1, 2. (α) Σο βακερντάς ο Ελιφάς ντα ο Βιλδάδ για το τρόπος σο ντικχέλα ο Ντεβέλ αμαρί υπηρεσία; (β) Σο βακερντάς ο Ιεχωβά ανταλέσκε;

ΠΡΙΝ από μπουτ μπρεσά, τριν μουρσά γκιλέ τι κερέν λάφι εκχέ τζενέσαρ σο βακέρντιβελας Ιώβ ντα υπηρετίνελας πιστά ι Ντεβλές. Εκ οντουλέ τζενένταρ, ο Ελιφάς σο ισινέ κατά Θεμάν, πουτσλάς τον Ιώβ: «Μπορίνελα ο τζενό τι αβέλ χρήσιμος ι Ντεβλέσκε; Μπορίνελα οντουβά σο τθερέλα σοφία τι κερέλ λέσκε λατσσιπέ; Μήπως χάλα ανάγκη ι Ντεβλές άμα ισινάν δίκαιος; Ή κερδίνελα τίποτα ο Ντεβέλ επειδή ατσσόσα πιστός;» (Ιώβ 22:1-3) Ο Ελιφάς πακιάλας ξεκάθαρα ότι η απάντηση ισινέ όχι. Σοράν, ο Βιλδάδ ο Σαυχίτης, σο ισινέ οντουλέ τρινέ τζενένταρ, βακερντάς ότι κο γιακχά κι Ντεβλέσκε καέκ τζενό να μπορίνελα τι αβέλ δίκαιος.—Διαβάνεν Ιώβ 25:4.

² Ο Ελιφάς ντα ο Βιλδάδ μανγκένας τι κερέν τον Ιώβ τι πακιάλ ότι σινανέ προσπαθίνελας τι υπηρετίνελ ι Ιεχωβάς. Οντουλά τζενέ μανγκένας τι πακιάλ ο Ιώβ ότι κο γιακχά κι Ντεβλέσκε να τθεράσα πιο μπαρί αξία από εκ σκόρος, εκ κάμπια ή εκ κερμό. (Ιώβ 4:19· 25:6) Μήπως βακερένας-λες ανταβά επειδή ισινέ ταπεινοί; (Ιώβ 22:29) Ισί μπαγιά ότι ο  Ιεχωβά ισί μπουτ μπαρό ντα αμέν ισινάμ μπουτ χουρντέ ανγκλά-λέστε. Άμα ισινάμ κι κορυφή εκχέ βεσέσκι ή άμα ισινάμ κο αεροπλάνος ντα ντικχάσα τελέ, αγαβάσα καζόμ χουρντέ ισινάμ ντα ότι να ισινάμ σημαντικοί. Αλλά αντικάς ντικχέλα ο Ιεχωβά ο προσπάθειες σο κεράσα για τι υπηρετίνας-λες ντα για τι κεράς ο έργος ι Βασιλειάκο; Όχι! Ο Ιεχωβά βακερντάς κο Ελιφάς, κο Βιλδάδ ντα κο Σωφάρ, σο ισινέ ο τρίτος οντουλέ μουρσένταρ, ότι βακερένας ψέματα. Σοράν ο Ντεβέλ βακερντάς ότι ο Ιώβ κερντάς-λες χαρούμενος ντα ότι ισινέ “λέσκο υπηρέτης”. (Ιώβ 42:7, 8) Άρα μπορίνασα τι αβάς σίγουροι ότι ο ατελείς τζενέ μπορίνενα τι “αβέν χρήσιμοι ι Ντεβλέσκε”.

3. Σο βακερντάς ο Ελιού σαρέ οντουλένγκε σο κεράσα για τι υπηρετίνας ι Ιεχωβάς; Σο μανγκέλας τι βακερέλ;

