Oko panđ milijarde manuša but mangena te dikhen o Svetsko prvenstvo ando fudbal kova ićeri pe ando 20. Novembar đi o 18. decembar 2022. berš. But đene mislinena so asavke sportska događaja šaj te ćeren but poviše nego samo te osetinen pe o manuša soj tane ko jekhipe đi dikhena o utakmice.

•   O bivšo predsedniko o Nelson Mandela, phenđa: „O sport isi le moć te menini o sveto. Dela bari volja e manušenđe. Isi le moć te ćerel o manuša te oven ko jekhipe ko jekh posebno način“.

•   O predsedniko andi FIFA a o Đani Infantino, phenđa: „O fudbal ćerela o manuša te oven ko jekhipe, te ovel len nada, bahtalipe, te mangen avere manušen hem te ovel len diso zajedničko averencar“.

 Šaj li o Svetsko prvenstvo ja disavo aver sportsko događaj ćaće te ćeren akala bare buća? Isi li diso so šaj te ćerel te ovel mir hem jekhipe?

 Akava berš o Svetsko prvenstvo hine diso poviše ando fudbal. Podstakninđa e manušen te vaćeren andi politika, ando manušikane pravija, ando rasna podele hem andi ekonomija.

 Ipak, but manuša uživinena đi dikhena o međunarodna sportska događaja sar soj tano o Svetsko prvenstvo. Ama, kobor god o manuša te mangen, akala događaja našti te ćeren zauvek te ovel jekhipe maškaro manuša. Umesto odova, on but puti mothovena sebično stav hem postupkija aso kola i Biblija phenela so ka oven ko „poslednja dive“ (2. Timoteju 3:1-5).

 I Biblija vaćeri ando jekhipe so ka ovel ko celo sveto. Oj obećini so ked ka vladini e „Devleso Kraljevstvo“, sa o manuša ki Phuv ka oven ko jekhipe (Luka 4:43; Matej 6:10).

 O Kralj ando odova Kraljevstvo, o Isus Hrist, uverini amen so ka ovel mir ko celo sveto. I Biblija phenela:

•   „Ko dive ked ov ka vladini ka niconen o pravednikija, ki celo phuv ka vladini o mir.“ (Psalam 72:7).

•   „Sose ov ka izbavini e ćororen kola rodena lestar pomoć . . . Ka izbavini len ando manuša kola mangena te povredinen len hem kola mučinena len.“ (Psalam 72:12, 14).

 Čak hem avdije, e Isusese sikljoviba pomožinđe bute manušenđe ando 239 phuvja te oven ko jekhipe. On sikljilje te na mrzinen e manušen. Ako mangeja te đane pobuter ando akava, čitin o članko „Ked i mržnja više na ka ovel“.