1. Сар о Иегова шол сама пэстирэ манушэн?

 О ИЕГОВА фартэ шол сама пэстирэ помошниконэн. Во ӷанэн, со терэлпэ лэндэ андэ жызня: пала лэндири радость и пала лэнго ԥаримос (Пс. 37:18). Кала во диқэл, кай амэ на парашас тэ терас лэстири дила, хоть амэнди фартэ ԥарэс по ди, во фартэ абурой амэнца. И во на ашавэл амэн екжэнэн амарэ ԥаримаса — во подритярэл амэн и придэл амэнди зор.

 2. Со о Иегова терэл важ кодэла, касти ԥарэс по ди, и сар тэ получис лэстири помощь?

² Андо Псалом 147:3 ԥэнэнпэ, кай о Иегова пэрэԥандэл и раны «кодэлэнди, касти фартэ ԥарэс по ди». Анда кадэла алава дицол, кай о Иегова фартэ камэл тэ поможый кодэлэнди, ко пэрэандярдя варисави бида и касти посли када фартэ ԥарэс по ди. Но сар тэ получис кадэя помощь? Погиндосар пала кацаво примеро. Если о мануш занасвайля, во жал кай о лашо врачо. Но када инке най вся. Лэсти трэбуй андэ вся тэ приритярдёл кодэлэсти, со ԥэндя лэсти о врачо. Андэ кадэя статья амэ роздиқаса, со за «рецэпто» випистросардя амэнди о Иегова, пала саво пистромэ андэ Библия, и со амэ трэбуй тэ терас, кай амэндэ тэ авэл спокойно по ди.

О ИЕГОВА ԤЭНЭН, КАЙ ВО АМЭН ФАРТЭ ЦЭНИЙ

 3. Васо дэсавэнди ԥарэс тэ патян, кай лэн моӷут тэ любин?

³ Амэ жувас андэ кацави люма, кай на ӷанэн тэ любин. И бутэ манушэндэ по ди кацаво, кай вонэ никасти на трэбуй. Акэ со ԥэнэн ек ԥэй, савя ақарэн Хе́лен a: «Ман нико па чачимастэ на любияс. Мэрно дад сас фартэ жэстоко и кажно дес ԥэнэнас,  кай мэ нисо на ашав». Можэт, туса найдраго обжанаспэ, тути постояно ԥэнэнас, кай ту вся терэс най кадя, и доԥэнэнас, кай тутар нинай нисаво толко. Тоди через када тути можэт тэ авэл ԥарэс тэ патяс, кай тут можэт варико тэ любий.

 4. Сар о Иегова подритярэл амэн алавэнца, савэ запистромэ андо Псалом 34:18?

⁴ Сар бы туса тэ на обжанпэ и мануша, ӷан, кай о Иегова любий и цэний тут. Во «паша кодэва, ко бидаса умардо». (Проадинон Псалом 34:18.) Сэр, кай о Дэл диқэл андэр тутэ бут лашымос и важ када пашардя тут каринг пэстэ (Иоан. 6:44). Во вся и время паша тутэ, кай тэ дэл тути помощь, важ кода кай ту важ лэстэ па чачимастэ котор сомнак.

 5. Сар о Исусо обжаласпэ кодэлэнца, кас авэр вэрыцынас, и сости амэ сытювас?

⁵ Амэ можэм бут со тэ уӷанас пала Иегова, если роздиқаса лэ Исусоско примеро. Кала о Исусо терэлас лэ Дэвлэстири дила пэ ԥув, во жалуияс и ковлэс обжаласпэ кодэлэнца, кас авэр вэрыцынас (Матф. 9:9—12). Еқвар каринг лэстэ чоралэс поджыля ек жувли, савятэ сас ԥаро насвалимос. Вой надеияспэ тэ исцэлийпэ и важ када ляпэ каринг о Исусо. Но во успокоисардя ла и похвалисардя важ лако патяимос (Мар. 5:25—34). О Исусо обжаласпэ лэ манушэнца точно кадя жэ, сар лэско Дад (Иоан. 14:9). Важ када ту можэш тэ патяс: о Иегова цэний тут и шол сама пэ тиро лашо характеро, например пэ кода, сар ту патяс и любис лэс.

