O Adam hem i Eva hine len ćhave, hem i phuv pherdilji manušencar. Sar đelo o vreme, disave anđelija nakhlje ki e Bengesi strana.

Odola anđelija alje ki phuv hem lelje o manušikano telo te šaj te ženinen pe e đuvlencar. O ćhave kola odola romnja bijanđe hine pobare hem pozorale ando avera manuša. On hine but nasilna.

I phuv pherdilji e manušencar kola ćerđe lošna buća. Ki Biblija pisini „so o manuša ki phuv hine but rumime hem so sa olenge mislija hem želje ando olengo vilo uvek tane usmerime premalo lošnipe.“

O Noje hine šukar manuš. O Jehova phenđa lese so ka uništini sa e lošno manušen ko Potop.

Isto ađahar, o Devel phenđa e Nojese te ćerel i arka, odnosno jekh baro brodo hem ko odova brodo te khuvel ov, olesi porodica hem sa o vrste ando životinje.

O Noje upozorinđa e manušen so ka avel o Potop, ama on na šunđe le. Disave marđe lese muj, a disave mrzinđe le.

Ked i arka hine ćerdi, o Noje ćhivđa e životinjen andre.