Σκέφτινε ακαβά παράδειγμας: Βάκερ ότι η Κάρεν μόλις αβιλί κο πάρτι ντα ασουνέλα παλά-πέσταρ ι φωνή πι αμαλινάκι.

Η Κάρεν βουρτίνελα ντα ντικχέλα την Τζέσικα τι τθερέλ πι βαστέντε ντούι πουταρντέ μπουκάλια. Τζανέλα ότι τθερένα αλκοόλ. Η Τζέσικα ανέλα ι εκ μπουκάλι κι Κάρεν ντα βακερέλα: «Μα βάκερ μάνγκε ότι ισινάν αζόμ χουρντί σο να μπορίνεσα τι γλεντίνες χάνικ».

Η Κάρεν να μανγκέλα τι πιλ, αλλά η Τζέσικα ισί λάκι αμαλίν. Ντα η Κάρεν να μανγκέλα τι αμντίνελ λάκι αμαλίν ότι να διασκεδάνελα. Επίσης, η Τζέσικα ισί λατσσί τσσάι. Άρα, για τι πιλ βόι, νανέ αζόμ κακός. «Ντα ακανά σο σκεφτίναβα-λες, μπίρα ’σί», βακερέλα αντρά-πέσταρ η Κάρεν. «Νανέ ναρκωτικά».

Άμα κα αβέας κι θέση της Κάρεν, σο κα κερέας;

Για τι λες εκ λατσσί απόφαση εκχέ ασακέ περιπτωσιάτε, πρέπει τι τζανές το νεαυτός, δηλαδή τι τζανές κον ισινάν ντα καλά ισί ο πιο σημαντικά πράγματα τούκε. Άμα κα τζανές-λεν ανταλά, κα τθερές ι ζορ τι κερές κουμάντος τούι τι ζωή αντίς τι μουκχές ι γιαβερέν τι κερέν-τουτ σο μανγκένα.​—1 Κορινθίους 9:​26, 27.

Σαρ μπορίνεσα τι τθερές ασακί ζορ; Για τι αρχίνες, απάντινε κο ερωτήσεις σο ισί πιο τελέ.

Άμα τζανέσα σο μπορίνεσα τι κερές ντα σο λατσσέ ιδιότητες τθερέσα, κα νιωθίνες πιο σουκάρ τι νεαυτόσαρ.

ΠΑΡΑΔΕΙΓΜΑΣ ΚΑΤΑ ΑΓΙΑ ΓΡΑΦΗ: Ο απόστολος Παύλος γραφιντάς: «Ατζέ-ντα άμα να κεράβα λάφι μπουτ λατσσές, σίγουρα τθεράβα γνώση». (2 Κορινθίους 11:6) Επειδή τζανέλας μπουτ λατσσές ι Γραφή, ο Παύλος μπορίνελας τι ατσσόλ σταθερός όταν μερικά τζενέ πρασάνας-λες. Να μουκχλάς λένγκε μπέτι λάφια τι κερέν-λες μα τι νιωθίνελ σουκάρ πι νεαυτόσαρ.​—2 Κορινθίους 10:​10· 11:5.

ΣΚΕΦΤΙΝΕ: Γράφινε πιο τελέ εκ ταλέντος σο τθερέσα ή εκ πράγμας σο τζανέσα τι κερές λατσσές.

Ακανά γράφινε χάνικ λάφια για εκ ιδιότητα σο τθερέσα. (Για παράδειγμας: πφαμπάβα ι γιαβερένγκε, ντάβα αντράλ μι γκίσταρ, ντένα μάνγκε μπέσα ο γιαβερά, κεράβα σωστά μο μπουτιά;)

Εκ τζαντζίρ σο τθερέλα πρόβλημας σάντε εκχέ τθανέστε μπορίνελα εύκολα τι πφανγκιόλ σαρί. Αντικάς ισί το αδυναμίες-ντα. Άμα κα μουκχές-λεν τι κερέν-τουτ κουμάντος, μπορεί τι αλλάνεν-τουτ ντα τι χαλαβέν-τουτ.

ΠΑΡΑΔΕΙΓΜΑΣ ΚΑΤΑ ΑΓΙΑ ΓΡΑΦΗ: Ο Παύλος αγαβέλας πο αδυναμίες. Γραφιντάς: «Μπεϊντίναβα μπαγιά ο νόμος ι Ντεβλέσκο αντρά-μάντε, αλλά ντικχάβα εκ γιαβέρ νόμος σο τζάλα κόντρα κο νόμος μι γκοντιάκο ντα κερέλα-μαν τι αβάβ αιχμάλωτος κο νόμος της αμαρτίας».​—Ρωμαίους 7:​22, 23.