³ Εκ τερνό μουρς σο βακερένας λέσκε Ελιού ασουνέλας σο κερένας λάφι ο Ιώβ ντα οντουλά τριν μουρσά. Όταν βον τελειωσάλε, ο Ελιού πουτσλάς τον Ιώβ ι Ιεχωβάσκε: «Άμα ισινάν μπαγιά δίκαιος, σο ντέσα λέστε ή σο λέλα τούταρ;» (Ιώβ 35:7) Μήπως ο Ελιού-ντα μανγκέλας τι βακερέλ ότι σινανέ προσπαθίνασα τι υπηρετίνας ι Ντεβλές; Όχι. Ο Ιεχωβά να διορθωντάς τον Ελιού, σαρ διορθωντάς ι γιαβερέ μουρσέν. Ο Ελιού μανγκέλας τι βακερέλ κάτι γιαβέρ. Βακερέλας ότι ο Ιεχωβά να τθερέλα-αμέν ανάγκη για τι ντας-λες λατρεία. Ο Ιεχωβά τθερέλα-λεν σαρέ. Ναστί κεράσα-λες πιο χουλανό ή πιο ζουρανό. Κι πραγματικότητα, σαρέ ο λατσσέ ιδιότητες ή ο ταλέντα σο τθεράσα ισί κατά Ντεβέλ, ντα βοβ ντικχέλα σαρ χρησιμοποιήνασα-λεν.

4. Σαρ νιωθίνελα ο Ιεχωβά όταν σικαβάσα λατσσιπέ κο γιαβερά;

⁴ Κι Ιεχωβάσκε γιακχά, όταν σικαβάσα λατσσιπέ οντουλέντε σο υπηρετίνενα-λες, ισί σαρ τι σικαβάσα-λες λέσκε. Κο εδάφιος Παροιμίες 19:17 διαβάνασα: «Οντουβά σο σικαβέλα λατσσιπέ οντουλέσκε σο νανέ σημαντικός ντέλα δανεικά κο Ιεχωβά, ντα Βοβ κα ευλογίνελ-λες οντουλένγκε σο κερντάς». Κάθε φορά σο σικαβάσα έλεος κο γιαβερά, ο Ιεχωβά ντικχέλα-αμέν. Ντα παρόλο σο κερντάς σαρό ο σύμπαν, τραμπίνελα τι ντικχέλ οντουλά σο κεράσα σαρ τι ντάσα δανεικά λέστε, ντα βοβ ξεχρεώνελα-λεν με μπουτ σουκάρ δώρα. Ανταβά βακερέλα-λες ι Ντεβλέσκο Τσσαβό-ντα, ο Ιησούς.—Διαβάνεν Λουκάς 14:13, 14.

5. Καλά ερωτήσεις κα ντικχάς ακανά;

⁵ Κο πουρανέ μπρεσά, ο Ιεχωβά μανγκλάς κατά προφήτης Ησαΐας τι βακερέλ ο λάφια Λέσκε ντα τι υπηρετίνελ-λες με εκ ειδικός τρόπος. (Ησαΐας 6:8-10) Ο Ησαΐας δεχτιντάς αντράλ πι γκίσταρ τι τζαλ ντα βακερντάς: «Ακατέ ισινόμ! Μπούτσσαβ-μαν». Αντιβές-ντα, ο Ιεχωβά ντέλα κο πιστά τζενέ ι ευκαιρία τι κερέν λέσκο έργος. Χιλιάδες τζενέ σο υπηρετίνενα ι Ιεχωβάς σκεφτίνενα αντικάς σαρ σκεφτίνελας ο Ησαΐας. Βον ισί έτοιμοι τι δεχτίνεν διορισμούς για τι υπηρετίνεν ι Ιεχωβάς με μπουτ διαφορετικούς τρόπους, μπουτέ τθεμέντε ντα με μπουτ δυσκολίες. Αλλά κάποιος μπορεί τι σκεφτίνελ: “Εκτιμίναβα ι ευκαιρία σο τθεράβα τι υπηρετίναβ ι Ιεχωβάς αντράλ μι γκίσταρ, αλλά οντουβά σο κεράβα με ισί άραγε σημαντικός; Να κα φροντίνελ ο Ιεχωβά τι αβέλ-πες λέσκο έργος είτε κα υπηρετίναβ-λες είτε να κα υπηρετίναβ-λες;” Νιωσάλεν ποτές αντικάς; Για τι ντικχάς σαρ μπορίνενα τι βοηθίνεν-αμέν τι απαντίνας ανταλέ ερωτησιέντε οντουλά σο αβιλέ-πες κο ντιβεσά της Δεββώρας ντα του Βαράκ, σο υπηρετίνενας ι Ιεχωβάς κο πουρανέ μπρεσά.