 6. Со тэ терэн кодэлэнди, ко на цэний корко пэс?

⁶ Со, если дэкала или дажэ постояно тути андо шэро ӷулен гиндоря, кай ту нисо на ашэс? Адиносар библейски стихоря, через савэ о Иегова на дэл тути тэ бистрэс, кай во любий тут. Гиндосар пала лэстирэ алава (Пс. 94:19) b. Можэт, ту стодян варисави цэль, но  тутэ на вижыля ла тэ домардёс. Или ту не можэш тэ терэс скати жэ, скати терэн авэр. На́ дошаляр корко пэс. О Иегова на аштярэл тутар кода, со най па тиро зор (Пс. 103:13, 14). Ай варикаса обжылэпэ фартэ жэстоко, например тэлярэнас алавэнца, марэнас, приасанаспэ или дажэ стердэ нахальство. Если тутэ сас варисо кацаво, тоди сэр: андэ када нинай тири дош. Нико на затерэл, кай лэса кадя тэ обжанпэ! Вся и дош пэрэл пэ кодэва мануш, ко када стердя, и во лэла отвечать пала када англа Иегова (1 Пёт. 3:12). И Са́ндра, савяса жэстоко обжанаспэ, кала вой сас бэятаса, ԥэнэн: «Мэ постояно мангав лэ Иеговас, кай во тэ поможый манди правильно тэ диқав пэр пэстэ и тэ диқав кода, со во диқэл андэр мандэ».

 7. Сар кода, со амэ пэрэжудям, можэт тэ анэн лашымос андэ лэ Иеговастири дила?

⁷ Если ту гиндос, кай тутар нинай толко, када на сыкавэл, кай о Иегова гиндой кадя жэ. Во ақарэл тут тэ авэс лэско амал и дя тути тэ росԥэнэс и лащи новость (1 Кр. 3:9). Через тутэ во можэт тэ поможый аврэнди. Блаӷодаря кодэлэсти, со ту пэрэжудян, ту, возможно, май драго полэс лэ манушэн, савэ пэрэжудэ варисо кацаво. И Хелен, пала сави амэ дям дума май данглал, получисардя помощь лэ Иеговастар и лэ ӷуртостар, и акана вой екжэни поможый аврэнди. Вой росԥэнэн: «Мэ гиндосаравас, кай мэ нико и мандар нинай нисаво толко. Но о Иегова поможысардя манди тэ полав, кай ман любин и кай мэ нужно». Щас и Хелен общё пианеро.

О ИЕГОВА КАМЭЛ, КАЙ АМЭ ТЭ ПАТЯС: ВО ПА ЧАЧИМАСТЭ ПРОСТИЙ АМЭН

 8. Сар и алава анда Исайя 1:18 придэн амэнди зор?

⁸ Дэсавэнди анда лэ Иеговастирэ мануша фартэ ԥарэс по ди кодэлэстар, кай вонэ нащи бистрэн, со вонэ стердэ жы каринг кода, сар болделэ, или дажэ посли. Но о Иегова фартэ любий амэн — во дажэ потиндя важ амэндэ само кучутни цэмин. Во камэл, кай амэ тэ прилас кадэва подарко. О Иегова ԥэнэн, кай если амэ лэса примирисайлям c, во никала на шола амэнди пэ яқа амарэ бэзэха. (Проадинон Исайя 1:18.) Амэ кадя блаӷодарни лэ Иеговасти, кай во бистрэл амарэ бэзэха, но сэрэл о лашымос, саво амэ терас важ лэстэ (Пс. 103:9, 12; Евр. 6:10).

