O Nicolas hai i Céline nachle prin aver pharimos. Von sas-le acharde catar i filiala andai Franța te jian ande iech nevi congregația. Von phenen: „Cana arăsleam, samas pherde bucuria tha, pala codoia astardea te avel amenghe doro amare cuci amalendar. Hai le phralența andai congregația ci sas amen încă iech amalimos chidino”. a Anda codoia că daștil te avel pharo, sar daștis te încăres chi bucuria hai te cheres but buchia cana muchis-tut ande iech nevi congregația? Sar daștin te ajutin le coaver phrala andai congregația? Hai sar daștis te aves zuriardo, tha vi tu te zuriares averen andai congregația?

ȘTAR BUCHIA CAI DAȘTIN TE AJUTIN AMEN

1. Mech tut andel vasta le Iehovasche. (Ps. 37:5) Kazumi, andai Japonia, cai slujisardea 20 bărșa ande iech congregația, trebuisardea te muchil-pe ande aver congregația anda codoia că laco rrom trebulas te cherel buchi ande aver than. So cărdea i Kazumi caște ‘mechel andel vasta le Iehovasche peschi rig’? Voi phenel: „Pâtărdem mânro ilo angla o Iehova hai phendem lesche sea so duchavelas man, sar avelas că astardea man i dar, că simțosardem man corcori hai că ci somas liniștime. De fiesavi data vo zuriardea man”.

Tha, so daștis te cheres caște meches tut mai but andel vasta le Iehovasche? Cadea sar iech lulughi bariol numai cana sila pai hai hamos anda phuv, sa cadea amaro pachiamos zuriarel-pe numai cana das-les hamos spiritualo. O Nicolas, anda savo  deam duma mai anglal, phenel că cana gândil-pe le bare buchiande cai cărde-len anda o Iehova murșa sar avelas o Avraam, o Isus hai o Pavel, lesco pachiamos că o Iehova va avela pașa leste zuriarel-pe. Cana cheres tuche timpo te sichios andai Biblia mai butivar po curco, va ajutila tut te așes zuralo hai fericime cana vareso paruvel-pe ande chi viața. Sa cadea va avela te bariares chio prinjianimos andai Biblia hai te phenes vi le coaverenghe andai nevi congregația so cuci barvalimata arachlean ando Lil le Devlesco.

2. Na cher comparația mașcar i congregația ande savi sanas mai anglal hai i nevi congregația. (Ecl. 7:10) Cana tiliardea anda o Benin hai muchisailo andel Statele Unite, o Jules trebulas te sichiol te trail pala iech cultura nevi. Vo phenel: „Falas-pe manghe că de fiesavi data cana prinjandemas varecas nevo ajucărelas te phenav sea so cărdem ande mânri viața”. Vo ci sas-lo sicado cadala buchiasa, cadea că astardea te duriarel-pe le phralendar andai congregația hai te așel corcoro. Tha, pala so prinjiandea mai mișto le phralen hai le pheian, parudea pesco phiraimos lența. O Jules phenel: „Pachiav că, oricai san pi phuv, le manușa sile sa cadea. So si diferime si sar phiraven-pe. Trebul te sichioas te traisaras pașa le coaver, cadea sar sile von”. Cadea că, na cher comparația mașcar i congregația ande savi sanas mai anglal hai i nevi congregația. I Anne-Lise, iech pioniera, phenel: „Ci tiliardem le gândosa te arachav so mechlem palal, tha, te dichav hai te arachav neve buchia”.

Vi iech phuro de congregație trebul te na cherel comparația mașcar i congregația ande savi sas mai anglal hai i nevi congregația. Daștil-pe că le phrala cheren le buchia aver felo. Tha, cadaia nai vareso nasul. Angla te phenes sar daștin te cheren iech buchi, si goghiaver te hachiares mai anglal sar cherel-pe ande codo than i buchi. (Ecl. 3:1, 7b) Na bâstăr că si mai mișto ca le coaver te sichion tutar, cana dichen so cheres sau sar phiraves tut, na cana phenes lenghe te cheren so pachias tu că si mișto. (2 Cor. 1:24)

3. Cher but buchia andi nevi congregația. (Filip. 1:27) Si ciaces, cana muchis tut ande aver than, trebul tuche but timpo hai zuralimos tha trebul te cheres sea so daștis caște jias ca le întruniri la congregațiache ando than cai încăren-pe. De chi zor te cheres cadaia chiar ande le dintune ghiesa cana arăses. Le phrala andai nevi congregația ci va daștina te ajutin tut dacă ci dichle tut niciechdata sau numai poiechdata. Iech phei, ande iech than pesche duie șeianța muchisaile ande iech baro foro andai Africa de Sud. Voi anel pesche andi goghi: „Sas manghe phendo te cherav sea so daștiv andi congregația, te jiav andi predicarea mânre phralența hai ca le întruniri. Chiar mechlem te cheren-pe le întruniri anda i predicarea ande mânro chăr”.