6. Σόσκε ντικχίντιβελας εύκολος για το στρατός του Ιαβίν τι νικίνελ ι Ισραηλιτέν;

⁶ Ο Βαράκ ισινέ Ισραηλίτης πολεμιστής ντα η Δεββώρα ισινέ προφήτισσα. Για περίπου 20 μπρεσά, εκ Χαναναίος βασιλιάς, ο Ιαβίν, “ταλαιπωρίνελας μπουτ” ι Ισραηλιτέν. Ο στρατός του Ιαβίν ισινέ αζόμ άγριος σο ο Ισραηλίτες σο τζουβντιόνας κο γκαβά νταρένας ατζέ-ντα τι νικιόν πουμαρέ κχερένταρ. Ο στρατός του Ιαβίν τθερέλας 900 πολεμικές άμαξες με σιδερένια δρεπάνια, αλλά ο Ισραηλίτες να τθερένας λατσσέ όπλα για τι πολεμίνεν ούτε πανοπλίες για τι αρακχαβέν-πες.—Κριτές 4:1-3, 13· 5:6-8. * (Ντικχ ι υποσημείωση.)

7, 8. (α) Καλά ισινέ ο πρώτες οδηγίες σο ντινάς ο Ιεχωβά κο Βαράκ; (β) Σαρ ο Ισραήλ νικιντάς ο στρατός του Ιαβίν; (Ντικχ ι φωτογραφία σο ισί κι αρχή.)

⁷ Ανγκλάλ κο στρατός του Ιαβίν, ο Ισραηλίτες ντικχίντιβελας ότι να τθερένας δύναμη ντα ότι κα χασαρένας εύκολα. Αλλά ο Ιεχωβά τσσουντάς την προφήτισσα Δεββώρα τι ντελ κο Βαράκ ακαγιά εντολή: «Τζα κο Βες Θαβώρ ντα ετοίμανε-τουτ για τζένγκι, ντα λε τούσαρ 10.000 τζενέν κατά Νεφθαλί ντα κατά Ζαβουλών. Με κα κεράβ τον Σισάρα, σο ισί ο αρχηγός κο στρατός του Ιαβίν, ντα λέσκε πολεμικές άμαξες ντα λέσκε στρατιωτέν τι αβέν πασέ τούτε κι λεν Κισών, ντα κα νταβ-λες τι βαστέστε».—Κριτές 4:4-7.

⁸ Ο τζενέ λιντέ αμπέρι ότι ρόντενας τζενένγκε σο κα μανγκένας αντράλ πουμαρέ γκίσταρ τι πολεμίνεν, ντα γκιντισάλε 10.000 μουρσά κο Βες Θαβώρ. Σοράν, ο Βαράκ ντα ο μουρσά σο ισινέ λέσαρ πολεμιντέ πουμαρέ ντουσμανίν εκχέ τθανέστε σο βακέρντιβελας Θαανάχ. (Διαβάνεν Κριτές 4:14-16) Βοηθιντάς ο Ιεχωβά ι Ισραηλιτέν; Βα. Ξαφνικά ντινάς μπουτ μπρισίμ ντα ο σουκό τθαν σο αβέλας ο τζένγκι πφερντιλό τσικ. Ανταβά βοηθιντάς μπουτ ι Ισραηλιτέν. Ο Βαράκ κουλαντιντάς ο στρατός του Σισάρα για 24 χιλιόμετρα, μέχρι σο ερεσλέ εκχέ τθανέστε σο βακέρντιβελας Αρωσέθ. Σε εκ σημείος, η πολεμική άμαξα του Σισάρα κολλισάλι κι τσικ. Βοβ μουκχλάς ι άμαξα ντα τθαβντισάλο κι Σαανανίμ, σο μπορεί τι ισινέ πασέ κι Κέδες. Οτθέ ο Σισάρα τσσουντάς-πες αντρέ κο τσαντίρι εκχέ τζουβλιάκο, της Ιαήλ, για τι γκεραβέλ-πες. Ισινέ μπουτ κχινό ντα αμέσως σοτάς. Σαρ σοβέλας ο Σισάρα, η Ιαήλ λιντάς θάρρος ντα μουνταρντάς-λες. (Κριτές 4:17-21) Ο Ιεχωβά βοηθιντάς ι Ισραηλιτέν τι νικίνεν πουμαρέ ντουσμανίν! * (Ντικχ ι υποσημείωση.)

