E Biblia chi sikavel amen ke trobus te rhugis kal suechuria. Trobus te rhugis numa ka o Del ai mashkar o Jesus. O Jesus phendias ka peske disipluria “Tumen rhugin tumen gadia: amaro Dat, kai san ando rhaio, te avel suntsome kiro anau” (Mateo 6:9, Biblia de América [BA]). O Jesus chi phendias ke amaro rhugimos trobul te zhal ka iek angel, iek suecho vai varekon ke nai o Del.

 Vi phendias o Jesus: “Me sim o drom, o chachimos ai o traio. Khonik nashtil te aresel ka o Dat, numa te na nakhela mandar” (Juan 14:6, BA) Numa ka o Jesus si e voia te avel mashkar o Del ai amen (Hebreos 7:25, La Biblia. Traducción del Nuevo Mundo).

Shai rhugis amen ka o Del ai vi kal suechuria?

 Ande iek katar le desh zakonuria, o Del phendias: “Me, o Gazda, cho Del, sim iek Del kai mangau te luvudis man numa man” (Éxodo 20:5, BA) So kamel te phenel te luvudis les numa les? Iek nota anda e Biblia de América phenel pa kako verseto: “Numa Vo si Del, chi iek suecho shai avel ande lesko than”. O Del mangel te luvudis les numa les, ai o rhugimos si vareso kai keras te luvudis les (Isaías 48:11).

 Te rhugisa ka iek suecho, ka iek angel vai varekas kai nai o Del, vo si te aliarelpe dukhado. Ando libro Apocalipsis phenel ke kana o apostol Iovano thodiaspe ande changende te luvudil ka iek angel, kako angel phendias leske: “Na ker gadia, ke me kerau buki le Devleske tusa ai che phralentsa, godola kai inkerdion chachimasa te den duma pa o Jesus. Numa le Devles trobus te luvudis” (Apocalipsis 19:10, BA).