УРОКО 7
Со када лэ Дэвлэско Царство?
1. Со када лэ Дэвлэско Царство?
Васо о Иисусо со май лашо Царё? (МАРКА 1:40—42).
Лэ Дэвлэско Царство, када правительство по нэбо. Во улэла всаворэ лэ манушэндирэ правительства и стерэла, кай по нэбо и пэ ԥув тэ авэл кадя, сар камэл о Дэл. И дума пала лэ Дэвлэско Царство, када лащи новость. Йто о Дэл стола лашо правительство, саво стерэла кода, со камэн всаворэ мануша. Тоди, кала авэла кадэва правительство, всаворэ мануша лэна тэ ладин ек еқэса. (Адиносар Даниил 2:44; Матфея 6:9, 10; 24:14.)
Андэ любо царство трэбуй тэ авэл царё. Андо небесно Царство о Иегова стодя Царёса пэстирэ Шавэс, лэ Иисусос Христос. (Адиносар Откровение 11:15.)
Дик видео «Со када лэ Дэвлэско Царство?».
2. Васо о Иисусо, када со май лашо Царё?
Лэ Дэвлэско Шаво со май лашо Царё, важ кода кай во добро и справедливо (Матфея 11:28—30). Кадяжэ лэстэ фартэ баро зор, важ кода кай во правий па нэбо. Кадя во сможэт май драго тэ поможый лэ манушэнди. Посли кода, сар о Иисусо рисайля каринг и жызня, во вазгляпэ по нэбо и бэшля па право вас лэ Иеговастар (Евреям 10:12, 13). Кала поджыля и время, о Дэл дя лэсти власть, и во ля тэ правий. (Адиносар Даниил 7:13, 14.)
3. Ко лэна тэ правин вмести лэ Иисусоса?
Вмести лэ Иисусоса по нэбо лэна тэ правин и мануша, пэ савэ андэ Библия ԥэнэнпэ «свынти» (Даниил 7:27). Лэн витидэл екжэно о Иегова. Пэрви, кас во витидя, када лэ Иисусостирэ апостолоря. Андэ амарэ деса инке стидэн «лэ свынтонэн», када и мурша и жувля, савэ кандэн лэ Дэвлэс. Сар и о Иисусо, вонэ ринпэ каринг и жызня андэ тила сар кай и анӷелоря. (Адиносар Иоанна 14:1—3; 1 Коринфянам 15:42—44.)
Скати мануша жана по нэбо? О Иисусо ԥэндя, кай лэн авэла набут, када 144 000 (Луки 12:32). Вонэ вмести лэ Иисусоса правина ла ԥувьяса. (Адиносар Откровение 14:1.)
4. Со тердяпэ, кала о Иисусо ля тэ правий?
Лэ Дэвлэско Царство ля тэ правий анда 1914 бэрш *. Пэрво, со стердя о Иисусо сар Царё, када сшутя па нэбо пэ ԥув лэ Сатанас и лэстирэ анӷелонэн. О Сатана фартэ росхоляйля и ля тэ терэл биды лэ манушэнди (Откровение 12:7—10, 12). Кодэла времятар кай и мануша ашэля фартэ бут ԥаримос. И войны, о боқалимос, о мэримос и землетрясении, вся када сыкавэл, кай лэ Дэвлэско Царство акана пашэ. (Адиносар Луки 21:7, 10, 11, 31.)
5. Со авэла кодэлэстар, кай правий лэ Дэвлэско Царство?
Адес па вся и ԥув росԥэнэн пала лэ Дэвлэско Царство. Важ када ужэ адес фартэ бут мануша анда разни нацыи ладин ек еқэса и жувэн сар ек ери. Милионоря мануша, савэ кандэн лэ Дэвлэс, ашэн лэ Иисусостирэ ученикоря. Лэ Дэвлэско Царство фэрия лэн андо Армагеддоно. Важ када всаворэнди, ко камэл тэ жувэл, кала правия лэ Дэвлэско Царство, трэбуй тэ сытён тэ кандэн лэ Иисусос. (Адиносар Откровение 7:9, 14, 16, 17.)
Важ 1 000 бэрш, андэ савэ правия о Христос, о Царство стерэла вся, со камэлас тэ стерэл о Дэл важ и мануша. Вся и ԥув ашэла раё. Посли када о Иисусо пэрэдэла о Царство пэстирэ Дадэсти (1 Коринфянам 15:24—26). Касти ту камлоп тэ росԥэнэс пала лэ Дэвлэско Царство? (Адиносар Псалом 37:10, 11, 29.)
^ абз. 6 Пала пророчество, саво сыкавэл по 1914 бэрш, росԥэнэнпэ андэ книжка «Сости сытярэл амэн и Библия?», страницы 248—249.