9. Σο σικλιάσα κατά εδάφια Κριτές 5:20, 21 ι τζενγκίσκε σο κερντέ ο Ισραηλίτες με τον Σισάρα;

⁹ Σικλιάσα πιο μπουτ πράγματα οντουλένγκε σο αβιλέ-πες κο κεφάλαιος 4 κατά βιβλίος Κριτές άμα κα διαβάνας ο γιαβέρ κεφάλαιος. Ο εδάφια Κριτές 5:20, 21 βακερένα αμένγκε: «Κατά ουρανός πολεμιντέ ο τσεργανιά· πουμαρέ θεσιάταρ πολεμιντέ τον Σισάρα. Η λεν Κισών λιντάς-λεν». Μήπως ανταβά μανγκέλα τι βακερέλ ότι ο άγγελοι βοηθιντέ ι Ισραηλιτέν οντουλέ τζενγκίστε ή ότι περένας μπουτ μπαρά κατά ουρανός; Η Γραφή να βακερέλα. Αλλά ισί λογικός τι σκεφτίνας ότι ο Ιεχωβά σωντάς πι λαός όταν κερντάς τι ντελ  μπουτ μπρισίμ κο σωστός τθαν ντα κο σωστός σαάτι, για μα τι κουνιάντιβεν εύκολα ο 900 πολεμικές άμαξες. Τριν φαρ κο εδάφια Κριτές 4:14, 15, η δόξα για τη νίκη του Ισραήλ ντιντιλί κο Ιεχωβά. Καέκ κατά 10.000 Ισραηλίτες σο γκιλέ τι πολεμίνεν αντράλ πουμαρέ γκίσταρ να κα μπορίνελας τι λελ ι δόξα για τη νίκη σο λιντάς ο Ισραήλ.

10, 11. Σο ισινέ η «Μηρώζ»; Σόσκε ντινέ-λα αρμανιά;

¹⁰ Κα ντικχάς ακανά κάτι σο τθερέλα μπουτ ενδιαφέρον. Αφού νικιντέ ο Ισραηλίτες, η Δεββώρα ντα ο Βαράκ βακερντέ ακαβά ύμνος κο Ιεχωβά: «“Ντεν αρμανιά κι Μηρώζ”, βακερντάς ο άγγελος ι Ιεχωβάσκο, “τι ντεν αρμανιά οντουλέν σο μπεσένα λάτε, σόσκε να γκιλέ τι βοηθίνεν ι Ιεχωβάς, τι βοηθίνεν ι Ιεχωβάς ι ζουρανέ τζενέντζαρ”».—Κριτές 5:23.

¹¹ Σο ισινέ η Μηρώζ; Να ισινάμ σίγουροι. Αλλά ο αρμανιά σο ντινέ κι Μηρώζ ασταρντέ ντα να ατσσιλό τίποτα λάταρ. Η Μηρώζ κα μπορίνελας τι αβέλ εκ πόλη σο να γκιλέ τι πολεμίνεν μαζί με τον Βαράκ ο τζενέ σο μπεσένας οτθέ. Αφού 10.000 τζενέ γκιλέ τι πολεμίνεν ι Χαναναιόν, ο τζενέ σο μπεσένας κι Μηρώζ μάλλον λιντέας αμπέρι ότι ρόντενας τζενένγκε σο κα μανγκένας αντράλ πουμαρέ γκίσταρ τι πολεμίνεν. Ή η Μηρώζ κα μπορίνελας τι αβέλ εκ πόλη σο νακχλό οτθάρ ο Σισάρα κάνα προσπαθίνελας τι γλιτώνελ κατά Βαράκ. Μπορεί ο τζενέ σο μπεσένας κι Μηρώζ τι τθερένας ι ευκαιρία τι ασταρέν τον Σισάρα, αλλά μα τι κερντέ-λες. Σκεφτίνεν-λεν τι ντικχέν οντουλέ μπουτ ζουρανέ πολεμιστής τι τθάβντελ λένγκε ντρομέντε για τι σώντιβελ! Κα μπορίνενας τι κερέν κάτι σημαντικός για τι υποστηρίνεν ο σκοπός ι Ιεχωβάσκο. Άμα κα κερένας-λες ανταβά, βοβ κα ευλογίνελας-λεν. Αλλά όταν τθερένας ι ευκαιρία τι κερέν κάτι ι Ιεχωβάσκε, βον να κερντέ τίποτα. Ντικχίντιβελα ότι ο τζενέ σο μπεσένας κι Μηρώζ ισινέ μπουτ διαφορετικοί κατά Ιαήλ, σο υποστηριντάς με θάρρος ι Ιεχωβάς.—Κριτές 5:24-27.

