19). b Ma uporedin tut averencar hem ma razmislin ando odova so našti te ćere. O Jehova na ađićeri amendar te ćera pobuter ando odova so amen šaj (Ps. 103:13, 14). Ako neko postupinđa okrutno premalo tute, na hijan tu krivo sebepi odova. O Jehova ka sudini okolenđe kola maltretirinena averen hem ka pomožini okolenđe kola tane maltretirime (1. Petr. 3:12). Ked i Sandra hine tikni, neko postupinđa but okrutno premalo late. Oj phenela: „Me redovno molinava man e Jehovase te pomožini man te dikhav o osobine koro mande kola ov dikhela.“
7. Sar šaj odova so doživinđam angleder te koristina ki služba e Jehovase?
7 Niked ma sumnjin so o Jehova šaj te koristini tut te pomožini averenđe. Ov dinđa tut čast te sarađujine oleja ki služba (1. Kor 3:9). To iskustvo šaj te pomožini tuće pošukar te haljove sar osetinena pe avera. Odolese, šaj pobuter te pomožine lenđe. E Helenaće, kola pominđam angleder, o Jehova hem o phralja but pomožinđe hem akana oj šaj averenđe te pomožini. Oj phenela: „Mislinđum so na vredinava. Ama, o Jehova ćerđa te osetinav man mangli hem koristini man te pomožinav averenđe.“ Akana, i Helen tani bahtali hem služini sar stalno pioniri.
O JEHOVA MANGELA TE PRIHVATINA OLESO OPROŠTAJ
8. Ko so uverini amen o Jehova ko Isaija 1:18?
8 Disaven ando Jehovase sluge pana mučini i savest sebepi o grehija kola ćerđe, bizo obzir da li ćerđe len angleder ja palo krštenje. Ama, na valjani te bistra so o Jehova but mangela amen hem so dinđa pe Ćhave sar žrtva amenđe. Ov mangela amen te prihvatina odova poklon. O Jehova uverini amen so palo odova so pomirinđam amen oleja, ov više na setini pe ko amare grehija. c (Čitin Isaija 1:18.) Amen hijam but zahvalna so o Jehova oprostini amare grehija. Ama, ko isto vreme ov niked na bistrela o šukar buća kola ćerđam (Ps. 103:9, 12; Jevr. 6:10).
9. Sose na valjani te razmislina ando greške kola ćerđam?
9 Ako tano tuće pharo sebepi o greške kola ćerđan, trudin tut te razmisline ando odova so akana šaj te ćere hem so ka ćere ki budućnost. Razmislin ando apostol Pavle. Ov hine svesno so but progoninđa e hrišćanen, ama đanđa so o Jehova oprostinđa lese (1.Tim. 1:12-15). Da li ov hem ponodri razmislinđa ando greške kola ćerđa ki prošlost? Na. Niti na razmislinđa ando odova so mukhlja (Fil. 3:4-8, 13-15). Umesto odova, ov hine revno ki služba hem dikhlja anglal, ki budućnost. Sar o Pavle, tu našti te promine ti prošlost. Ama, odova so šaj te ćere tano te slavine e Jehova ko te trenutna okolnostija hem te razmisline andi budućnost koja obećinđa tuće.
10. So šaj te ćere ako angleder povredinđan nekas?
10 Šaj hijan uznemirimo odolese so angleder ćerđan disave buća kola povredinđe nekas. So šaj te ćere? De sa tutar te popravine i šteta koja ćerđan. Isto ađahar, vaćer lenđe kobor tano tuće žao (2. Kor. 7:11). Molin tut e Jehovase te pomožini okolenđe kolen povredinđan. Ov šaj te pomožini hem tuće hem olenđe hem ponodri te služinen lese hem te ovel tumen mir.
