Imaginisar tuche i situația cai avel: I Heather prinjianel le Mikes de numai dui șiona, tha simțosarel că prinjianen-pe de cana si i lumea. Traden penghe sea o timpo mesajea, den duma but timpo co telefono hai gândin ande iech felo le dui! Tha acana, o Mike camel mai but sar te den duma.

De dui șiona, von numai încărde-pe vastendar hai dine penghe țâne ciumidipe. I Heather ci camel te jial mai dur, tha nici te hasarel le Mikes. Ji acana, chonic ci cărdea-la te simțol-pe cadea de șucar, cadea de specialo. „Ji la urmă”, phenel pesche voi, „iubisaras-ame . . .”

Dacă aveias cadea de maturo caște des tuche întâlniri hai aveias ande laco than, so chereias?

Dacă ci încăres conto de iech legea fizico, sar exemplo i legea gravitației, suportis le urmări. Sa cadea întâmplol-pe vi cana ci încăres conto de iech legea moralo, cai phenel: „Te na cheren curvia”. (1 Tesaloniceni 4:3)

Save si le urmări cana ci respectisaras cadai porunca? I Biblia phenel: „Con practichil i curvia cherel păcato contra pesco corpo”. (1 Corinteni 6:18) Ande ce senso?

 Le cercetări sicaven că but andal tărne cai sas-le relații sexualo angla te aven căsătorime, suportisarde iech sau mai but anda le urmări cai aven.

• SENTIMENTEA DOȘALE. Le mai but tărne cai sas-le relații sexualo angla te aven căsătorime phenen că, pala codoia, falea lenghe pharo.

• BI PACHIAMOS. Pala so cheren sexo, fiesavo pușel-pe ande peste: „Casa mai cărdea vo/voi sexo?”.

• DEZAMĂGIREA. Ande pengo sufleto, but tărne șeia camen te aven ocrotime, na folosime. Hai but tărne șiave phenen că ci mai placea-le iecha șeiatar casa cărde sexo.

• Ji la urmă: Dacă cheres sexo angla i căsatoria, anes pe tute lajiav hai hasares vareso cuci. (Romani 1:24) Chio corpo silo prea cuci caște des-les pe chanceste!

Sicav că situ zuralimos caște ‘na cheres curvia’. (1 Tesaloniceni 4:3) Tha cana avela te căsătoris-tu, va daștia te aven-tu relații sexualo. Atunci va avela te bucuris-tu lendar, bi te aves îngrijorime, bi te fal tuche pharo hai bi te daras, cadea sar simțon-pe codola cai încăren relații sexualo angla te aven căsătorime. (Proverbe 7:22, 23; 1 Corinteni 7:3)

• Varecon cai iubil-tu ciaces, va șiola ando pericolo chio sastimos fizico hai emoționalo?

• Varecon cai iubil-tu ciaces, va cherela-tu te rimosares chi relația le Devleia? (Evrei 13:4)