Марко 6:1-56
6 О Исусо ужыля котар и авеля пэ пэстирэ краёря. Лэса ԥирэнас лэстирэ ученикоря.
2 Кала поджыля и субота, во ля тэ сытярэл андэ синагога, и бут анда кодэла, ко лэс ашунэлас, удивинаспэ и ԥэнэнас: «Катар во вся када ӷанэн? Ко дя лэсти кацаво годявэрнимос и зор тэ терэл кацавэ чудеса?»
3 Хэба во най мастеро по каш*? Хэба лэстири дэй най и Мария, ай лэстирэ ԥрала най о Иа́ково, о Ёсифо, о Иу́да и о Си́мано? И хэба лэстирэ ԥэя на жувэн катэ, машкар амэндэ?» И вонэ на патяе андэр лэстэ.
4 О Исусо ԥэндя лэнди: «Лэ Дэвлэстирэ особонэ манушэса вся и время обжанпэ пативаса — кати най пэ лэстирэ краёря, най машкар о родо и най лэстэ андо цэр».
5 И во на стердя котэ нисавэ чудеса, кати стодя и вас пэ дэсавэ насвалэ и исцэлисардя лэн.
6 Во фартэ удивисайля кодэлэстар, кай вонэ на патянас. Потом во жыля андэ пашутнэ гавора и сытярэлас котэ лэ манушэн.
7 О Исусо ақардя каринг пэстэ лэ 12 учениконэн и ля тэ бишалэл лэн по дуй, во дя лэнди право тэ хулаин пэ найвужэ.
8 Во приԥэндя лэнди тэ лэн пэса андо дром кати и рувли и тэ на лэн ни марно, ни сумка, ни тышыла*.
9 Во ԥэндя лэнди тэ лэн и сандали, но тэ на лэн пэса и запасно ӥда.
10 Потом во ԥэндя: «Каринг* тумэ тэ на зажан, ашэнпэ котэ, пока на ужана па кодэла краёря.
11 Ай если варикай и мануша тумэн на прилэна и на лэна тумэн тэ ашунэн, тоди, кала лэна тэ ужан, оптинон о прахо па пэстирэ пэрнэ. Кадя тумэ сыкавэна, кай динэ лэнди тэ ӷанэн пала када».
12 И апосталоря жылэ и линэ тэ росԥэнэн важ о Дэл, кай и мануша тэ каинпэ.
13 Вонэ видарадэ бутэ найвужэн, ай кадяжэ мақлэ вулееса бутэ насвалэн и исцэлисардэ лэн.
14 Пала када уӷангля о царё И́радо*, важ кода кай лэ Исусоско алав фартэ ашундёлас. Сас кодэла, ко ԥэнэнас: «Када жунделя о Иоа́но Крестителё — акэ васо во можэт тэ терэл кацавэ чудеса».
15 Авэр ԥэнэнас: «Када о Илья». Ай инке дэсавэ ԥэнэнас: «Када лэ Дэвлэско особо мануш, кацаво жэ, сар лэ Дэвлэстирэ особи мануша андэ дэлмутни время».
16 Кала о И́радо када ашундя, во ԥэндя: «Када жунделя о Иоа́но, савэсти мэ отшындэм о шэро».
17 Жы каринг када о И́радо приԥэндя тэ хутилэн лэ Иоанос. Во шутя пэр лэстэ цэпоря и стодя андо баруно через и Ирадиа́да, через лэстирэ ԥралэстири лэ Филипостири хулаи, пэ сави во жэнисайля.
18 Ай о Иоа́но най еқвар ԥэнэнас лэсти: «Па законо тирэ ԥралэстири хулаи не можэт тэ авэл тути хулаи».
19 И Ирадиа́да ритярэлас холи по Иоа́но и камэлас лэс тэ умарэл, но латэ на вижалас,
20 важ кода кай о И́радо даралас лэ Иоаностар: во ӷанэнас, кай о Иоа́но — правильно и свынто мануш, и фэрияс лэс. Лэ Ирадости чалёлас тэ ашунэл лэ Иоанос, хоть через лэстирэ алава лэ Ирадос шолас андэ дар и во на ӷанэнас, со тэ терэл.
21 И акэ важ и Ирадиа́да попэрделя лашо маменто. Кала кай о И́радо сас день раждения, во стодя вечером мисяйля важ и барвалэ мануша, важ и барэ халавдэ и важ и ашунглэ мануша анда Галиле́я.
22 Ла Ирадиадатири щей авеля и вижыля тэ цэлэл лэ Ирадости и лэ ӷостёнэнди. Лэнди када фартэ чалеля, и о царё ԥэндя ла щати: «Манг со камэс, и мэ дава тути када».
23 Во солахадя лати: «Мэ дава тути вся, со мангэса, дажэ отдава епаш мэрно царство».
24 Вой вижыля и пушля кай пэстири дэй: «Со мэ тэ мангав?» Латири дэй ԥэндя: «Лэ Иоаноско лэ Крестителёско шэро».
25 И щей прастая каринг о царё и мангля: «Мэ камав, кай ту ворта щас тэ дэс манди по тэляри лэ Иоаноско лэ Крестителёско шэро».
26 Лэ царёсти ашэля по ди фартэ неприятно, но во не моӷ лати тэ отԥэнэн, важ кода кай солахадя англа ӷостёря.
