1. Save ciljija šaj te ćhiva amenđe?

 AMEN but mangaja e Jehova hem odolese mangaja te da olese amaro najšukar. Te šaj te ćera odova, valjani te ćhiva amenđe disave ciljija, sar soj tane: te ćera ko amare osobine, te ćera ko amare veštine hem te dikha sar šaj te pomožina averenđe.

2. Sose valjani te ćhiva amenđe ciljija hem te da sa amendar te ispunina len?

² Sose valjani hem ponodri te napredujina? Sar prvo, ađahar radujinaja amare nebesko Dade. O Jehova tano bahtalo ked dikhela so amare sposobnostija koristinaja te služina olese. Sar dujto, mangaja pana pobuter te pomožina amare phralenđe hem phenjenđe (1. Sol. 4:9, 10). Kobor god berš te ova ko ćaćipe, sare amen valjani hem ponodri te napredujina. Akana ka dikha sar šaj te ćera odova.

3. Premali 1. Timoteju 4:12-16, ko so o apostol Pavle podstakninđa e Timoteje?

³ O Timotej hine terno manuš ked o apostol Pavle pisinđa lese poklo prvo lil hem već tegani služinđa sar starešina. Ipak o Pavle podstakninđa e Timoteje pana pobuter te napredujini. (Čitin 1. Timoteju 4:12-16.) Đi razmislinaja ando Pavlese lafija, šaj te dikha so ov dinđa le savet, sar prvo te ćerel ko pe osobine, sar soj tane:  mangipe, vera hem čestitost. Sar dujto, ov dinđa le savet te ovel pana pošukar ko odova te čitini anglo avera, te ohrabrini averen hem te sikavi len. Ko akava članko, ka dikha e Timotejeso primer hem ka dikha sar odova so ćhivaja amenđe ciljija šaj te pomožini amen pana pobuter te napredujina. Isto ađahar, ka dikha so šaj pana te ćera ki amari služba.

4. Premalo Filipljanima 2:19-22, sose o Timotej hine šukar e Jehovaso sluga?

⁴ Sose o Timotej hine šukar e Jehovaso sluga? Sebepi so hine le but šuže osobine. (Čitin Filipljanima 2:19-22.) Ando Pavlese lafija, šaj te dikha so o Timotej hine ponizno, verno, bućarno hem pouzdano manuš. Ov manglja e phralen hem brininđa pe olendar. Sebepi odova, o Pavle but manglja le hem šaj hine te del le čak hem disave phare zadatkija (1. Kor. 4:17). Isto ađahar, ked o Jehova dikhela so ćeraja ko amare osobine, ov pana pobuter mangela amen hem pana pobuter šaj te pomožina averenđe ki skupština (Ps. 25:9; 138:6).

5. (a) Sar šaj te đana ki koja osobina valjani te ćera? (b) Sar so dikhaja ki slika, sar jekh terni phen ćerela ko po cilj?

⁵ Birin jekh osobina ki koja mangeja te ćere. Molin tut hem razmislin ko so valjani te ove pana pošukar. Palo odova, birin jekh osobina ki koja mangeja te ćere. Na primer, da li šaj te ove pana pobuter saosećajno, da li šaj te ovel tut pana pobari želja te pomožine averenđe ja da li šaj pana pobuter te ćere ko odova te ove ko mir averencar hem te oprostine? Isto ađahar, šaj te puće jekhe zrelo amale ko so valjani te ćere (Posl. 27:6).

6. Sar šaj te ćere ki disavi osobina?

⁶ De sa tutar te ispunine to cilj. Sar šaj te ćere odova? Šaj te proučine kotar odija osobina. Zamislin so valjani te ćere ko odova te oprostine averenđe. Šaj te čitine hem te razmisline kotar o manuša ando Devleso Lafi kola hine spremna te oprostinen hem okolendar kola na manglje te oprostinen. Razmislin ando Isus. Ov uvek hine spremno te oprostini averenđe (Luka 7:47, 48). O Isus na dikhlja samo averenge mane, već đanđa so on  šaj te ćeren. Ki aver strana, o fariseija ko Isuseso vreme mislinđe soj tane pošukar averendar (Luka 18:9). Ked razmislineja ando akala primerija, puć tut: „So me dikhava ko avera? Da li dikhava samo odova soj tano lošno koro lende ja odova soj tano šukar?“ Ako tano tuće pharo te oprostine nekase, pisin ko jekh lil kola šukar osobine odija osoba isi la. Palo odova, puć tut: „Sar o Isus dikhela ki odija osoba? Da li bi o Isus oprostini laće?“ Ako ađahar ćereja, odova šaj te pomožini tuće te menjine to način sar razmislineja. Ko početko šaj te ovel tuće pharo te oprostine okolese ko povredinđa tut. Ama, ako deja sa tutar te ćere ki odija osobina, sar đala o vreme ka ovel tuće polokho te oprostine.

