ΣΟΣΚΕ ΙΣΙ ΣΗΜΑΝΤΙΚΟΣ: Σόσκε κα αβέλας λατσσό τι κεράς έργος κατά τηλέφωνος; Επειδή ανταβά έργος ισί ατζέκ εκ τρόπος για τι βοηθίνας γιαβερέν τι σικλιόν ντιπ ι αλήθεια για τι σώντιβεν. (2Πε 3:9) Παρόλο σο ο έργος κχερ κχερέστε ισί ο πιο σημαντικός για τι βακεράς ο λατσσέ αμπέρια ι Ντεβλέσκε Βασιλειάκε, κερέσα έργος γιαβερέ τροπόντζαρ-ντα για τι αρακχάς ι τζενέν σο να αρακχάσα κο κχερά.​—Ματ 24:​14· Λου 10:​1-7· Απ 14:6.

ΣΟ ΤΙ ΚΕΡΕΝ:

• Κάνα κεράσα έργος κατά τηλέφωνος, ισί λατσσό τι μουκχάς ι τζενές σο λιντάμ τι κερέλ λάφι βοβ-ντα.

• Μερικά πφραλά σο αρχίνενα ακανά τι κερέν κάτι ασακό, μπορίνενα τι διαβάνεν ι παρουσίαση κο τζενό, αλλά μα τι κερέν λάφι σάντε βον. Ο ιδέες σο ισί κο φυλλάδιος Μαγκένα τι Σικλιόν Ι Αλήθεια; μπορίνελα τι βοηθίνελ-τουμέν ανταλέ εργόστε.

• Κάνα προετοιμάνενα ο λάφια σο κα βακερέν, τι αρακχέν ο θέμας ντα εκ ερώτηση ντα τι αβέν έτοιμοι τι βακερέν μερικά εδάφια σο ντένα ι απάντηση.

• Κα μπορίνενας τι ντεν ο ίδια έντυπα σο ντάσα κο έργος κχερ κχερέστε.

ΚΕΡΕΝ ΑΚΑΒΑ

Τι τθερέν τουμαρέ γκοντιάτε ακαλά πράγματα: Τι αβέν ήρεμοι ντα μα τι κερέν λάφι μπουτ σουγκό. Τι κερέν λάφι λατσσιμάσαρ, τι τθερέν υπομονή ντα τι αβέν φιλικοί αφού ανταλά πράγματα αγαντίντιβενα κατά τηλέφωνος. Τι ασουνέν καζόμ ο τζενό βακερέλα οντουλά σο τθερέλα πι γκοντιάτε, σοράν τι ισαρέν-λες ντα τι σικαβέν ότι εκτιμίνενα λέσκε λάφια. Τι τθερέν τουμαρί γκοντί μα τι βακερέν κο τζενό ότι μπορίνελα τι ντελ λοβέ, σόσκε μπορεί τι αμντίνελ ότι λιντάμ-λες τηλέφωνος για τι γκίντας λοβέ σαρ κερένα μπουτ φαρ γιαβερά τζενέ.