ΣΚΕΦΤΙΝΕ: Καγιά αδυναμία σο τθερέσα πρέπει τι σικλιός τι κερές κουμάντος;

Κα τσσουβέας-τουτ εκχέ ταξίστε ντα κα βακερέας κο ταξιτζής τι ντελ ντονταλάι εκχέ τθανέσταρ μέχρι τι τελειώνελ η βενζίνη; Ανταβά κα αβέλας ντινιλιπέ ντα κα χαλαβέας λοβέ!

Σο σικλιόσα ανταλέσταρ; Ο στόχοι κατευθίνενα τι ζωή ντα βοηθίνενα-τουτ μα τι κερές πράγματα σινανέ. Σικαβένα τούκε επίσης κάι τζάσα ντα σαρ τι ερεσές μέχρι οτθέ.

ΠΑΡΑΔΕΙΓΜΑΣ ΚΑΤΑ ΑΓΙΑ ΓΡΑΦΗ: Ο Παύλος γραφιντάς: «Αντικάς τθάβνταβα με, όχι σινανέ». (1 Κορινθίους 9:​26) Αντίς τι μουκχέλ ο πράγματα πι ζωγιάτε αντικάς, ο Παύλος τσσουβέλας στόχους ντα σοράν τζουβντιόλας με τρόπος σο βοηθίνελας-λες τι κερέλ ο στόχοι σο τσσουντάς.​—Φιλιππησίους 3:​12-14.

ΣΚΕΦΤΙΝΕ: Γράφινε πιο τελέ τριν στόχους σο μανγκέσα τι πετυχίνες ο γιαβέρ μπρες.

Άμα να τζανέσα σο πακιάσα, κα αβές σαρ εκ φύλλος σο γκερέλα-λες η μπαρμπάλ κάι μανγκέλα. Σαρ η σαπουρνί σο βακέρντιβελα χαμαιλέοντας, κα αλλάνες χρώματα για τι ταιριάνες οντουλέντζαρ σο ισί πασέ τούτε. Ανταβά σικαβέλα ότι να τζανέσα λατσσές το νεαυτός.

Όμως, όταν οντουλά σο κερέσα βασίντιβενα οντουλέντε σο πακιάσα, κα κερές οντουβά σο μανγκέλα το νεαυτός​—όχι απλά οντουβά σο κερένα ο γιαβερά.

ΠΑΡΑΔΕΙΓΜΑΣ ΚΑΤΑ ΑΓΙΑ ΓΡΑΦΗ: Μάλλον ο προφήτης Δανιήλ ισινέ ατζέ χουρντό κι ηλικία κάνα “αποφασιντάς αντρέ πι γκίστε” τι ασουνέλ ι Ντεβλέσκε νόμοι, παρόλο σο γκερντέας-λες ντουρ λέσκε φαμιλιάταρ. (Δανιήλ 1:8) Να μουκχλάς ι γιαβερέν τι επηρεάνεν-λες. Ο Δανιήλ τζουβντιόλας σύμφωνα οντουλέντζαρ σο πακιάλας.

ΣΚΕΦΤΙΝΕ. Σο πακιάσα; Για παράδειγμας: Πακιάσα κο Ντεβέλ; Αν πακιάσα, σόσκε πακιάσα; Σο κερέλα-τουτ τι αβές σίγουρος ότι ο Ντεβέλ υπαρχίντιβελα;

Πακιάσα ότι ο ηθικοί κανόνες σο τσσουβέλα ο Ντεβέλ για τι ατσσός πάκι λέσκε γιακχίντε ισί τι λατσσιμάσκε; Σόσκε πακιάσα-λες ανταβά;

Τελικά, σαρ μανγκέσα τι αβές​—σαρ εκ φύλλος σο γκερέλα-λες κάι μανγκέλα εκ σανί μπαρμπάλ ή σαρ εκ δέντρος σο αντιχίνελα ατζέ-ντα κο ζουρανέ μπαρμπαλιά; Τι αβές σίγουρος οντουλένγκε σο πακιάσα ντα ι πραγματένγκε σο ισί σημαντικά τούκε για τι κερές το νεαυτός πιο ζουρανό, ντα κα μοιάζες εκχέ ασακέ δεντρόσαρ. Αντικάς κα μπορίνες τι απαντίνες κι ερώτηση: «Κον ισινόμ;»