1, 2. So but manuša pučenape?

O ČHAVORE isiljen but pučiba. Tu šaj te objasnine diso, ama on but puča pučena: „Sose?“ Ked ka deljen o odgovor on palje ka pučen: „Ama sose?“

² Da lji hijam terne ja phure sare amen isimen pučiba, sar soj tane so ka ha, so ka urava ja so ka čina. Šaj isimen važna pučiba ando dživdipe ja so ka ovel ko vakti so avela. Ama, but manuša našti te denmen odgovorija ko akala pučiba, tegani amen šaj te čhinava te rodaljen.

3. Sose but manuša mislinena so našti te arakhen o odgovorija ko peklje važna pučiba?

³ Da lji i Biblija isila odgovorija ko amare važna pučiba? But manuša mislinena so isila, ama phenena soj tani i Biblija but phari te haljolpe. On šaj mislinena so samo o učiteljija hem e religijake vođe džanena o odgovorija. A disave ladžana te pučen sose na džanena o odgovorija. So tu mislineja?

4, 5. (a) Kola važna pučiba isitu? (b) Sose valjani te rode o odgovorija ko teklje pučiba?

⁴ Šaj mangeja te džane o odgovorija ko pučiba sar soj tane: Sose amen živina? So ovela amenca ked mera? Savo tano o Devel? O Isus kova tano najbaro učitelji pheja: „Moljinen tumen hem ka ovel tumendže dindo, roden hem ka arakhen, khuven hem ka ovel tumendže phravdo“ (Matej 7:7). Odoljese, ma čhinav te rode sa dži na arakheja o odgovorija ko kola šaj te verujine.

 ⁵ Ako rodeja, tu ka arakhe o odgovorija ki Biblija (Godžalje lafija 2:1-5). Akala odgovorija nane but phare te haljovenpe. Odova so ka sikljove ka pomožinitu te oveltu pobahtalo dživdipe avdije hem šuži nada ko vakti so avela. Akana ka vačera ando jekh pučibe kova bunini buten manušen.

6. Sose disave manuša mislinena so o Devel na akhari gajlja oljendar?

⁶ But manuša mislinena so o Devel na akhari gajlja amendar. On phenena, ako o Devel čače akhari gajlja amendar o sveto bi ovela but averčhane. Avdije kotar na dikha mariba, o manuša mrzinenape hem isi but čoroljipe. O manuša tane naborme, isiljen muke hem merena. Disave pučenape: „Ako o Devel akhari gajlja amendar, sose na čhinavi sa akala muke?“

7. (a) Sar e religijake vođe sikavena e manušen so o Devel čerela o lošnipe? (b) Sose šaj te ova sigurna so o Devel nane krivo so ovena lošna buča?

⁷ Disavo puti e religijake vođe čhivena e manušen te verujinen so o Devel čerela lošnipe. Ked ovela diso lošno vačerena soj tano odova e Devljesi volja. On phenena so ov manglja te ovel adžahar. Ked vačerena adžahar on krivinena e Devlje. Ama, i Biblija sikavi so ando Devel niked na avela o lošnipe. Ko Jakoveso 1:13 phenelape so o Devel nikase na čerela lošnipe. Odothe pisini: „Ked tano džiko ko iskušenje, ma te vačeri: ’O Devel iskušinima.‘ Sose lošna bučenca našti te iskušine e Devlje, a ni ov nikas na iskušini lošnipa.“ Odova značini iako o Devel pana na čhinavi o lošna buča,  ov niked na čerela te oven o lošna buča (Čitinen Jov 34:10-12).

8, 9. Sose našti te krivina e Devlje so isimen pharipa? Vačer jekh primer.

⁸ Te dikha jekh primer. Jekh terno čhavo živini pe dadeja hem pe daja. Oljeso dad but mangelalje hem sikavilje sar te ovel godžalo manuš. Ama, o terno čhavo buninipe protiv po dad hem džalapse ando čher. Tegani počmini te čerel lošna buča hem sebepi odova isilje pharipa. Da lji tano o dad krivo so mukljalje te džalpse ando čher? Na (Luka 15:11-13). Sar akava dad adžahar hem o Devel na čhinadža e manušen ked on birije te buninenpe hem te čeren odova soj tano lošno. Ked ovela disavo lošnipe valjani te setinamen so o Devel na čerela odova. Odoljese našti te krivina e Devlje.

⁹ Isi but šukar razlog sose o Devel pana na čhinadža o lošna buča so ovena. Ko 11. šero ka sikljove so vačeri i Biblija odoljestar. Ama, šaj te ove sigurno so o Devel mangela amen hem niked nane krivo so isimen pharipa. Samo ov šaj te cidel sa odova (Isaija 33:2).