11. So šaj te sikljova ando prorok Jona? (Dikh i slika.)
11 Sikljov ando grehija kola angleder ćerđan hem mukh e Jehova te koristini tut sar so ov mangela. Razmislin ando prorok Jona. Umesto te putujini ki Niniva, sar so o Jehova phenđa lese, ov našlja ki suprotno strana. Odolese, o Jehova ukorinđa le hem ov sikljilo diso andi pi greška (Jona 1:1-4, 15-17; 2:7-10). O Jehova na vazdinđa pe vasta olestar, nego palem dinđa le prilika te đal ki Niniva. Ama akava puti, o Jona šunđa le. Ov na mukhlja i greška koja angleder ćerđa te sprečini le te prihvatini o zadatko (Jona 3:1-3).
Palo odova so o Jona preživinđa andre ko maćho, o Jehova phenđa lese te đal palem ki Niniva te objavini olesi poruka (Dikh o 11. odlomko)
O JEHOVA UTEŠINI AMEN PREKALO PO SVETI DUH
12. Sar o Jehova dela amen mir ked isi amen disavo baro pharipe? (Filipljanima 4:6, 7).
12 Prekalo po sveti duh, o Jehova šaj te utešini amen ked doživinaja disavi tragedija. Te dikha so nakhlje o Ron hem i Kerol. Olengo ćhavo mudarđa pe ked hine le 39 berš. On phenena: „Angleder hine amenđe pharo, ama niked sar akana. But putija raćate našti hine te sova. Odolese, molinđam amen e Jehovase hem ov dinđa amen mir kolestar vaćeri pe ko Filipljanima 4:6, 7.“ (Čitin.) Ako hem tu isi tut disavi bari dukh ko vilo odolese so desinđa pe tuće diso but lošno, vaćer e Jehovase sar osetineja tut. Oleja šaj te vaćere ked god mangeja hem kobor god mangeja (Ps. 86:3; 88:1). Ov ka del tut po sveti duh hem uvek ka pomožini tuće (Luka 11:9-13).
13. Sar šaj o sveti duh te pomožini amen hem ponodri verno te služina e Jehovase? (Efešanima 3:16)
13 Da li doživinđan disavo pharipe kova lelja sa ti snaga? O sveti duh šaj te pomožini tut hem ponodri revno te služine e Jehovase. (Čitin Efešanima 3:16.) Razmotrin o primer andi phen koja vićini pe Flora. Oj hem olako rom služinđe sar misionarija. Ama, olako rom prevarinđa la hem on razvodinđe pe. Oj phenela: „Odolese so prevarinđa man hine maje odobor pharo so našti hine te mislinav nisostar. Molinđum e Jehova te del man po sveti duh te izdržinav. O Jehova utešinđa man hem iako ki početka izgledinđa maje nemoguće, uljum pozorali hem uzi olesi pomoć šaj hine te istrajinav.“ Oj osetinđa so o Jehova pomožinđa laće te ovel la pana pobaro poverenje upro leste hem sigurno tani so ov ka pomožini laće ko sa olake pharipa. I Flora pana phenela: „O lafija ando Psalam 119:32 primeninena pe upro mande. Othe pisini: ’Celone vileja ka ićerav man ko te zapovestija, sose tu ćereja than ko mo vilo te šaj on te resen ano leste.‘ “
14. So valjani te ćere te šaj e Jehovaso duh te pomožini tut?
14 Palo odova so molinđan e Jehova aso sveti duh, so valjani te ćere? Ćer o buća kola ka pomožinen tut te dobine pana poviše e Devleso duh. Odova značini so valjani te đa ko sastankija hem ki služba. Čitin i Biblija svako dive. Odova ka pomožini tuće te haljove sar o Jehova razmislini (Fil. 4:8, 9). Isto ađahar, razmislin ando biblijake ličnostija kola nakhlje bare pharipa hem ando odova sar o Jehova pomožinđa len te istrajinen. I Sandra, kola angleder pominđam, hine la bare pharipa. Oj phenela: „O izveštaj ando Josif ćaće ohrabrini man. Ov na mukhlja i nepravda hem o problemija te obeshrabrinen le hem te ruminen oleso amalipe e Jehovaja“ (Post. 39:21-23).
