Кала о Иисусо отдя пэстири жызня андэ жэртва, во спасысардя лэ манушэн, савэ предани лэ Дэвлэсти (Матфеё 20:28). Важ када андэ Библия ԥэнэнпэ, кай о Иисусо — када ла люмако Спасителё (1 Иоанна 4:14). Котэ кадяжэ пистромэ: «И нико авэр на спасый, важ кода кай никастэ пэ ԥув нинай авэр алав, саво динэ лэ манушэнди, через саво амэ можэм тэ спасысавас» (Деяния 4:12).

 О Иисусо «заля пэр пэстэ и смэрть пала всаворэ», ко сыкавэл, кай патял андэр лэстэ (Евреям 2:9; Иоанна 3:16). Потом, о Дэл воскресил лэс, и о Иисусо рисайля по нэбо сар анӷело (Деяния 3:15). Котэ о Иисусо «можэт андэ вся тэ спасый кодэлэн, ко через лэстэ пашол каринг о Дэл, важ кода кай во вся и время жундо, кай тэ мангэл важ лэндэ» (Евреям 7:25).

Васо амэнди трэбуй, кай о Иисусо тэ мангэл важ амэндэ?

 Амэ всаворэ ӷрешни (Римлянам 3:23). О бэзэх дурярэл амэн лэ Дэвлэстар и андярэл каринг и смэрть (Римлянам 6:23). Но о Иисусо мангэл лэ Дадэс пала кодэла, ко сыкавэл, кай патял андэ лэстири жэртва. (1 Иоанна 2:1) Во мангэл лэ Дэвлэс, кай во тэ виашунэл амарэ молитвы и тэ простий амарэ ӷрехоря через лэстири жэртва (Матфеё 1:21; Римлянам 8:34). О Иегова терэл кадя, сар мангэл о Иисусо, важ кода кай во екжэно кадя загиндосардя. О Иегова бишалдя лэ Иисусос пэ ԥув «кай через лэстэ тэ фэрий о миро» (Иоанна 3:17).

Кай тэ спасысавас, хутила кати тэ патяс андо Иисусо?

 Най. Канешно, амэ трэбуй тэ патяс андо Иисусо, кай тэ спасысавас, но о Дэл аштярэл амэндар инке варисо (Деяния 16:30, 31). Андэ Библия ԥэнэнпэ: «Сар и тила би жызняко мули, кадя жэ и вера би дилако мули» (Иакова 2:26). Кай тэ спасысавас, амэнди трэбуй:

•   Тэ уӷанас пала Иисусо и пала Иегова (Иоанна 17:3).

•   Инке май фартэ тэ патяс андэр лэндэ (Иоанна 12:44; 14:1).

•   Тэ сыкавас пэстири вера пэ дила — тэ жувас па лэ Дэвлэстирэ законоря (Луки 6:46; 1 Иоанна 2:17). О Иисусо сытярэлас, кай най кажно, ко ԥэнэн пэр лэстэ «Ӷосподо», спасыяпэ, «ай кати кодэва, ко терэл, со камэл... о Дад, саво по нэбо» (Матфеё 7:21).

•   Тэ сыкавас, кай патяс андо Дэл, дажэ кала исин ԥаримос. О Иисусо ворта ԥэндя пала када: «Ко виритярэла до конца, кодэва спасыяпэ» (Матфеё 24:13).