12. Κο εδάφια Κριτές 5:9, 10, καγιά διαφορά ντικχάσα κο τρόπος σο σκεφτίνενας ο τζενέ; Σαρ πρέπει τι επηρεάνελ-αμέν ανταβά;

¹² Κο εδάφια Κριτές 5:9, 10, ντικχάσα ότι ο 10.000 τζενέ σο γκιλέ αντράλ πουμαρέ γκίσταρ τι πολεμίνεν σκεφτίνενας μπουτ διαφορετικά οντουλένταρ σο να γκιλέ. Η Δεββώρα ντα ο Βαράκ ισαρντέ οντουλέν «σο κερένας κουμάντος κο Ισραήλ, σο γκιλέ τι πολεμίνεν αντράλ πουμαρέ γκίσταρ γιεκ ι λαόσαρ». Καζόμ διαφορετικοί ισινέας οντουλένταρ σο “ισινέ οπράλ κο χχερά”, σο αμντίνενας ότι ισινέ μπουτ σημαντικοί για τι τζαν τι πολεμίνεν! Οντουλά τζενέ βακέρντιβελα ότι “μπεσένας οπράλ λατσσέ χαλίντε” ντα “πφιρένας κο ντρομ”, επειδή τθερένας εκ λατσσί ζωή. Οκιά μπάνταρ, ο τζενέ σο ισινέ με τον Βαράκ γκιλέ αντράλ πουμαρέ γκίσταρ τι πολεμίνεν κο βεσά ντα κι τσικαλί κοιλάδα του Κισών. Ο τζενέ σο μανγκένας εκ εύκολη ζωή έπρεπε τι “σκεφτίνεν”! Έπρεπε τι ντεν προσοχή ντα τι ανέν πουμαρέ γκοντιάτε σαρέ ο ευκαιρίες σο χασαρντέ για τι υπηρετίνεν ι Ιεχωβάς αντράλ πουμαρέ γκίσταρ. Αντιβές, πρέπει αμέν-ντα τι ντικχάς σαρ υπηρετίνασα ι Ντεβλές.

13. Σαρ ισινέ διαφορετικός ο τρόπος σο σκεφτίνενας ο φυλές του Ρουβήν, του Δαν ντα του Ασήρ κατά τρόπος σο σκεφτίνενας ο φυλές του Ζαβουλών ντα του Νεφθαλί;

¹³ Ο 10.000 τζενέ σο γκιλέ αντράλ πουμαρέ γκίσταρ τι πολεμίνεν τθερένας ι ευκαιρία τι ντικχέν πουμαρέ γιακχίντζαρ ο πράγματα σο κερέλα ο Ιεχωβά για τι υποστηρίνελ πι κυριαρχία, δηλαδή ο δικαίωμας σο τθερέλα τι κυβερνίνελ. Μπορίνενας τι βακερέν-λες ανταβά κο γιαβερά όταν κερένας  λάφι «ι δίκαιε πραγματένγκε σο κερντάς ο Ιεχωβά». (Κριτές 5:11) Οκιά μπάνταρ, ο φυλές του Ρουβήν, του Δαν ντα του Ασήρ σκεφτίνενας πιο μπουτ πουμαρό χουλανιπέ, σαρ ισί ο μπρακέ, ο καράβια ντα ο λιμάνια σο τθερένας, ντα όχι οντουλά σο κερένας βον ι Ιεχωβάσκε. (Κριτές 5:15-17) Όμως, να ισινέ αντικάς σαρέ ο φυλές. Ο φυλές του Ζαβουλών ντα του Νεφθαλί “τσσουντέ σε κίνδυνος πουμαρί ζωή” για τι υποστηρίνεν τη Δεββώρα ντα τον Βαράκ. (Κριτές 5:18) Μπορίνασα τι λας εκ μπουτ σημαντικός μάθημας κατά διαφορετικός τρόπος σο σκεφτίνενας οντουλά σο μανγκένας τι υπηρετίνεν αντράλ πουμαρέ γκίσταρ οντουλένταρ σο να μανγκένας.