27 Кочай во сразу бишалдя пэстирэ охраникос и приԥэндя лэсти тэ анэн лэ Иоаноско шэро. Кодэва мануш жыля андо бар, отшындя лэ Иоаности о шэро,
28 андя лэс по тэляри и дя ла щати, ай вой отдя пэстиря дати.
29 Кала лэ Иоаностирэ ученикоря ашундэ пала када, вонэ авелэ, залинэ лэстири тила и притидэ*.
30 И апосталоря рисайлэ каринг о Исусо и росԥэндэ лэсти пала вся, со вонэ терэнас и сости сытярэнас.
31 Во ԥэндя лэнди: «Жам андо спокойно ҭан, кай тумэ набут тэ отцыён». Важ кода кай авэлас и ужалас кадя бут миро, кай лэ Исусости и лэ апосталонэнди найкала сас дажэ тэ бэшэн тэ хан.
32 Тоди вонэ лаглэ пэ лодка андо спокойно ҭан, кай тэ авэн екжэнэ.
33 Но о миро додиқля, кай вонэ уладэн, и бут ко пала када уӷангля. И мануша анда всаворэ фороря прастае интя и авелэ май пэрви лэндар.
34 Кала о Исусо вижыля анда лодка, во додиқля бутэ манушэн. Лэсти ашэля лэн жалко, важ кода кай вонэ сас сар бакрорэ би лэ пастухоско, и во бутэсти ля лэн тэ сытярэл.
35 Май пашэ каринг о вечеро и ученикоря пашэлэ каринг о Исусо и ԥэндэ: «Амэ дур лэ гавэндар, и ужэ позно.
36 Одмэк лэ манушэн тэ жан андэ пашутнэ гава и тэ тинэн пэсти тэ хан».
37 Во ԥэндя: «Тумэ дэн лэнди тэ хан». Вонэ пушлэ: «Ту камэс, кай амэ тэ жас, тэ тинас марно пэ 200 дина́рии* и тэ дас лэ манушэнди?»
38 Во ԥэндя лэнди: «Жан диқэн, скати тумэндэ исин марно». Вонэ диқлэ и ԥэндэ лэсти: «Панч марнэ, и инке дуй маще».
39 Тоди во мангля лэ манушэн тэ бэшэн пэ чар.
40 Вонэ бэшлэ кучкэнца по 100 и по 50 мануш.
41 О Исусо ля панч марнэ и дуй маще, диқля по небо и мангляпэ*. Посли када во росԥагля о марно и ля тэ дэл лэ учениконэнди, кай вонэ тэ роздэн лэ манушэнди. Кадяжэ во пэ всаворэ розделисардя дуй маще.
42 Всаворэ халэ и чалелэ.
43 Кала стидэ́ вся о марно, саво ашэляпэ, вижылэ 12 ԥэрди корзины, ай кадяжэ стидэ́ и о мащё, саво ашэляпэ.
44 Кодэлэн, ко халя о марно, сас 5 000 мурш.
45 Сразу посли када о Исусо ԥэндя лэ учениконэнди тэ бэшэн андэ лодка и тэ плывин пэ авэр береӷо андэ риг каринг и Вифсаи́да, ай екжэно ашэляпэ тэ проандярэл лэ мирос.
46 Во проандярдя лэ манушэн и посли када жыля по плай тэ мангэлпэ.
47 Кала поджыля о вечеро, и ученикоря пэ лодка сас ужэ пэ машкар моря, ай о Исусо сас по береӷо екжэно.
48 Англа тэсара* во додиқля, кай пэ ученикоря ԥурдэлас и балвал и через када лэнди найвушэро тэ плывин, и жыля каринг лэндэ па моря, но, сар здэласпэ, камля тэ прожал мимо.
49 Кала вонэ додиқлэ, кай во жал па паи, вонэ погиндосардэ: «Амэнди када зрийпэ!» — и зацыписайлэ,
50 важ кода кай, кала додиқлэ лэс, пэрэдарайлэ. Но во сразу ԥэндя лэнди: «На́ даран! Када мэ».
51 Во бэшля андэ лэндири лодка, и тоди и балвал сразу уляпэ. Вонэ фартэ удивисайлэ,
52 важ кода кай на ӷанэнас, сар тэ полэн кода, со сас лэ марнэса. Лэнго ди инке на сас ӷотово тэ полэл када.
53 Кала вонэ пэрэплывисардэ пэ авэр риг, вонэ авелэ андо Генисаре́то и терделэ* котэ.
54 Но кала вонэ вижылэ анда лодка, о миро сразу ӷатярдя лэ Исусос.
55 Кадэла мануша опрастае всаворэ гава пэ кодэла краёря и линэ тэ анэн каринг лэстэ пэ носилки лэ насвалэн.
56 Андэ всаворэ фороря и гава, кай во сас, и мануша анэнас каринг о базаро лэ насвалэн, савэ мангэнас, кай во тэ домэкэл лэнди тэ лэнпэ хоть каринг и брыжа пэ лэстири ӥда. И всаворэ, ко лэласпэ каринг латэ, вилечинаспэ.
Сноски
^ Или «плотнико».
^ Или «ловэ андэ кущик».
^ Или «андэ саво цэр».
^ Када о И́радо о Анти́па.
^ Или «стодэ андэ моӷилка».
^ Ворта «блаӷословисардя».
^ Ворта «варикай андэ штарто ночно стража». Када варикай с трёх ч. ночи до шэсти ч. утра.
^ Или «змэклэ о якарё».
