E Sauleso najphureder čhavo, vičindža pe Jonatan hem hine but hrabro vojniko. O David phendža so o Jonatan hine posigutno ando orlo hem pozoralo ando lav. Jekh dive, o Jonatan dikhlja ko jekh brego 20 filistejska vojnikija. Pe vojnikose, kova igardža oljeso štit phendža: „Ka napadina ljen samo ako o Jehova dela amen znak. Ako o Filistejcija phenena amendže te dža koro ljende, tegani ka napadina ljen.“ O Filistejcija vičindže: „Aven te borina amen!“ Tegani, o Jonatan hem o manuš kova phiravdža oljeso štit dželje hem pobedindže e filistejsko vojnikonen.

Odoljese so o Jonatan hine e Sauleso najphureder čhavo, ov valjandža te ovel kraljo palo po dad. Ama, o Jonatan džandža so o Jehova birindža e Davide te ovel aver kraljo ko Izrael hem na hine ljubomorno. O Jonatan hem o David ulje but paše amala. On  obećindže so ka zaštitinen hem so ka braninen jekh jekhe. O Jonatan dindža e Davidese poklo ogrtači, po mač, pi strela hem poklo pojas sar znak ando amaljipe.

Jekh puti, dži o David garavdža pe ando Saul, o Jonatan dželo koro ljeste hem phendža ljese: „Ov hrabro, hem ma dara. O Jehova birindža tut te ove kralj. Čak hem mo dad džanela odova.“ Mangeja li te ovel tut jekh asavko šukar amal sar o Jonatan?

But putija, o Jonatan čhivdža po dživdipe ki opasnost samo te pomožini pe amaljese. Ov džandža so oljeso dad, o Saul, mangela te mudari e Davide. Odoljese phendža pe dadese: „Ka čere baro greh ako mudareja e Davide, ov na čerdža ništa lošno.“ Ked šundža akava, o Saul but holjandža upro Jonatan. Nekobor berš palo odova, o Saul hem o Jonatan mulje ko jekh maribe.

Ked o Jonatan mulo, palo odova, o David rodindža oljese čhave e Mefivosteje. Ked arakhlja lje, o David phendža: „Odoljese so hijum lje but šukar amal te dadeja, me ka brininav man tuče celo to dživdipe. Ka živine ki miklji palata hem ka ha andi miklji sofra.“ O David niked na bisterdža pe amalje, e Jonatane.