Sar đala o vreme, isi sa pohari hem pohari manuša kola tane pristojna. Nane ništa čudno te dikha sar o pacijentija pištinena upro doktorija, sar o gostija ko restorani pištinena upro konobarija, sar o manuša na poštujinena e stjuardesen, sar o ćhave marena muj, vređinena hem napadinena pe profesoren, sar disave političarija ćerena o buća kolendar valjani te lađan, a disave avera političarija samo ćerena pe soj tane pristojna.

 Ki Biblija isi pherdo savetija kola šaj te pomožinen e manušenđe te oven pristojna. Isto ađahar, oj objasnini sose avdije isi odobor nepristojna manuša.

 Ko celo sveto, šaj te dikha so o manuša više na đanena soj tano šukar hem soj tano moralno.

•   Premalo jekh istraživanje kova akana sigende hine ćerdo, o manuša ki Amerika verujinena so ko poslednja 22 berš e manušenge moralna vrednostija but pelje.

•   Ko jekh aver istraživanje ko kova učestvujinđe 32 000 manuša kotar 28 phuvja, 65 posto phenđe so niked đi akana o manuša na hine odobor nepristojna.

 Ki Biblija pisini so o manuša avdije ka oven asavke.

•   „Ko poslednja dive ka ovel but pharo vreme. O manuša ka oven sebična, pohlepna aso pare, umišljena, ohola, neposlušna e roditeljenđe, nezahvalna... bezosećajna premalo avera [hem] okrutna“ (2. Timoteju 3:1-3).

 Ako mangeja te đane sar ispunini pe akava proročanstvo, čitin o članko „Da li je Sveto pismo proreklo kakvi će ljudi danas biti?“

 Ko sveto kuri i pristojnost našalđola, but manuša haljilje so ki Biblija šaj te arakhen savetija kola ka pomožinen lenđe te ponašinen pe šukar. Olake savetija tane „pouzdana, akana hem zauvek“ (Psalam 111:8). Aće disave primerija:

•   So phenela i Biblija: „Sa so mangena o manuša te ćeren tumenđe, ćeren hem tumen olenđe“ (Matej 7:12).

   So odova značini: Sar so amen mangaja avera te poštujinen amen hem te oven šukar premalo amende, ađahar hem amen valjani te ova premalo avera.

•   So phenela i Biblija: „Akana ked cidinđen tumendar o hovajbe, sare vaćeren o ćaćipe jekh jekhese“ (Efešanima 4:25).

   So odova značini: Valjani te ova iskrena hem poštena ko sa so ćeraja.

 Ako mangeja te đane pobuter, čitin:

•   I Stražarsko kula e temaja „Šta je ispravno, a šta pogrešno: Čime se voditi?“

•   O članko „So premali Biblija značini te ova tolerantna?.“