•   „Đi akana ki Kina na hine odobor tato sar akava berš hem akava nilaj tano trito zabeležimo nilaj sar na pelo dovoljno boršim“ (7. septembar 2022, The Guardian).

•   „Akana ka ovel panđto berš sar ko disave thana ki Afrika ka ovel but baro šukipe“ (26. avgust 2022, UN News).

•   „Isi opasnost so o šukipe ka ovel ko pobuter ando ekvaš phuvja ki Evropa. Ko poslednja 500 berš na hine asavko šukipe“ (23. avgust 2022, BBC News).

 But stručnjakija phenena so asavko šukipe ka ovel hem ponodri hem čak so ka ovel pana pološno. Da li šaj te nadina amen so ka ovel pošukar? So phenela i Biblija odolestar?

 Ki Biblija pisini so ka ovel ko amaro vreme:

•   „Ka oven. . . bokhalipa ko razna thana“ (Luka 21:11).

 Sebepi o šukipe ovela baro bokhalipe. Sebepi o bokhalipe o manuša patinena hem merena, a sa odova mothovi so ispuninena pe e biblijake proročanstvija (Otkrivenje 6:6, 8).

 I Biblija mothovi amenđe o glavno razlog sose ovena sa pobare šukipa. Ano late pisini:

•   „O manuš našti te upravini ni pe korakonencar“ (Jeremija 10:23).

 Odova značini so o manuša našti uspešno „te upravinen pe korakonencar“ ja te vladinen. Sebepi olenge lošna odluke, but putija nane dovoljno pani hem ovela šukipe ki phuv.

•   But naučnikija slažinena pe so sebepi e manušengo ovena sa pobare temperature ki phuv hem odolese ovela pana pobaro šukipe ki celo phuv.

•   O pohlepna manuša hem o manuša kola bavinena pe e politikaja, a kola na razmislinena andi budućnost uništinena o šume, zagadinena i phuv hem na koristinena mudro o buća andi priroda. Sebepi odova, hari pohari šaj te našala o važna izvorija ando pani.

 Ama, i Biblija dela amen nada.

 Ki Biblija pisini so o Devel ka rešini o problemi kova avdije isi amen e panjeja. Sar?

1.  1. O Devel ka uništini okolen „so uništinena i phuv“ (Otkrivenje 11:18). Ov ka cidel e lošno hem e pohlepno manušen sebepi kola avdije nane dovoljno pani hem kola uništinena i priroda (2. Timoteju 3:1, 2).

2.  2. „Andi šuki phuv ka ovel jezero“ (Isaija 35:1, 6, 7). O Devel ka cidel sa i šteta koja ulji sebepi o but bare šukipa ki phuv hem celo amari phuv ka ovel raj kuri ka ovel dovoljno pani.

3.  3. „Tu brinineja tut e phuvjaće, ćerđan la te bijani but hem te ovel barvali“ (Psalam 65:9). O Devel ka blagoslovini i phuv hem ka ovel amen but buća hajbase hem dovoljno pani sarinenđe.