10. Sose šaj te ova sigurna so o Devel ka cidel sa o lošnipe kola čerdže o manuša?

¹⁰ O Devel tano sveto (Isaija 6:3). Sa so čerela tano čisto hem šukar. Odoljese šaj te verujina Oljese. O manuša nane esavke. Disavo puti on čerena lošna buča. Čak o vladari kova viljestar mangela te čerel šukaripe, nanelje moć te cidel sa o lošnipe so čerena o lošna manuša. Niko nanelje odoborkha bari moć sar so isilje o Devel. Ov šaj hem mangela te cidel sa o lošnipe kola čerdže o lošna manuša. Ov zauvek ka cidel sa o lošnipe (Čitinen Psalam 37:9-11).

11. Sar tano e Devljese ked tu isitu muke?

¹¹ Sar tano e Devljese ked dikhela so ovela ko sveto hem ked tu isitu muke? I Biblija mothovi so o Devel „mangela i pravda“ (Psalam 37:28). Odoljese ov but šukar dikhela okova soj tano šukar hem soj tano lošno. Ov mrzini ked o manuša isiljen muke. I Biblija phenela so ov „hinelje dukh ko po vilo“ ked ko purano vakti dikhlja so o sveto hine pherdo lošnipa (1. Mojsieso 6:5, 6). O Devel na promisalo (Malahija 3:6). I Biblija phenela so o Devel čače akhari gajlja tutar (Čitinen 1. Petareso 5:7).

12, 13. (a) Sose amen isimen mangipe hem akhara gajlja ando avera? (b) Sar tano amendže ked dikha so o manuša isiljen muke? (c) Sose amen šaj te ova sigurna so o Devel ka čhinavi sa o muke hem i nepravda?

¹² I Biblija phenela so o Devel čerdžamen premalji pi slika (1. Mojsieso 1:26). Odova značini so o Devel čerdžamen te ovelmen šukar osobine sar so ov isilje. Ako tano tuče pharo ked dikheja so o šukar manuša isiljen muke, kobor tano e Devljese pana popharo ked dikhela sa odova. Sar amen džana akava?

¹³ I Biblija sikavimen so „o Devel tano mangipe“ (1. Jovaneso 4:8). Sa so čerela o Devel avela ando mangipe. Odoljese amen isimen mangipe sose o Devel isilje mangipe. Razmislin akaljestar: Ked bi tu ovelatu moć, da lji bi čhinaveja sa o muke hem i nepravda so isi ki Phuv? Sigurno bi čereja odova sose mangeja e manušen. So bi o Devel čerela? Ov isilje moć hem odoljese so mangela amen, ov ka čhinavi sa o muke hem i  nepravda. Tu šaj te ove sigurno so sa e Devljese lafija kola tane pisime ko početko ki akija knjiga ka oven čačutne. Ama, te šaj te verujine ko akala lafija tu valjani te džane pobuter ando Devel.

14. Sar tano e Devljeso nav hem sar amen džana so valjani te vičinalje ko nav?

¹⁴ Ked tu mangeja te ove džikasa amal, so prvo vačereja oljese? Vačereja to nav. Da lji o Devel isilje nav? But religije phenena so oljeso nav tano „Devel“ ja „Gospod“, ama akala nane nava. Odova tano sar ked džikase phenelape soj tano „kralj“ ja „predsednik“. Ama, ni tegani na džana oljeso nav. O Devel vačerdža amendže so oljeso nav tano Jehova. Ko Psalam 83:18 pisini: „Te šaj te džanen o manuša so samo tu, kaso nav tano Jehova, hijan jedino Najbaro upri celo Phuv.“ O manuša kola pisije i Biblija čhidže e Devljeso nav ko pobuter ando hiljada thana. O Jehova mangela te džane oljeso nav hem te vičinelje ko nav. Ov vačeriče po nav te šaj tu te ove oljeso amal.

15. So značini e Jehovaso nav?

¹⁵ E Devljeso nav, Jehova, vačeri amendže but oljestar.  Oljeso nav značini so ov šaj te čerel sa so vačeri hem sa so mangela. Nane ništa so šaj te čhinavilje. Samo o Jehova šaj te ovelje asavko nav. *

16, 17. Sose phenelape e Devljese soj tano (a) „Svemoćno“? (b) „Večno Kralj“? (c) „Stvoritelj“?

¹⁶ Sar so čitijam angljeder, ko Psalam 83:18 vačeripe soj tano o Jehova „jedino Najbaro upri celo Phuv.“  Isto adžahar, ko Pučaribe 15:3 pisini: „Bare hem but šuže te buča so čereja, Jehova Devla, tu kova hijan Svemoćno. Pravedna hem čačutne tane te drumija, tu kova hijan večno Kralj.“ So značini ked phenelape so o Devel tano „Svemoćno“? Odova značini so o Jehova tano najzoralo kotar sa avera. A ked phenelape „večno Kralj“ odova značini so ov oduvek hine. Ko Psalam 90:2 vačeripe so ov nanelje ni početko ni krajo. Akava tano but posebno!