 9. Васо авелоп драго тэ гиндос пала адесутни время и пала время, сави авэла англэ, ай най пала кода, со сас?

⁹ Если тут хал оди пала кода, со ту стердян дэлмут, на́ гиндосар пала када. Старысав тэ гиндос пала адесутни время и пала время, сави авэла англэ. Кадя и стердя о апостало Павло. Варикала во фартэ ӷонияс лэ христианонэн и во моӷ вся и время тэ дошалярэл пэс важ када. Но во ӷанэнас, кай о Иегова лэс простисардя (1 Тим. 1:12—15). О Павло на загиндояспэ пала кода, со сас лэстэ дэлмут андэ жызня: сар во на шолас сама пэ кода, со домарделя андэ иудейско вера, кадя жэ во отшутя всаворэ гиндоря пала кода, со стердясас варикала (Флп. 3:4—8, 13—15). Во пристолас вся о зор, кай тэ терэл лэ Дэвлэстири дила, и надеияспэ по лашымос, саво лэстэ авэла англэ. Сар и о Павло, ту не можэш тэ парувэс кода, со сас дэлмут. Но ту можэш тэ радуис лэ Иеговас. И дажэ андэ тири ситуацыя тути па зор тэ терэс кадя, кай лэско алав тэ авэл ашунгло, и тэ аштярэс лэстар англэ о лашымос.

10. Со тэ терас, если через амэндэ варикасти ашэля ԥарэс?

¹⁰ Можэт, ту дошалярэс пэс, кай варикала найдраго обжылянпэ варикаса. Со тоди тэ терэс? Старысав тэ парувэс кадэя ситуацыя.  Например, анда ди манг лэстар прощения (2 Кр. 7:11). Мангпэ лэ Иеговасти, кай во тэ стерэл май вушэро по ди кодэлэнди, касти ту андян ԥаримос. О Дэл поможыя лэсти и тути, кай тумэндэ тэ авэл спокойство по ди и кай тумэ вместе тэ на парашэн тэ терэн лэстири дила.

11. Сости амэ сытювас кай о Ёна? (Кадяжэ диқэн и картинка.)

¹¹ Сытюв пэ пэстирэ ошыбки и ав ӷотово тэ терэс кода, со камэл о Иегова. Погиндосар пала Ёна, саво пэрэдэлас и алава лэ Дэвлэстар. О Дэл ԥэндя лэсти тэ жал андэ Ниневия, ай о Ёна унашля совсем андэ авэр риг. О Иегова поможысардя лэ Ёнасти тэ прижанэн пэстири дош и тэ полэл важни гиндоря (Иона 1:1—4, 15—17; 2:7—10). О Иегова на отԥэнделя пэстирэ манушэстар. О Дэл сыкадя, кай патял лэсти. Во упалэ ԥэндя лэ Ёнасти тэ жал андэ Ниневия, и када разо во сразу кангля лэс. Хоть лэ Ёнасти сас ԥарэс по ди через пэстири ошыбка, во на домэкля кадэлэсти тэ тердярэл лэс и стердя кода, со камэлас лэстар о Иегова (Иона 3:1—3).

О ИЕГОВА ДЭЛ АМЭНДИ СВЫНТО ЗОР, КАЙ ТЭ ПОДРИТЯРЭЛ АМЭН

12. Сар о Иегова поможый амэнди тэ пэрэжувас и бида? (Филипы 4:6, 7).

