Мэ арақаделэм андо Паддингтоно, када баро раёно андо Лондоно. Мэ жувавас ла даса и тринэ барэдэр ԥэянца. О дад то авэлас амэндэ, то ужаластар. Во сас матимари.

Инке, сар мэ сымас бэятаса, и дэй сытярдя ман тэ мангавпэ англа кода, сар тэ пэрав тэ совав. Мандэ сас цыкнёры Библия, андэр латэ сас кати книӷа Псалмы. Мэ екжэни придумывала музыка и дилабавас и псалмы. Еқвар мэ проадиносардэм андэ ек книӷа алава, савэ на вижанас мандар анда шэро: «Авэла о дэс, кала на авэла тэся». Посли када мэ вся и рят нэ моӷла тэ засовав, мэ пэрэжывала, со авэла англэ. Мэ гиндосаравас, кай андэ жызня трэбуй тэ авэл варисаво смысло. Пэр со мэ авелэм пэ люма? Манди на камэласпэ тэ мэрав!

Манди ашэля интересно о бэнгалимос. Мэ лэм тэ дав дума лэ мулэнца. Вмести пэстирэ друӷонэнца анда школа мэ ԥиравас пэ моӷилки. Инке амэ диқасас ужастикоря. Кадэлэстар захутилэлас оди.

Кала манди сас дэш бэрш мэ ужэ терделэм по найлашо дром. Мэ лэм тэ цырдав и ӥто присытелэм каринг када. Почти сразу жэ мэ присытелэм тэ цырдав и чар. Кала манди сас одиннацать бэрш, мэ лэм понабут тэ пав. О пимос манди на чалеля, но чалеля со манца сас посли када. Инке мэ любисаравас музыка и тэ цэлав. И сар кати вижалас, мэ ԥиравас пэ вечеринки и андэ ночни клуборя. И рятэ мэ нашавастар цэрал и рисававас тала утро. Пэ авэр дес мэ, сар обычно, промэкавас и школа, важ кода кай на сас зор ни пэр со. Ай кала мэ всаек ававас, пэ перемена мэ обычно павас.

И школа мэ закончила пэ найлашэ оцэнки. И мама почти нисо на ӷанэнас пала кода, со мэ теравас и вой фартэ росхоляйля. Амэ спорисайлям, и мэ ужэлэмтар анда цэр. Дэсави время мэ жувавас манушэса, савэс ақарэнас Тони. Во сас преступнико, битинэнас наркотикоря и сас фартэ холинако. Ӥто мэ уӷанглэм, кай мандэ авэла бэято и кала манди сас шэснацать бэрш, мандэ арақаделя шаво.

Пэрво разо мэ диқлэмпэ лэ Иеговастирэ свидетелёнэнца, кала жувавас андо приюто важ и жувля, савэ бэятоса, но би хуласко. И правителя манди лэ бэятоса динэсас котэ комната. Дуй лэ Иеговастирэ свидетельницы всегда авэнас кай дэсавэ тэрнэ дэя. Еқвар мэ прибэшлэмас лэнца андэ дума. Мэ камавас тэ доԥэнав, кай и свидетеля дэн дума евья. Но вонэ пэ всаворэ мэрнэ вопросоря чотко и понятно динэ атветоря ворта па Библия. Вонэ сас добри и ковлэ и фартэ манди чалелэ, важ када мэ закамлэм тэ сытював лэнца па Библия.

Ӥто мэ уӷанглэм анда Библия кода, со парудя вся мэрни жызня. Жы бэятостар мэ даравас ла смэртятар. Ай акана мэ уӷанглэм, кай о Иисусо сытярэлас, кай упалэ авэна тэ жувэн кодэла, ко мулинэ! (Иоанна 5:28, 29). Кадяжэ мэ уӷанглэм, кай о Дэл любий ман (1 Петра 5:7). Но май фартэ ман линэ лэ одестар и алава анда Иеремии 29:11: «Мэ драго ӷанав, со загиндосардэм важ тумэндэ. Мэ загиндосардэм важ тумэндэ мирно жызня, ай най биды, кай тэ дав тумэнди кодэва лашимос, саво авэла англэ». Акана мэ лэм тэ аштярав, кай жувава вечно андо раё пэ ԥув (Псалом 37:29).

