E Biblia del amen iek shukar viasta, phenel ke shai trais pe Phuv o traio kai chi mai getolpe (Mate 5:5). E Biblia si la 66 klishki tsinorhe, ai o Del alosardias uni 40 mursh ke sas chachimasa lesa te ramon la. Le 5 pervo klishki ramosardias len o Moises de 3.500 borsh palpale ai o apostol Iovano e paluni klishka de mai but de 1.900 borsh palpale. Le divanuria kai si ande Biblia aven katar o Del, vo ningerdias sa godolen manushen peske suntone dujosa (2 Samuel 23:2). Godola mursh thode le ginduria le Devleske ai na penge ginduria. Anda godia, o Jehova si kon kerdias e Biblia. Chito 2 Timote 3:16; 2 Petri 1:20, 21.

 E Biblia avel katar o Del. Zhanas mishto godo, ke phenel chachimasa so si te avel mai angle, vareso kai le manush nashtin te phenen (Josué 23:14). Ferdi o Del putiarako shai kerel godo. Chito Titos 1:2, 3.

 Te avela ke iek klishka avel katar o Del shai azhukeras ke so mothol si desia baro. Ai e Biblia gadia si. Dinepe millonuria Bibli ande but shiba ai makar purai la del duma chachimasa kana mothol pa e Phuv, o cheri ai sa so si pe lende. Aver prama si ke le 40 mursh kai ramosarde la dine duma sa pa iek gindo. Ande suako patrin katar e Biblia sikavelpe o kamlimos le Devlesko, ai vi agies si la e putiaria te parhuvel o traio le manushengo. Pala sa kako, millonuria manush zhanen chachimasa ke e Biblia si e Vorba le Devleski. Chito 1 Thesaloniana 2:13.

 Dikh o video: Sostar shai pakias ke e Biblia mothol o chachimos?

 Sa e Biblia del duma pa gadala shukar viesti: o Del si te anel lashe giesa mai angle le manushenge. Mothol ke de anda o gor la lumiako le manush jasarde iek shukar traio ando paraiso pe Phuv, ai so si te kerel o Del te avel e lumia pale iek paraiso. Chito Sicharimos (Apokalipsos) 21:4, 5.

 Ande Vorba le Devleski si zakonuria ai suaturia kai azhutin amen. Phenel amenge sar sas o Del le manushentsa, ai godo sikavel amenge ke fialo si vo. Pala godia e Biblia azhutil amen te prinzharas les ai sikavel amen sar shai pashuvas leste. Chito Romanuria 15:4; Iakov 2:23; 4:8.

 Te shai aliaren mishto le manush so kamelas te mothol o Suato le Devlesko, o Jesus sikavelas anda uni verseturia. Kacha publikasion kerel sa gadia te azhutil amen te aliaras mishto so sikavel e Biblia. Chito Luk 24:27, 45.

 Nai khanchi mai shukar de sar le lashe viesti kai aven katar o Del. Numa uni manush chi kamen te ashunen len, ai avrenge perel pharo te ashunen godo divano. Na mek te peraven tu godola manush, ke numa te mai zhanes le Devles shai les o traio kai chi mai getol. Chito Iovano 5:24.