O JEHOVA UTEŠINI AMEN PREKALO PHRALJA HEM PHENJA
15. Ko šaj te utešini amen hem sar šaj on te pomožinen amen? (Dikh i slika.)
15 Ked isi amen disave pharipa, amare phralja hem phenja šaj but te utešinen amen (Kol. 4:11). O Jehova prekalo lende mothovi amenđe po mangipe. On šaj te utešinen amen ađahar so ka oven amencar hem pažljivo ka šunen amen. Šaj te čitinen amenđe disavo stiho andi Biblija ja te molinen pe amencar (Rimlj. 15:4). d Podijekh puti, disavo phral ili phen šaj te podsetini amen ko odova sar o Jehova dikhela ko amare pharipa hem odova šaj te pomožini amen te istrajina. Isto ađahar, šaj te pomožinen amen hem ko disavo praktično način. Na primer, ađahar so ka ćeren amenđe diso hajbase.
O zrela amala upro kola isi amen poverenje šaj te utešinen amen hem te pomožinen amen (Dikh o 15. odlomko)
16. So valjani te ćera te šaj avera te pomožinen amen?
16 Disavo puti, šaj ka valjani te puće averen te pomožinen tut. Amare phralja hem phenja mangena amen hem mangena te pomožinen amen (Posl. 17:17). Ama, on na đanena sar osetinaja amen hem so valjani amenđe (Posl. 14:10). Odolese ako isi tut disavi dukh ko vilo, phen odova dijekhe šukar amalese hem vaćer lese sar šaj te pomožini tut. Šaj te vaćere hem jekhe ja duje starešinencar kolencar hijan paše. Isto ađahar, disave phenja haljilje so but šaj te pomožinen lenđe avera zrela phenja.
17. Sebepi kola buća šaj te cida amen ando phralja hem phenja hem so valjani te ćera?
17 Ma cide tut ando avera. Nekad šaj te ovel tuće odobor pharo so na mangeja te ove e manušencar. Podijekh puti, o phralja hem o phenja šaj pogrešno ka haljon tut ja ka vaćeren diso so ka povredini tut (Jak. 3:2). Ama, ma cide tut ando phralja hem phenja sose o Jehova šaj te ohrabrini tut prekalo lende. Jekh starešina kova vićini pe Gavin isi le depresija. Ov phenela: „But putija nane man volja te vaćerav me amalencar ili te provodinav vreme olencar.“ Ama, o Gavin trudini pe te ovel e phralencar hem često osetini pe but pošukar ked ćerela odova. Jekh phen koja vićini pe Ejmi phenela: „Sebepi odova so doživinđum angleder, pharo maje te ovel man poverenje upro manuša. Ama, trudinava man te mangav me phralen hem phenjen hem te verujinav lenđe, sar o Jehova. Đanava so odova ćerela e Jehova bahtalo, ama hem me hijum bahtali.“
E JEHOVASE OBEĆANJA ASI BUDUĆNOST ŠAJ TE UTEŠINEN AMEN
18. So jedva ađićeraja ki budućnost hem so valjani akana te ćera?
18 Pana hari, o Jehova ka cidel sa odova so anela amenđe stres hem više nisavi dukh na ka osetina (Otkr. 21:3, 4). Odova so akana povredini amen, tegani na „ka pojavini pe ko vilo“ (Is. 65:17). Sar so dikhljam, o Jehova već akana „paćari amare rane“. Ov dela amen but buća kola šaj te utešinen amen hem te pomožinen amen. Odolese, „sa tumare brige forden koro leste“ (1. Petr. 5:7).
ĐILI 7 O Jehova tano amari snaga
a Disave anava tane menime.
b Dikh o okvir „ O Jehova cenini tut“.
c Te šaj „te pomirina amen“ e Jehovaja valjani te dokažina so kajinaja amen ađahar so ka roda lestar te oprostini amare grehija hem ka promenina amen. Isto ađahar, ako ćerđam disavo ozbiljno greh valjani te roda pomoć ando starešine ki skupština (Jak. 5:14, 15).
d Na primer, dikh o stihija kola tane ko teme „Zabrinutost“ hem „Uteha“ ki knjiga Načela za hrišćanski život.
