О Иегова ԥэндя лэ Самуилости: «Жа каринг о Иессеё. Ек лэско шаво авэла дуйто царё андо Израилё». И о Самуило жыля кай о Иессеё. Кала о Самуило додиқля лэстирэ барэдэрэ шавэс, во погиндосардя: «Акэ, кадэва мануш авэла царё». Но Иегова ԥэндя, кай витидя аврэ манушэс и ԥэндя васо: «Мэ диқав най кати, саво мануш пар пэстэ, но и саво лэстэ оди».

О Иессеё ақардя каринг о Самуило инке шовэн пэстирэ шавэн. Но о Самуило ԥэндя: «Никас андар лэндэ о Иегова на витидя. Када всаворэ тирэ шавэ?» О Иессеё ԥэндя: «Инке исин ек, во май цыкно, Давидо ақарэн. Во пасый лэ бакрэн». Кала о Давидо авеля, о Иегова ԥэндя лэ Самуилости: «Када во!» О Самуило шутя вулей лэсти по шэро. Кадя во сыкадя, кай о Давидо авэла царё андо Израилё.

Прожыля время и машкар мануша анда Израилё и анда Филистия ля тэ жал и война. Важ и филистимляноря марэласпэ о великано Голиафо. Дес десэстар во приасаласпэ лэ израильтянонэндар. Во цыпияс: «Витидэн манушэс, кай во тэ марэлпэ манца! Сар во ман умарэла, амэ аваса тумарэ раборя. Ай сар мэ лэс умарава, тумэ авэна амарэ раборя».

Лэ Давидостирэ ԥрала слинэ воиноря андэ израильско лаӷерё. Еқвар во авеля каринг лэндэ и андя лэнди хамос. Котэ во ашундя, со ԥэндя о Голиафо и ԥэндя: «Мэ маравапэ!» Но царё Сауло ԥэндя: «Ту инке тэрно!» О Давидо ԥэндя: «Манди дэла зор о Иегова».

 О Сауло дя лэ Давидости кода, андэр со во ԥирэлас пэ война. Но о Давидо ԥэндя: «Мандэ на вижала андэр лэндэ тэ маравпэ». Кай о Давидо сас праща́. Када оружия, анда сави шувидэн и барора. Во ля ла и жыля кай о паи. Во витидя панч ӷладки барора и стодя андэ сумка. Тоди во вижыля пэ мал, кай марэнаспэ и дя тэ нашэл кай о Голиафо. О великано зацыписайля: «Ав кардэ, бэято! Мэ тут отдава лэ птицэнди и дыконэ зверонэнди». О Давидо на пэрэдарайля и зацыписайля: «Ту вижылян пэр мандэ лэ мечоса и лэ копьёса, ай мэ вижылэм лэ Иеговаса! Тумэ марэнпэ най амэнца, ай лэ Дэвлэса! Адес всаворэ диқэна, кай важ о Иегова тумарэ мечоря и копьёря, нисо. Во отдэла тумэн андэ амарэ вас».

О Давидо стодя бароро андэ праща́, ля ла тэ роскрутий анда вся зор и шувидя лэс. Ай о Иегова стердя кадя, кай о бароро тэ попэрэл ворта андо чикат кай о Голиафо. О великано муля и пэля пэ ԥув. И лэстирэ воиноря линэ тэ нашэн. О Давидо фартэ патялас, кай о Иегова поможыя лэсти. Ай ту патяс кадя, сар о Давидо, кай о Иегова поможыя тути?