¹² Кала андэ амари жызня терэлпэ варисави бида, о Иегова дэл пэско свынто зор, кай амэнди по ди тэ ашэл май вушэро. Акэ со пэрэжудэ о Ро́но и Кэ́рол. Лэнго взросло шаво умардя корко пэс. Вонэ росԥэнэн: «Андэ амари жызня бут со терэласпэ, но май ԥарэс кадэлэстар на сас нисо. Часто амэ нащи совасас и рятянца мангасаспэ. Амэ поласас, кай о Иегова дэлас амэнди покоё, пала саво ԥэнэнпэ андэ Филипы 4:6, 7» (проадинон). Если андэ жызня терэлпэ варисави бида, на́ лажан тэ росԥэнэн лэ Иеговасти кода, со тумэндэ по ди. Дажэ если тумэнди трэбуй тэ мангэнпэ бут и часто, во лэла тэ ашунэн тумэн (Пс. 86:3; 88:1). Мангэн кай о Иегова о свынто зор, и во обязательно дэла лэс тумэнди (Лука 11:9—13).

13. Сар о свытно зор поможый амэнди тэ на парашас тэ терас лэ Иеговастири дила? (Ефесо 3:16).

¹³ И ԥари время можэт тэ одлэл вся амаро зор. Ай тутэ сас кацаво? О свынто зор можэт тэ поможый амэнди тэ на парашас тэ терас лэ Иеговастири дила. (Проадинон Ефесо 3:16.) Акэ со тердяпэ андэ жызня кай и Фло́ра. Ла и латирэ хулас бишалдэ тэ росԥэнэн важ о Дэл андэ авэр страна. Потом вой уӷангля, кай во сас авряса, и вонэ розжылэпэ. И Флора росԥэнэн: «Кала о хулай придя ман, мандэ кадя росшындёлас оди, кай мэ не моӷла тэ гиндосарав ни пала со авэр. Манди здэласпэ, кай мэ на виӷулява анда кадэва чорымос. Мэ мангаваспэ лэ Иеговасти пала свынто зор. И во вицырдя ман котар и уля мэрни дук». Акана и Флора инке май фартэ патял лэ Дэвлэсти. Латэ исин састо патяимос, кай лэса вой можэт тэ виритярэл любо ԥаримос. Инке вой ԥэнэн: «Мандэ по ди кода жэ, со пистромэ андо Псалом 119:32: „Мэ авава анда оди тэ жував па тирэ законоря, важ кода кай ту поможыс манди лэн тэ полав“» (Пс. 119:32).

14. Со трэбуй тэ терэс, кай тутэ тэ авэл май бут лэ Иеговаско свынто зор?

¹⁴ Со трэбуй тэ терэс, посли кода сар манглян лэ Иеговастар свынто зор? Тер кодэя дила, через сави во дэла тути инке май бут пэско зор. Например, ԥир пэ собрании и росԥэн пала Дэл. Кажно дес адиносар и Библия и тоди лэ Иеговастирэ гиндоря лэна тэ парувэн тут (Флп. 4:8, 9). Андэ Библия ту уӷанэса пала мануша, савэндэ сас разно ԥаримос. Шув сама, сар о Иегова поможыяс лэнди тэ ашэнпэ састэ и тэ на парашэн тэ кандэн лэс. И Сандра, пала сави ԥэнэнпэ андо 6-то абзацо, бут со пэрэжудя андэ пэстири жызня. Вой  ԥэнэн: «Манди вся и время придэлас зор лэ Иосифоско примеро. Лэстэ сас бут ԥаримос и лэса найдраго обжанаспэ, но во на домэкля кадэлэсти тэ дурярэл лэс лэ Иеговастар» (Быт. 39:21—23).

О ИЕГОВА ПОДРИТЯРЭЛ АМЭН ЧЕРЕЗ И ԤРАЛА И ԤЭЯ

15. Сар о Иегова подритярэл амэн через и ԥрала и ԥэя? (Кадяжэ диқэн и картинка.)