7. Premalo Poslovice 22:29, sar o Jehova avdije koristini e phralen hem e phenjen kola šukar đanena te ćeren pi buti?

⁷ Aver cilj kova šaj te ovel tut tano te sikljove disave neve veštine. Razmislin samo kobor manuša valjani te šaj te ćeren pe Betelija, kongresna dvorane ja amare dvorane. But phralja hem phenja sikljilje te ćeren disave buća kotar iskusna phralja hem phenja. Sar so dikhaja ki slika, hem o phralja hem o phenja šaj te sikljon te ćeren disave buća ki dvorana ja ki kongresno dvorana. Ađahar, o Jehova „o Kralj andi večnost“ hem o Isus Hrist „o Kralj upro kraljija“ prekalo akala sposobna phralja hem phenja ćerena but šuže buća. (1. Tim. 1:17; 6:15; čitin Poslovice 22:29.) Amen mangaja te ova bućarne hem te koristina amare sposobnostija te slavina e Jehova, a na te vazda kokri amen (Jov. 8:54).

8. Sar šaj te đane ko so šaj te ćere?

⁸ Birin jekh veština ki koja mangeja te ćere. Koja veština bi mangeja te ovel tut? Puć e starešinen andi ti skupština ja e pokrajinsko nadgledniko ko so šaj te ćere. Na primer, ako on phenena so šaj te ćere ko odova te ove pošukar govornik ja pošukar te sikave averen, puć len ki koja govorničko veština šaj te ćere. Palo odova, de sa tutar te ove pošukar ko odova. Sar šaj te ćere odova?

9. Sar šaj te ove pana pošukar učitelj?

⁹ De sa tutar te ispunine to cilj. Zamislin so mangeja te ove pana pošukar učitelj. Šaj te proučine i brošura Sikljov pošukar te čitine hem te sikave. Ked dobineja zadatko ko sastanko ko radno dive šaj te puće jekhe iskusno phrale te šunel to govor hem te phenel tuće ko so valjani te ćere. Pripremin te zadatkija ko vreme hem ađahar o manuša ka dikhen so hijan bućarno hem so šaj te osloninen pe upro tute (Posl. 21:5; 2. Kor. 8:22).

10. Sar šaj te ćera ko amare veštine? Vaćer jekh primer.

¹⁰ So ako to cilj tano te ove pana pošukar ko diso soj tano tuće pharo? Ma vazde te vasta! Amaro phral kova vićini pe Gari naštine te čitini šukar. Ov setini pe kobor lađandilo ked valjanđa anglo avera te čitini ko amare sastankija. Ama, ov dinđa sa pestar te čitini pana pošukar. Ov phenela so disave iskusna phralja hem amare publikacije but pomožinđe lese hem akana ićeri govorija ko amare sastankija, ko pokrajinska sastankija hem ko kongresija.

11. So ka pomožini amen te ćera pana pobuter ki Jehovasi organizacija?

¹¹ Da li o Timotej ulo pana pošukar govornik ja pana pošukar učitelj? Ko Devleso  Lafi na pisini odolestar. Ama, sebepi so šunđa e Pavlese savetija, o Timotej pana pošukar ćerđa pe odgovornostija (2. Tim. 3:10). Isto ađahar, ako ćeraja ko amare veštine, odova ka pomožini amen te ćera pana pobuter ki Jehovasi organizacija.

12. Sar avera pomožinđe tuće?

¹² Sare amen đanaja sar tano ked neko pomožini amenđe. Ked hijam ki bolnica, but hijam zahvalna ked posetinena amen o starešine kola tane ko Odbor aso odnosija e bolnicencar ja kola tane ki grupa koja posetini e phralen hem e phenjen kola tane ki bolnica. Ked tano amenđe pharo, but hijam zahvalna ked jekh starešina šunela amen hem dela amen uteha. Ked valjani amenđe pomoć ko biblijako kurs, but hijam bahtale ked jekh iskusno pioniri ovela amencar ko odova kurs hem phenela amenđe so šaj pana pošukar te ćera. Sa akala phralja hem phenja tane bahtale so šaj te pomožinen amen. Sare amen šaj te ova bahtale ako pomožinaja averenđe. O Isus phenđa: „Pobuter isi bahtalipe ked dela pe nego ked lela pe“ (Dela 20:35). So šaj te pomožini amenđe te ćera pobuter e Jehovase?

13. Save valjani te oven amare ciljija?

¹³ Ma ćhiv tuće cilj kova nane konkretno. Šaj pheneja kokri tuće: „Mangava te ćerav diso pobuter ki skupština.“ Ama but tano pharo te ispunine asavko cilj hem našti te đane da li ispuninđan le. Odolese, ćhiv tuće jasno, konkretno cilj. Čak šaj te pisine odova cilj hem te ćere tuće jekh plan sar ka ispunine le.

