Iechto murș, o Adam thai leschi rromni i Eva, nas cherde te train ando cerii. O Del cherdeaias mai anglal le îngeren caște train ando cerii. I phuv si o than cai o Del dea-les le manușenghe, le murșenghe thai vi le jiuvlianghe (Iov 38:4, 7). O Del șiutea le iechto manușes ande-ch șucar paradiso, i bar cai bușiolas Eden (Geneza 2:15-17). O Iehova dea-les, les thai lesche șiaven i posibilitatea te bucurin-pe viațatar veșnico pi phuv. — Citisar Le Psalmi 37:29; 115:16.

Mai anglal, numai i bar le Edenoschi sas iech paradiso. O Adam thai i Eva trebulas te pheren i phuv pesche șiavența. Le timpoia, von trebunas te stăpânin sea-i phuv thai te cheren-la iech paradiso (Geneza 1:28). I phuv ci va avela distrugime niciechdata, voi va avela anda sea o timpo o chăr le manușengo. — Citisar o Psalmo 104:5.

Dich o materialo video Sostar cărdea o Del i phuv?

O Adam thai i Eva ci ascultisarde catoa Iehova. Anda codoia, vo dea-le avri andai bar. Cadea, o paradiso sas hasardo thai niciech manuș ci daisardea te chere-les parpale. I Biblia phenel: „I phuv sas dini po vast le nasulesco” (Iov 9:24). — Citisar Geneza 3:23, 24.

Meclea-pe o Iehova pesche scopostar le manușența? Nai sar! Vo si o mai zuralo thai ci greșil niciechdata (Isaia 45:18). O Del va cherela pale le manușes te avel perfecto cadea sar sas mai anglal. — Citisar o Psalmo 37:11, 34.

I phuv va avela pale Paradiso tela o raimos le Isusosco. O Isus ande-ch than pesche îngerența va distrugila sea-l dușmanen le Devlesche ando război cai bușiol Armaghedon.  Pala codoia o Isus va phandavela-l Satanos anda 1 000 bărș. O poporo le Devlesco va așela andi viața cana va avela cadai distrugerea pentru că o Isus îndrumi-les thai ocroti-les. Cadal manuș va bucurina-pe viațatar veșnico ando Paradiso pi phuv. — Citisar Revelația 20:1-3; 21:3, 4.

Cana va șiola o Del șăro le duchenghe pa-i phuv? O Isus dea iech „semno” cai sicavelas cana va pașola o sfârșito. Le buchia de aghies șion ando pericolo chiar i viața-l manușenghi thai si iech dovada că traisaras ando „phandaimos cadal sistemosco”. — Citisar Matei 24:3, 7-14, 21, 22.

Andi 1 000 le bărșănghi cana va raila andoa cerii pi phuv, o Isus va chosela i duch (Isaia 9:6, 7; 11:9). Sar Thagar thai i Baro Rașai vo va chosela le bezăha codolenghe cai iubin le Devles. Cadea, prin o Isus, o Del va duriarela o nasfalimos, o phurimos thai o merimos. — Citisar Isaia 25:8; 33:24.

Doar le manuș cai ascultin le Devlestar va traina ando Paradiso (1 Ioan 2:17). O Isus bișealdea pesche discipolen te roden le manușen cai sile o ilo lașio thai te sicaven-le so trebul te cheren caște aven aprobime le Devlestar. Aghies, o Iehova pregătil milioanea manușen caște daștin te train ando paradiso (Țefania 2:3). Codola cai aven cai sala le Regatoschi le Martorenghi le Iehovasche sichion sar daștin te aven rroma thai dada mai lașe sau rromnia thai deia mai lașia. Le șiave thai le dada anen ande-ch than închinarea le Devlesche thai sichion sar te ave-le iech viața mai lași. — Citisar Mica 4:1-4.