Иоано 2:1-25
2 Через дуй дес андо галилейско форо Ка́на жалас ябьяв, и котэ сас лэ Исусостири дэй.
2 Интя кадяжэ ақардэ лэ Исусос и лэстирэ учениконэн.
3 По ябьяв почти на ашэляпэ о вино, и лэ Исусостири дэй ԥэндя лэсти: «Лэндэ нинай вино».
4 О Исусо ԥэндя лати: «Манушни, хэба када амари дила?* Мэрни время инке на авеля».
5 Тоди лэстири дэй ԥэндя лэ слуӷонэнди: «Терэн вся, со во тумэнди ԥэнэна».
6 Ай котэ тердёнас шов барунэ кувшыноря важ о паи, сар када терэласпэ па иудейско законо важ о вужымос. Кажно кувшыно вместияс дуй или трин меры*.
7 О Исусо ԥэндя лэ слуӷонэнди: «Ԥэрэн кувшыноря паеса», и вонэ шутэ паи жы упрал.
8 Тоди во ԥэндя лэнди: «Акана лэн набут и андярэн кодэлэсти, ко диқэл пала ябьяв», и вонэ стердэ када.
9 Кала о мануш, саво диқэлас пала ябьяв, зумадя о паи, саво ашэля вино (ай во на ӷанэнас, катар о вино, када ӷанэнас ек и слуӷоря, савэ шонас паи), во ақардя лэ тэрнэс
10 и ԥэндя лэсти: «Спэрва всаворэ подэн лэ ӷостёнэнди лашо вино, ай кала вонэ подматёна, — ужэ най кацаво дэ лашо. Ту жэ о лашо вино пригарадян со май интя».
11 Кадя андо галилейско форо Ка́на о Исусо стердя пэстири пэрво чуда. Во сыкадя, саво лэстэ исин зор, и лэстирэ ученикоря патяе андэр лэстэ.
12 Посли када во вместе ла даса, лэ ԥралэнца и лэ учениконэнца жыля андо Капернау́мо. Вонэ заритярделэ котэ найпэдолӷонэстэ.
13 Пашолас и иудейско Патради, и о Исусо жыля андо Иерусалимо.
14 Андэ қандири во додиқля лэ манушэн, савэ бэшэнас пала столоря и парувэнас и ловэ, ай кадяжэ кодэлэн, ко битинэлас лэ гурувэн, лэ бакрэн и лэ ӷолубонэн.
15 Тоди во стердя анда дуря чукни и видарадя анда қандири лэ торӷовцонэн вместе лэ бакрэнца и лэ гурувэнца. Во росшутя и манеты кодэлэндирэ, ко парувэлас и ловэ, и пэрэшутя лэндирэ столоря,
16 ай кодэлэнди, ко битинэлас лэ ӷолубонэн, ԥэндя: «Вилэн када катар! На́ терэн базаро анда мэрнэ Дадэско цэр!»
17 И лэстирэ учениконэнди дя по гиндо, кай сас пистромэ: «Мэрно ди глаба* пала тиро цэр».
18 Тоди и иудеёря пушлэ лэстар: «Сар ту доԥэнэса* амэнди, кай тутэ исин право кадя тэ терэс?»
19 О Исусо ԥэндя лэнди: «Розмарэн кадэя қандири, и мэ важ трин дес ваздава ла упалэ».
20 Пэ када и иудеёря ԥэндэ: «Кадэя қандири строинас 46 лет, ай ту ваздэса ла важ трин дес?»
21 Но во, кала дэлас дума пала қандири, камля тэ ԥэнэн пала пэстири тила.
22 И кала о Исусо жунделя, лэ учениконэнди авелэ по гиндо лэстирэ алава и вонэ патяе кодэлэсти, со пистромэ андэ Свынти Лила, и кодэлэсти, со во ԥэнэнас.
23 Кала о Исусо сас андо Иерусалимо по празнико Патради, бут мануша диқлэ и чудеса, савэ во терэлас, и патяе андэр лэстэ*.
24 Но о Исусо на допатялас лэнди андэ вся, важ кода кай ӷанэнас лэн всаворэн.
25 Лэсти на трэбуй сас, кай пала варикастэ лэсти варисо тэ росԥэнэн, важ кода кай во диқэлас, со кажнонэстэ андо ди.
Сноски
^ Ворта «Манушни, со манди и тути?». Кадя ԥэнэнас, кала варико сас несоӷласно. О алав «манушни» на сыкавэл, кай о Исусо взвисайля найпативалэс.
^ Или «мэ хваткаса цырдавпэ».
^ Или «сави чуда ту стерэса, кай тэ доԥэнэс».
^ Ворта «андэ лэско алав».
