1 Каринфо 7:1-40
7 Ай акана камлэм тэ подав дума пала тумаро вопросо, пала саво тумэ пистросардэсас манди. Лэ муршэсти фэдэр тэ на жэнийпэ и тэ на авэл ла жувляса*.
2 Но щас па вся и люма терэлпэ билажавардимос, важ када кажнонэ муршэстэ трэбуй тэ авэл пэстири хулаи и кажнона жувлятэ — пэско хулай.
3 О мурш трэбуй тэ отдэл пэстиря хулаяти кода, со лати прижал, ай и жувли — пэстирэ хуласти.
4 Ла жувлятэ нинай право пэ пэстири тила, но кадэва право исин кай лако хулай. Кадя жэ лэ муршэстэ нинай право пэ пэстири тила, но кадэва право исин кай лэстири хулаи.
5 На́ отԥэнэн андэ када ек еқэсти, если кати пэ дэсави время, кала лэдуй соӷласни кадэлэса. Кадя тумэндэ авэла время важ и молитва. Ай потом тумэнди упалэ трэбуй тэ авэн вместе. Тоди кай о Сатана на вижала тэ змарэл тумэн через кода, кай тумэ на ӷанэн тэ ритярэн пэс андэ вас.
6 Но мэ ԥэнав када най сар законо, ай кай тумэ тэ ӷанэн, со можно, ай со нащи.
7 Мэ камлоп, кай всаворэ тэ авэн* сар мэ. Но кажнонэсти випэля лэ Дэвлэстар пэстири бах: еқэсти кацави, аврэсти авэр.
8 Акэ со мэ ԥэнав кодэлэнди, ко найжэнато и най миростэ, и лэ ԥивлянди: фэдэр лэнди тэ ашэнпэ сар мэ.
9 Но если вонэ нащи ритярэн пэс андэ вас, тоди мэк жэнинпэ. Фэдэр тэ жэнинпэ, чем тэ здрал и цыпа.
10 Кодэлэн, ко жэнисайля и жыля миростэ, мэ сытярав кадя: и жувли на трэбуй тэ ужал пэстирэ хуластар. И дажэ май бут ԥэнава: кадэлэсти най мэ сытярав, ай о Баро Хулай.
11 Но если вой ужала лэстар, тоди вой на трэбуй тэ жал пала авэр или трэбуй тэ помирийпэ пэстирэ хуласа. И о мурш на трэбуй тэ ашавэл пэстиря хулая́.
12 Ай аврэнди мэ ԥэнав акэ со (када ԥэнав мэ, ай най о Баро Хулай): если лэ ԥралэстэ и хулаи на андярэл лэ Дэвлэстири время и вой на камэл тэ розжалпэ лэса, во на трэбуй тэ ашавэл ла.
13 Ай если ла жувлятэ о хулай на андярэл лэ Дэвлэстири время и во на камэл тэ розжалпэ ласа, вой на трэбуй тэ ашавэл пэстирэ хулас.
14 О мурш, саво на андярэл лэ Дэвлэстири время, ашэл свынто через пэстири хулаи, ай и жувли, сави на андярэл лэ Дэвлэстири время, ашэл свынто через пэско хулай, саво андярэл лэ Дэвлэстири время. А то тумарэ бэяцэ авелоп найвужэ, но акана вонэ свынти.
15 Но если кодэва, ко на андярэл лэ Дэвлэстири время, камэл тэ ужал, мэк ужалтар. Тоди амаро ԥрал или ԥэй можэт тэ жувэл отдельно. На́ бистрэн, кай о Дэл дя тумэнди тэ жувэн мирно.
16 Жувли, катар ту ӷанэс, на спасыса пэстирэ хулас? Или ту, мурш, катар ӷанэс, на спасыса пэстиря хулая́?
17 Мэк кажно жувэл кадя, сар лэсти дино лэ Иеговастар*. Во трэбуй тэ андярэл кацави жэ жызня, сави лэстэ сас, кала о Дэл витидя лэс. Мэ ԥэнав пала када важ всаворэ ӷурторя.
18 Если варикас о Дэл витидя, кала кадэва мануш сас опшындо, тоди мэк ашэлпэ кацаво. Ай если варикас о Дэл витидя, кала кадэва мануш сас найопшындо, тоди мэк на́ опшындёл.
19 Неважно, опшындо о мануш или най, — важно, кай во тэ ритярэл лэ Дэвлэско законо.
20 Мэк кажно ашэлпэ кацаво жэ, саво во сас, кала о Дэл витидя лэс.
21 Если ту санас рабо, кала о Дэл витидя тут, на́ загиндосав пала када. Но если ту можэш тэ ашэс свободно, на́ умэк кадэя возможность.
