И Библия када нэобычно книӷа. Амаро Создателё запистросардя андэр латэ важ амэндэ советоря (2 Тимофею 3:16). Вой можэт фартэ тэ парувэл тири жызня. Андэ Библия ԥэнэнпэ: «О Алав лэ Дэвлэстар жундо и лэстэ исин зор» (Евреям 4:12). Вой можэт тэ дэл помощь пэ кажно дес. Ай кадяжэ вой поможый май драго тэ уӷанэс лэ Дэвлэс и лэстирэ обещянии (1 Тимофею 4:8; Иакова 4:8).

Дэл помощь андэ жызня. И Библия можэт тэ поможый амэнди андэ разни ситуацыи. И советоря андар латэ дэн помощь акэ андэр со.

•   Сар тэ обжаспэ аврэнца (Эфесянам 4:31, 32; 5:22, 25, 28, 33).

• О зор и кода, со по ди (Псалом 37:8; Притчи 17:22).

• Сар пэс тэ андярас (1 Коринфянам 6:9, 10).

• Сар тэ диқас пэ ловэ (Притчи 10:4; 28:19; Эфесянам 4:28) *.

Еқэ ерести анда Азия и Библия поможысардя, кай лэнго ери тэ авэл май састо. Сар и бутэ манушэнди, савэ кати пожэнисайлэ, лэнди сас найвушэро тэ присытён ек еқэстэ и тэ росԥэнэн ек еқэсти, со лэндэ по ди. Но вонэ закамлэ тэ прилэн кода, со проадиносардэ андэ Библия. Сости вонэ сытелэ? О Висенто ԥэнэн: «И библейски советоря поможысардэ манди андэ любовь тэ розлав амарэ проблемы андо ери. Кала амэ лям тэ прилас и советоря анда Библия, амаро ери ашэля май лашо». Лэстири хулаи Аналу ԥэнэн: «Андэ Библия пистромэ пала мурша и жувля, савэ фартэ кандэнас лэ Дэвлэс. Кадэла примероря амэнди фартэ поможысардэ. Акана мэ фартэ лошали андо ери и амэндэ лэдуендэ и цэли еқэндар».

Уӷанас пала Дэл. И Библия поможысардя лэ Висентости и андэ авэр. Во ԥэнэн: «Через и Библия мэ кадя ашэлэм май пашэ каринг о Дэл, сар никала». Анда кода, со ԥэндя о Висенто, дицол, кай и Библия можэт тэ поможый тэ уӷанэс лэ Дэвлэс лэ Иеговас. Если ту лэса тэ адинос и Библия и тэ прилэс и советоря андар латэ, када най кати поможыя, кай тири жызня тэ авэл май лащи, но и тэ ашэс лэ Дэвлэско друӷо. Ту уӷанэса, со о Дэл росԥэнэн пала бахтали время, сави авэла англэ, кай ту авэса тэ радосавэс ла жызняти. И кадэя жызня авэла вечно (1 Тимофею 6:19). Ни ек авэр книӷа на дэла тути кацаво!

Если ту лэса тэ адинос и Библия кажно дес, и лэса тэ приритярдёс кадэлэсти, ту сможэш тэ виарақэс советоря пэ кажно дес и тэ уӷанэс лэ Дэвлэс. Но наверно, кала ту лэса тэ адинос и Библия, тутэ авэна бут вопросоря. Со тоди тэ терэс? Лашо примеро андэ када сыкадя ек баро мануш анда Эфиопия, саво жувэлас варикай 2000 лет палпалэ. Во адинояс и Свынто Писания и бут со на полэлас. Кала лэстар пушлэ, полэл ли во кода, со адиной, во ԥэндя: «Сар мэ полава, если манди нико на росԥэнэна?» * Во лэ одеса приля и помощь лэ Филиппостар, саво сас христианино и саво ӷанэнас драго и Свынто Писания (Деяния 8:30, 31, 34, Смыслово переводо). Если ту тожэ камэс май драго тэ уӷанэс и Библия, ашав и заявка по сайто www.mr1310.com или пистросар пэ ек анда кадэла адресоря, пала савэ пистромэ андо журнало. Лэ ужэ адес тэ адинос и Библия и мэк вой парувэл тири жызня андэ май лащи риг.