14. Σαρ σικαβάσα αμαρέ ντιβεσέντε ότι υποστηρίνασα ι Ιεχωβάσκι κυριαρχία;

¹⁴ Αμαρέ ντιβεσέντε, αμέν να πολεμίνασα για τι υποστηρίνας ι Ιεχωβάσκι κυριαρχία. Αλλά υποστηρίνασα-λες όταν με θάρρος κεράσα λάφι λέσκε κο γιαβερά αντράλ αμαρέ γκίσταρ. Ακανά, πιο μπουτ από ποτές, χρειαζίντιβενα τζενέ σο κερένα ο έργος ι Ιεχωβάσκο αντράλ πουμαρέ γκίσταρ. Εκατομμύρια πφραλά, πφενιά ντα τερνέ υπηρετίνενα ι Ντεβλές αντράλ πουμαρέ γκίσταρ με μπουτ διαφορετικούς τρόπους κι ολοχρόνια υπηρεσία. Για παράδειγμας, μπουτ πφραλά κερένα ο σκαπανικός, ισί κο Μπέθελ, χτίνενα Αίθουσες Βασιλείας ντα βοηθίνενα για τι αβέν-πες ο συνελεύσεις. Μερικοί πρεσβύτεροι υπηρετίνενα σκληρά κο Επιτροπές Προσέγγισης Νοσοκομείων ντα για τι οργανώνεν ο συνελεύσεις. Μπορίνασα τι αβάς σίγουροι ότι ο Ιεχωβά εκτιμίνελα ο προσπάθειες σο κεράσα τι υπηρετίνας-λες αντράλ αμαρέ γκίσταρ σαρ-ντα τι χρειαζίντιβελ, ντα ποτές να κα μπιστρέλ-λεν.—Εβραίους 6:10.

15. Σαρ μπορίνασα τι αβάς σίγουροι ότι να χασαρντάμ αμαρό ενθουσιασμός για το έργος ι Ιεχωβάσκο;

¹⁵ Πρέπει τι σκεφτίνας άμα υπηρετίνασα ι Ιεχωβάς αντράλ αμαρέ γκίσταρ. Μπορίνασα τι πουτσάς αμαρό νεαυτός: “Μήπως  μουκχάβα ι γιαβερέν τι κερέν ι πιο μπουτ μπουτί; Μήπως σκεφτίναβα πρώτα σαρ κα νικαβάβ πιο μπουτ λοβέ ντα όχι σαρ κα υπηρετίναβ ι Ιεχωβάς; Ή τθεράβα αζόμ πίστη ντα θάρρος καζόμ τθερέλας ο Βαράκ, η Δεββώρα, η Ιαήλ ντα ο 10.000 γιαβερά τζενέ, ντα χρησιμοποιήναβα σαρέ ο πράγματα σο τθεράβα για τι υπηρετίναβ ι Ιεχωβάς; Μήπως σκεφτίναβα τι τζαβ σε εκ γιαβέρ πόλη ή εκχέ γιαβερέ τθεμέστε για τι νικαβάβ πιο μπουτ λοβέ ντα τι τθεράβ εκ πιο λατσσί ζωή; Άμα σκεφτίναβα-λες ανταβά, κεράβα προσευχή κο Ιεχωβά για τι αγαβάβ σαρ κα επηρεάνελ ανταβά μι φαμιλί ντα μι εκκλησία;” * (Ντικχ ι υποσημείωση.)