Лэ Иеговастирэ свидетеля любинас ман анда оди. Сэрав, сар дэ драго сас машкар лэндэ, кала мэ пэрво разо авелэм пэ собрания. Всаворэ поджанас, шонас сама! (Иоанна 13:34, 35). Када фартэ на шоласпэ пэ кода, сар манца обжанаспэ андэ қандири. И свидетеля обжанаспэ манца драго и на диқэнас пэ кода, сави мэ жызня андяравас. Вонэ виарақэнас пэр мандэ время, шонас сама и пэ дила дэнас помощь. Мэ полэм, кай мэ андо баро любящё ери.

Кала мэ лэм тэ сытював па Библия, мэ полэм, кай трэбуй тэ парував пэстири жызня, кай тэ жував па лэ Дэвлэстирэ законоря. Мэ стодэм баро зор, и мэклэм тэ цырдав. Андэ кодэя жэ время мэ полэм, кай через и музыка, сави мэ ашунав, мэ кати май фартэ камав тэ цырдав и чар, важ када мэ парашэлэм ла тэ ашунав. Кай тэ на матював, мэ парашэлэм тэ ԥирав пэ вечеринки и андэ ночни клуборя. Мэ виарақлэм пэсти друӷонэн машкар кодэла мануша, ко поможыяс манди тэ цырдавпэ каринг о лашимос и тэ жував па лэ Дэвлэстирэ законоря (Притчи 13:20).

Андэ кодэя время о Тони тожэ ля тэ сытёл па Библия лэ Иеговастирэ свидетелёнэнца. Кала лэ Иеговастирэ свидетеля динэ атветоря пэ лэстирэ вопросоря па Библия, во поля, кай виарақля о чачимос. Во фартэ парудя пэстири жызня, во ашадя пэстирэ найлашэ друӷонэн, ашадя и найлащи дила и мэкля тэ цырдэл и чар. Амэ камасас, кай о Иегова тэ радуийпэ пар мэндэ, и важ када закамлям тэ зареӷистрируем о брако, кай амаро шаво тэ барёл андо ери. И андо 1982 бэрш амэндэ сас ябьяв.

Сэрав, сар мэ родавас андэ журналоря «Сторожэво башня» и «Прошонпэ!» *, тэ адиносарав пала мануша, савэ парудэ пэстири жызня кадя, сар мэ камавас тэ стерав. Кацавэ статьи манди фартэ дэнас зор! Через лэндэ мэ на умэкавас и вас и на парашавас тэ парудював. Мэ фартэ мангавас лэ Иеговас тэ на ашавэл ман. Андо 1982 бэрш андо июлё мэ и о Тони болделям и ашэлям лэ Иеговастирэ свидетеля.

И дружба лэ Дэвлэса лэ Иеговаса спасысардя манди и жызня. О Тони и мэ кадяжэ диқлям, сар о Дэл подритярэл андэ ԥари время. Амэ сытелям тэ патяс лэ Иеговасти и амэ ӷанас, кай во вся и время сас паша амэндэ и заботияспэ пала амаро ери (Псалом 55:22).

Мэ радо, кай амэ сытярдям амарэ шавэс и ла щя тэ любин лэ Иеговас. И мэ бахтали, кай лэндирэ бэяцэ тожэ барён лэ Иеговаса.

И рятэ мандэ будэр нинай даранэ гиндоря пала кода, со авэла англэ или пала смэрть. О Тони и мэ кажно курко ездисарас па собрании, кай тэ подритярас амарэ ԥралэн и ԥэян. Вмести лэнца амэ дас помощь лэ манушэнди тэ патян андо Иисус Христос, кай вонэ тожэ тэ жувэн вечно.