22 Кодэва, ко сас рабо, кала о Баро Хулай витидя лэс, ашэл лэ Барэ Хуласко свободно рабо. И кадя жэ кажно, ко сас свободно мануш, кала о Баро Хулай витидя лэс, ашэл лэ Христоско рабо.
23 Пала тумэндэ потинди бари цэмин. На́ домэкэн тэ ашэн лэ манушэндирэ раборя.
24 Ԥрала, ашэнпэ англа Дэл кацавэнца, савэ тумэ сас, кала во витидя тумэн.
25 Ай если тэ дас дума пала кодэла, ко на сас жэнато или на сас миростэ, манди найсо тэ пэрэдав лэ Барэ Хуластар. Но камав тэ ԥэнав пэско гиндо сар мануш, савэсти исин патяимос и каринг саво сас одяло о Баро Хулай.
26 Мэ гиндосарав, кай андэ кадэя ԥари время манушэсти фэдэр тэ ашэлпэ кадя, сар исин.
27 Если тутэ исин хулаи, на́ старысав тэ ашэс свободно. Если тутэ нинай хулаи, на́ старысав тэ жэниспэ.
28 Но дажэ если ту жэнисапэ или жаса миростэ, на стерэса бэзэх. И если кодэва, ко екжэно, жэнияпэ или жала миростэ, на стерэла бэзэх. Но кай кацавэ мануша авэла нэво ԥаримос андэ жызня. Ай мэ камав тэ фэрисарав тумэн кадэлэстар.
29 Но инке, ԥрала, мэ камав тэ ԥэнав: ашэляпэ набут время. Акана кодэла, кастэ исин хулаи, трэбуй тэ жувэн кадя, ԥэнэса вонэ найжэнати.
30 Кодэла, ко ровэл, трэбуй тэ авэн сар кодэла, ко на ровэл. Кодэла, ко лошавэл, трэбуй тэ авэн сар кодэла, ко на лошавэл. Кодэла, ко тинэл, трэбуй тэ авэн сар кодэла, кастэ нисо нинай.
31 И кодэла, ко пользуийпэ кодэлэса, со исин андэ люма, на трэбуй тэ пользуинпэ всаворэса. На́ бистрэн: кода, со исин андэ кадэя люма,* парудёл.
32 Мэ камав, кай тумэндэ тэ на авэл ԥаримос. О ӷольтяй гиндой пала лэ Барэ Хуластири дила, пала кода, сар тэ уӷодий лэ Барэ Хуласти.
33 Ай о жэнато гиндой пала обычно дила, пала кода, сар тэ уӷодий ла хулаяти,
34 важ када во не можэт тэ шол сама кати пэ ек дила. И кадя жэ и жувли, сави най миростэ, или и щей гиндой пала лэ Барэ Хуластири дила, кай латири тила и лако гиндо тэ авэн свынти. Ай и жувли, сави миростэ, гиндой пала обычно дила, пала кода, сар тэ уӷодий пэстирэ хуласти.
35 Мэ ԥэнав када, кай тумэнди тэ авэл драго, ай най кай тэ сԥандав тумэнди и вас*. Камав, кай тумэ тэ терэн правильно и кай нисо тэ на мешыий тумэнди тэ андярэн лэ Барэ Хуластири время.
36 Но если кодэва, ко найжэнато или наймиростэ, полэл, кай ԥарэс тэ ритярэл пэс андэ вас, и ужэ вибареля и годяйля, тоди мэк терэл сар камэл. Када най бэзэх. Мэк кацаво мануш жэнийпэ или жал миростэ.
37 Ай если варико витидя тэ на жэнийпэ или тэ на жал миростэ, састэс приритярдёл кадэлэсти и ритярэл пэс андэ вас, тоди када драго.
38 Ни акэ, кодэва, ко жэнийпэ или жал миростэ, терэл драго, но кодэва, ко на жэнийпэ или на жал миростэ, терэл фэдэр.
39 И жувли трэбуй тэ ашэлпэ пэстирэ хуласа, пока во жундо. Ай если во мэрэла, тоди латэ исин право тэ жал пала кастэ камэл, но кати тоди, если кодэва мануш андярэл лэ Барэ Хуластири время.
40 Ай па мэрнятэ, вой авэла май бахтали, если ашэлапэ кадя сар исин. И мэ гиндосарав, кай и мандэ исин лэ Дэвлэско зор.
Сноски
^ Ворта «тэ на лэлпэ каринг и жувли». Катэ и дума жал пала сэксуальни отношэнии.
^ Или «всаворэ мурш тэ авэн найжэнати».
^ Или «кадэла люматири сцэна».
^ Ворта «тэ шав тумэнди фэли пэ кор».