16. Παρόλο σο ο Ιεχωβά τθερέλα-λεν σαρέ, σο μπορίνασα τι ντας-λες;

¹⁶ Ο Ιεχωβά ντέλα-αμέν ο μπουτ μπαρό προνόμιος τι υποστηρίνας λέσκι κυριαρχία. Από αζομάν σο τζουβντιόλας ο Αδάμ ντα η Εύα μέχρι αμαρέ ντιβεσέντε, ο Μπενγκ μανγκέλα τι τσσίντεν λέσταρ ο τζενέ ντα τι τζαν κόντρα κο Ιεχωβά. Αλλά όταν υποστηρίνασα ι κυριαρχία ι Ιεχωβάσκι, σικαβάσα ξεκάθαρα κο Μπενγκ κάσταρ τσσίντασα. Αμαρί πίστη ντα αμαρί αγάπη ι Ιεχωβάσκε κερένα-αμέν τι υπηρετίνας-λες αντράλ αμαρέ γκίσταρ, ντα ανταβά ανέλα λέσκε μπουτ μπαρί χαρά. (Παροιμίες 23:15, 16) Όταν υποστηρίνασα πιστά ι Ντεβλές ντα ασουνάσα-λες, Βοβ μπορίνελα τι απαντίνελ κο Μπενγκ σο πρασάλα-λες. (Παροιμίες 27:11) Άρα, η αγάπη ντα η υποστήριξη σο μπορίνασα τι ντας κο Ιεχωβά τθερένα μπαρί αξία λέσκε ντα κερένα-λες χαρούμενος.

17. Σο σικλιαρέλα-αμέν ο εδάφιος Κριτές 5:31 οντουλέσκε σο κα αβέλ-πες ανγκλ’ αμέντε;

¹⁷ Ατζεχάνικ, σαρέ ο τζενέ κι πφουβ κα μανγκέν σάντε ι κυριαρχία ι Ιεχωβάσκι, καεκχέ γιαβερέσκι. Καζόμ μπουτ μανγκάσα τι αβέλ οντουβά ντιβές! Νιωθίνασα σαρ η Δεββώρα ντα ο Βαράκ, σο γκιλιαντέ: «Τι καταστραφίντιβεν σαρέ το ντουσμάνια, Ιεχωβά, αλλά οντουλά σο μανγκένα-τουτ τι αβέν σαρ ο κχαμ σο νικιόλα με δόξα». (Κριτές 5:31) Ανταβά κα αβέλ-πες όταν ο Ιεχωβά κα τσσουβέλ τέλος κο πφιρνό ντουνιάς κι Μπενγκέσκο. Όταν κα αρχίνελ ο Αρμαγεδδώνας, ο τζένγκι σο κα κερέλ ο Ιεχωβά για τι καταστραφίνελ πι ντουσμανίν, να κα χρειαζίντιβελ τζενέν τι βοηθίνεν-λες. Αμέν “κα λας αμαρί θέση ντα κα ντικχάς σαρ κα σώνελ-αμέν ο Ιεχωβά”. (2 Χρονικών 20:17) Μέχρι τι αβέλ-πες ανταβά, όμως, τθεράσα μπουτ λατσσέ ευκαιρίες για τι υποστηρίνας με θάρρος ντα αντράλ αμαρέ γκίσταρ ι Ιεχωβάσκι κυριαρχία.

18. Σαρ μπορίνενα τι βοηθίντιβεν γιαβερά τζενέ όταν υπηρετίνενα ι Ιεχωβάς αντράλ τουμαρέ γκίσταρ;

¹⁸ Ο ύμνος σο βακερντάς η Δεββώρα ντα ο Βαράκ αφού νικιντέ αρχισάλο λαφίντζαρ σο ντένας δόξα κο Ιεχωβά, ντα όχι τζενέντε. Βον γκιλιαντέ: «Επειδή ο λαός ντινάς πο νεαυτός αντράλ πι γκίσταρ, ντεν δόξα κο Ιεχωβά!» (Κριτές 5:1, 2) Αντικάς αμέν-ντα, άμα υπηρετίνασα ι Ιεχωβάς σαρ-ντα τι χρειαζίντιβελ, μπορεί γιαβερά-ντα τζενέ τι ενθαρρύντιβεν τι “ντεν δόξα κο Ιεχωβά!”