Най. Андэ Библия ԥэнэнпэ, кай тэ мангаспэ трэбуй кати лэ Дэвлэсти и через лэ Иисусоско алав. О Иисусо ԥэндя пэстирэ учениконэнди: «Мангэнпэ кадя: „Амаро Дад по нэбо, мэк тиро алав авэл свынто“» (Матфея 6:9). Во никала на сытярэлас, кай трэбуй тэ мангаспэ лэ свынтонэнди, лэ анӷелонэнди или инке варикасти, кроме Дэл.

 О Иисусо кадяжэ ԥэндя пэстирэ учениконэнди: «Мэ, дром, чачимос и жызня. Нико на авэл каринг мэрно Дад па аврятэ, сар кати через мандэ» (Иоанна 14:6). Кати лэ Иисусости о Дэл дя право тэ мангэл важ амэндэ (Евреям 7:25).

Со, если мэ мангавпэ и лэ Дэвлэсти, и лэ свынтонэнди?

 Андэ ек анда Дэш заповеди о Дэл ԥэндя: «Мэ, тиро Дэл, Дэл, саво камэл, кай ек лэсти тэ тэлён» (Исход 20:5). Андэ ек книжка ԥэнэнпэ: «Кадэла алава сыкавэн, кай о Дэл фартэ зашолпэ пала кода, кай ек лэсти трэбуй тэ тэлён». О Дэл аштярэл, кай амэ ласа тэ тэлювас и тэ мангаспэ кати лэсти (Исаия 48:11).

 Амэ на стас патив по Дэл, если мангаспэ варикасти инке, дажэ если када и свынти или и анӷелоря. Кала о апостоло Иоанно закамля тэ тэлёл лэ анӷелости, во тердярдя лэс и ԥэндя: «Тердюв, на тер када! Мэ кацаво жэ рабо, сар ту и тирэ ԥрала, савэ росԥэнэн пала Иисусо. Тэлюв лэ Дэвлэсти» (Откровение 19:10).