Свынто тайна 4:1-11
4 Посли када мэ додиқлэм по небо ԥэрнади вудар и ашундэм о пэрво ӷолосо, саво ашундёлас сар анда трубатэ. Кадэва ӷолосо ԥэндя манди: «Ваздэпэ кардэ, и мэ сыкавава тути, со трэбуй тэ авэл».
2 Манди сас дино о свынто зор, и мэ додиқлэм, кай по небо тердёл троно и пэр лэстэ варико бэшэл.
3 Кодэва, ко бэшэлас по троно, светияспэ сар бар я́шма и сар бар сердали́ко*, ай круӷом троно блестияс и радуӷа анда изумрудо.
4 Круӷом троно тердёнас инке 24 троноря, и пэр лэндэ бэшэнас 24 барэдэра андэ парни ӥда, и лэндэ пэ шэрэ сас сомнакунэ короны.
5 Лэ троностар марэнас молнии и ӷромо и ашундёнас ӷолосоря, ай англа троно ярко ԥабонас семь лампы, савэ сыкавэн лэ Дэвлэстирэ семь зора.
6 Англа троно сас варисо кацаво, ԥэнэса стекляно моря, сави шоласпэ по хрусталё.
Андо машкар, котэ, кай сас о троно, и круӷом лэстэ находинаспэ штар зоралэ анӷелоря*, савэндэ англал и палал сас розбут яқа.
7 О пэрво зорало анӷело шоласпэ по лево, о дуйто — по гурув, кай о трито сас манушыкано муй, ай о штарто шоласпэ по орло.
8 И кажнонэстэ анда кадэла зоралэ анӷелоря сас по шов ԥақа. (Лэндэ везде сас яқа, дажэ тала ԥақа.) Вся и время, о дес и рят, вонэ ԥэнэнас: «Свынто, свынто, свынто о Иегова*, о Само Зорало Дэл, саво сас, исин и авэла».
9 И зоралэ анӷелоря прижанэнас, кай кодэва, ко бэшэл по троно и жувэл вечно, ашунгло и пативало, и блаӷодаринас лэс.
10 Ай и 24 барэдэра пэрэнас пэ чанга англа кодэва, ко бэшэл по троно, и тэлёнас кодэлэсти, ко жувэл вечно. Вонэ шонас пэстирэ короны каринг о троно и ԥэнэнас:
11 «Иегова, амаро зорало Дэл, всаворэ трэбуй тэ прижанэн, кай ек тутар марэл и бах и патив, важ кода кай ту вся стердян, и вся ашэля и появисайля кадя, сар тути сас уӷодно».