¹⁷ Samo o Jehova tano Stvoritelj. Ko Pučaribe 4:11 pisini: „Dostojno hijan, Jehova, Devla amareja, te lje i slava, i čast hem i moć, sose tu čerdžan sa so isi hem teklja volja sa ulo hem sa tano čerdo.“ O Jehova čerdža e anđelen soj tane ko nebo, o čerenja kola tane upre, o voće so barjola ko kašta hem o mačhe soj tane ko pani - sa so šaj te perelče ki godi o Jehova čerdža.

18. (a) Sose disave manuša mislinena so niked našti te oven paše e Devljeja? (b) So vačeri i Biblija odoljestar?

¹⁸ Ked disave manuša čitinena kotar e Jehovase osobine, on šaj te daran. On mislinena so o Devel na akhari gajlja amendar sebepi soj tano but moćno, baro hem soj tano but dur. Ama, da lji o Devel mangela adžahar te mislina? Na. O Jehova mangela te ovel paše amenca. I Biblija phenela so o Devel „nane dur nikastar amendar“ (Čeriba e apostolengo 17:27). O Devel mangela tu te ove popaše oljeja hem ov dela po lafi so ov ka ovel popaše tuva (Jakoveso 4:8).

19. (a) Sar šaj te ove e Devljeso amal? (b) Save e Jehovase osobine tane tuče najmanglje?

¹⁹ Sar šaj te ove e Devljeso amal? O Isus pheja: „A te šaj te oveljen večno dživdipe, valjani šukar te pendžaren tut, e jedino čačutne Devlje, hem okolje kas bičhaldžan, e Isuse Hriste“ (Jovan 17:3). Sikljov hem ponodri te šaj pošukar te pendžare e Jehova hem e Isuse. Tegani tu šaj te oveltu večno dživdipe. Na primer, amen već akana sikljiljam so „o Devel tano mangipe“ (1. Jovaneso 4:16). Ama, ov isilje hem avera but šuže osobine. I Biblija phenela so o Jehova tano „kovlje viljeso hem isilje vilo svakonese, na holjani sigate hem pherdo tano šukaripa hem čačipa“ (2. Mojsieso 34:6). O Jehova tano šukar hem spremno te oprostini (Psalam 86:5). O Devel tano strpljivo hem verno (2. Petareso 3:9; Pučaribe 15:4). Tu šaj te sikljove pobuter kotar oljese šuze osobine adžahar so ka čitine i Biblija.

20-22. (a) Sar šaj te ove paše e Devljeja ked našti te dikhelje? (b) So valjani te čere ako avera mangena te čhinaventu te sikljove andi Biblija?

 ²⁰ Sar šaj te ove paše e Devljeja ked našti te dikhelje? (Jovan 1:18; 4:24; 1. Timotejese 1:17). Ked čitineja ki Biblija ando Jehova, tegani šaj te pendžare olje sar džikas kas šaj te dikhe (Psalam 27:4; Rimskonendže 1:20). So pobuter sikljoveja ando Jehova pana pobuter ka mangelje hem ka ove popaše oljeja.

²¹ Tu ka haljove soj tano o Jehova amaro Dad (Matej 6:9). Ov dijamen dživdipe hem mangela te ova bahtalje ko amaro dživdipe. Odova mangela svako dad pe čhavendže (Psalam 36:9). I Biblija sikavimen so šaj te ova e Jehovase amala (Jakoveso 2:23). Zamislin, o Jehova kova čerdža sa, mangela tu te ove oljeso amal.

²² Disave manuša šaj ka mangen te čhinaventu te sikljove andi Biblija. On šaj darana so ka promine ti vera. Ma muk nikase te čhinavitu te ove e Jehovaso amal. Ov tano najšukar amal so šaj te oveltu.

23, 24. (a) Sose valjani hem ponodri te rode odgovorija? (b) So ka haljova ko dujto šero?

²³ Dži sikljoveja andi Biblija, ka arakhe buča kola na te haljove. Ma ladža te puče džikas te pomožinitu. O Isus vačerdža so valjani te ova ponizna sar tikne čhavore (Matej 18:2-4). O čhavore isto isiljen but pučiba. O Devel mangela te arakhe o odgovorija. Odoljese, sikljov hor andi Biblija te šaj te ove sigurno soj tano odova čačipe (Čitinen Čeriba e apostolengo 17:11).

²⁴ Te šaj pošukar te pendžare e Jehova valjani te sikljove andi Biblija. Ko dujto šero ka haljove sose tani i Biblija averčhane kotar sa avera knjige.