¹⁵ Кала амэнди ԥарэс, амэн моӷут тэ подритярэн и ԥрала и ԥэя (Клс. 4:11). Через лэндэ о Иегова сыкавэл, кай любий амэн. Сар вонэ подритярэн амэн? Амэ можэм тэ росԥэнас лэнди кода, со амэндэ по ди, и вонэ ӷотови тэ виашунэн амэн. Ай дэкала амэнди ашэл май вушэро кодэлэстар, кай вонэ просто паша амэндэ. Вонэ моӷут тэ ԥэнэн пала библейско стихо d, саво придэла зор, или тэ мангэнпэ амэнца (Римо 15:4). Дэкала варико анда ԥрала или ԥэя поможый амэнди тэ полас, сар о Иегова диқэл пэ амари ситуацыя, и кадэлэстар амэнди можэт тэ ашэл май вушэро. Кадяжэ и ԥрала и ԥэя моӷут тэ поможын амэнди пэ дила, например тэ гитон тэ хас, кала амэндэ нинай зор.

16. Со дэкала трэбуй тэ терэс, кай тути тэ дэн помощь?

¹⁶ Дэкала, кай амэнди тэ поможын, амэ трэбуй тэ мангас пала када. И ԥрала и ԥэя любин амэн и камэн варисар тэ поможын (Прит.  17:17). Но вонэ моӷут тэ на ӷанэн, со амэндэ андо ди и со амэнди трэбуй (Прит. 14:10). Если тути ԥарэс по ди, ту можэш ворта тэ росԥэнэс пала када лэ друӷонэнди, савэ састэ па лэ Дэвлэстири время. Ковлэс потԥэн лэнди, сар вонэ моӷут тэ поможын. Можно тэ подэс дума еқэ или дуе барэдэрэ ԥралэнца, савэ пашэ тирэ одести. Дэсавэ ԥэя мангэн помощь кай и састэ христианки.

17. Через со амэ можэм тэ на получисарас и помощь и сар када тэ на домэкас?

¹⁷ Дажэ если дэкала тути камэлпэ тэ ашэспэ екжэно, фэрисав, кай тэ на дурёс всаворэндар. Можэт, тути кадя ԥарэс, кай нинай зор варикаса тэ дэс дума. Ай можэт, и ԥрала и ԥэя анда ӷурто най кадя драго полэн, со тутэ по ди, или дэн дума най интя (Иак. 3:2). Дажэ если кадя, на́ дурюв лэндар. Через лэндэ о Иегова можэт тэ подритярэл тут. Лэ барэдэрэ ԥралэсти, савэс ақарэн Ге́вино, ԥарэс через и депрэсия. Акэ со во росԥэнэн: «Часто послиднё, со манди камэлпэ — када варикаса тэ дав дума». Но о Гевино старыийпэ тэ терэл наоборот — во проандярэл и время лэ ԥралэнца и лэ ԥэянца. И обычно посли када лэсти ашэл май вушэро. И ԥэй, савя ақарэн Э́ми, росԥэнэн: «Через кода, со сас андэ мэрни жызня, манди ԥарэс тэ патяв лэ манушэнди. Но мэ сытював тэ любисарав мэрнэ ԥралэн и ԥэян андо ӷурто и тэ патяв лэнди, важ кода кай камав тэ шавпэ по Иегова. Мэ ӷанав, кай лэсти када чалёл. Ай кала мэ радосарав лэс, мэрно ди тожэ лошавэл».

МЭК ТУТ ПОДРИТЯРЭЛ И НАДИЯ ПЭ КОДА, СО АВЭЛА АНГЛЭ

18. Саво лашымос о Иегова камэл амэнди тэ дэл англэ и со амэнди трэбуй тэ терас акана?

¹⁸ Ӥто о Иегова стерэла кадя, кай на ашэлапэ нисо, состар дуқал амаро ди и через со амэнди ԥарэс (Тайна 21:3, 4). И андэ кодэя время нисаво найлашымос на авэла амэнди по гиндо и на лэла тэ хал амаро ди (Ис. 65:17). Сар амэ диқлям, о Иегова ужэ щас бут со терэл, кай амэнди тэ ашэл май вушэро. Важ када прилэ вся лэстири помощь. Никала на́ параш тэ патяс, кай о Иегова заботийпэ пала тутэ! (1 Пёт. 5:7).