14. Sose tano važno te ova razumna ked ćhivaja amenđe ciljija?

¹⁴ Ked ćhivaja amenđe ciljija važno tano te ova razumna. Sose? Odolese so na đanaja so ka ovel tajsa. Aće jekh primer. O apostol Pavle pomožinđa te osnujini pe i skupština ko Solun. Sigurno manglja te aćhol odothe hem te pomožini odole phralenđe hem phenjenđe. Ama, sebepi o protivnikija morandilo te mukhel odija diz (Dela 17:1-5, 10). Te aćhol hine odothe, ov bi ćhivela e phralen ki opasnost. Ama, odova na  ćhinavđa le te pomožini len. Ov hine razumno manuš hem dikhlja so šaj te ćerel. O Pavle bićhalđa e Timoteje te zorjaćeri odole phralen (1. Sol. 3:1-3). Kobor hine bahtale o phralja hem o phenja ko Solun sose o Timotej hine spremno te služini kuri god valjani.

15. Sar šaj amare okolnostija te utičinen ko amare ciljija? Vaćer jekh primer.

¹⁵ But šaj te sikljova odolestar so o Pavle nakhlja ko Solun. Šaj ćhivđam amenđe disavo cilj, ama šaj amare okolnostija menjinđe pe hem akana našti te ispunina le (Prop. 9:11). Ako odova hem tuće desinđa pe, ov spremno te ćhive tuće disavo aver cilj kova šaj te ispunine. Diso slično doživinđe o Ted hem i Hajdi. Sebepi so jekh olendar naborsalo, on morandilje te ikljon kotar Betel. Ama, olengo mangipe premalo Jehova podstakninđa len te dikhen so šaj pana te ćeren e Jehovase. Najangleder, on ulje stalna pionirija. Sar đelo o vreme, ulje specijalna pionirija hem o Ted dobinđa obuka te služini sar zamenik ando pokrajinsko nadglednik. Palo disavo vreme, alji jekh promena hem on haljilje so sebepi pe berša našti više te služinen ki pokrajinsko služba. Iako hine razočarime, on haljilje so šaj te služinen e Jehovase hem ko avera načinija. O Ted phenela: „Sikljiljam so šaj te služina e Jehovase ko but načinija.“

16. So sikljovaja ando Galatima 6:4?

¹⁶ Amen našti te đana so ka ovel tajsa, niti šaj te utičina ko odova. Odolese, na valjani te mislina so hijam vredna e Jehovase samo sebepi amare odgovornostija niti valjani te uporedina amen okolencar kola isi len odgovornostija kola amen nane amen. I Hajdi phenela: „To mir našalđola ked odova so desini pe ko to životi uporedineja odoleja so desini ko averengo životi“ (Čitin Galatima 6:4.) Važno tano te dikha sar šaj te pomožina averenđe hem te služina e Jehovase. *

17. So šaj te ćere akana te šaj tajsato dive te ovel tut pana pobare odgovornostija?

¹⁷ Šaj te ćere pana pobuter e Jehovase ako trudineja tut skromno te živine hem te na khuve ko dugija. Ćhiv tuće disave potikne ciljija te šaj te ispunine disave pobare ciljija. Na primer, ako tano to cilj te ove stalno pioniri, sose na bi već akana počmineja te služine sar pomoćno pioniri? Ako tano to cilj te služine sar sluga pomoćnik već akana šaj pana pobuter  te đa ki služba hem te posetine e phuren hem e nabormen ki ti skupština. Odova so akana ćereja ka pomožini tut tajsato dive te ćere avera odgovornostija. Ov odlučno ko svako zadatko te de toklo najšukar (Rimlj. 12:11).

18. So sikljoveja andi phen i Beverli soj tani ki slika?

¹⁸ Niked na ka ova odobor phure so našti te ćhiva amenđe disave ciljija hem te ispunina len. Te dikha o primer andi amari phen i Beverli koja isi la 75 berš. Oj hine but nabormi hem sebepi odova naštine te phirel. Ama, oj manglja te učestvujini ki akcija hem te vićini e manušen ki Spomen-svečanost. Odolese, ćhivđa pese disave konkretna ciljija. Ked i Beverli ispuninđa pe ciljija, oj hine but bahtali. Čak olako primer, podstakninđa averen te ćeren pana pobuter ki služba. O Jehova cenini sa odova so ćerena amare phure phralja hem phenja, čak iako sebepi pe berša ja sebepi po nabormipe našti te ćeren but (Ps. 71:17, 18).

19. Kola ciljija šaj te ćhiva amenđe

¹⁹ Ćhiv tuće ciljija kola šaj te ispunine. Barjaćer o šukar osobine kola ka pomožinen tut te ove pana popaše e Jehovaja. Sikljov te ćere disave neve buća hem ćer ko te veštine te šaj o Jehova hem olesi organizacija pana pobuter te koristinen tut. Dikh sar šaj pana pobuter te pomožine averenđe. * Uzi Jehovasi pomoć, sare ka dikhen toklo napredak, sar so dikhlje e Timotejeso (1. Tim. 4:15).