„Cana cheras phares buchi iech pașa aver” amare phralența, adică cana cheras le buchia save cheren-pe andi nevi congregația, zuriaras amen hai vi averen. I Anne-Lise, anda savi deam duma mai anglal, sas-li zuriardi le phurendar te jial andi predicarea sea le phralența hai pheianța andai  congregația. So miștimata sas-la? Voi phenel: „Dichlem pe mânri morci că, cana cărdem cadaia, ande țâra timpo, daisardem te simțosarav man mai pașă lendar”. Sa cadea, cana des anda chio timpo te cheres ujimos sau te ajutis cana lașiarel-pe vareso ca i Sala le Regatoschi, sicaves că i nevi congregația, arăslea te avel chi congregația. Chichi mai but cheres andi nevi congregația cadichi mai sigo va avela te simțosares tut sar chăre hai le phrala va avena chi nevi șucar familia spiritualo.

4. Cher tuche neve amala. (2 Cor. 6:11-13) Cana sicaves că duchal tut averendar, va avela te cheres tuche sigo neve amala. Cadea că, cher tuche timpo angla hai pala le întruniri caște prinjianes mai mișto le phralen hai le pheian andai nevi congregația. De chi zor te încăres andi goghi lenghe anava. Cana le phrala va dichena că jianes lenghe anava, că phiraves tut amalicanes, hai că daștin te pașion sigo tutar caște den duma, va camena te prinjianen tumen mai mișto hai chiar te aven lașe amala.

Chiar cana si normalo te cames ca le coaver te primin tut anda sea o ilo, na gândisar tut prea but so te cheres ca le coaver te dichen tut lașe iachența. Mech le coavere phralen te prinjianen tut cadea sar san ciaces. Daștis te cheres sar i Lucinda, voi phendea: „Acana, bucurisaras amen catar lașe amalimata andi congregația anda codoia că achardeam le phralen amende chăre te beșas ande iech than”.

„PRIMISAREN TUMEN ANDA ILO IECH AVERES”

Cana jias ande iech Sala le Regatoschi hai ci prinjianes chanicas, daștil te avel tuche lajiav hai te avel pharo anda tute. Sar daștis te cheres te simțon-pe mișto codolen neve cai aven? O apostolo Pavel zuriardea amen: „Primisaren tumen anda ilo iech averes, cadea sar vi o Cristos primisardea tumen anda ilo”. (Rom. 15:7) Cadea sar o Isus, le phure de congregație daștin te ajutin le coaveren te simțon-pe mișto andi nevi congregația. (Dich o chenarii: „ Cana muchis tut ande iech nevi congregația”.) Cu sea cadala, savore phrala hai pheia, chiar vi le șiavorre, daștin te cheren-pe amala codolența neve cai avile.

Cana ‘primisaras anda ilo le coaveren’ trebul te acharas-len amende chăre hai te ajutisaras-len sosa  si-len nevoia. Sar exemplo, iech phei, chiar cana sas-la but buchia te cherel, cărdea pesche timpo caște sicavel iecha pheiache nevi o foro hai te phenel lache sar daștil te jial le trenosa hai le autobuzosa ando foro. Cadai buchi zuriardea la pheia hai ajutisardea-la te arachel mai sigo pesco than.

IECH OCAZIA TE BARIOS SPIRITUALO

Angla ca i lăcusta te arăsăl bari, șiudel peschi morci tele mai butivar hai pala codoia daștil te pâtrel pesche pacha. Sa cadea, cana muchis tut ande iech nevi congregația, trebul te șiudes orisavo daraimos cai ci mechel tut te pâtres che pacha andi buchi le Iehovaschi. O Nicolas hai i Céline phenen: „Cana muchis tut daștis te sichios but buchia. Anda codoia că trebulas te sichioas sar te phiravas amen le manușența neve hai te traisaras amari viața diferime, bariardeam calități neve”. O Jean-Charles, de mai anglal, del duma anda le miștimata cai sas lesca familia: „Cana muchisaileam ande i nevi congregația, amare șiave astarde te lulughion hai te barion spiritualo. Numai pala chichiva șiona, amari șei camlea te încărel teme ca i întrunirea anda o mașcar le curchesco, hai amaro șiavo cărdilea vestitoro neboldo”.

Daștis te cheres vi tu so sichilean ande cado articolo, chiar dacă ci va avela te jias ande iech nevi congregația cai si nevoia ajutorostar? Sar te na! Dacă cheres cadaia, daștis te simțos tut ande chi purani congregația, sar ande iech nevi. Mech tut cu sea ando vast le Iehovasco hai cher sea so daștis andi congregația! Daștis te șios tuche andi goghi te jias andi predicarea avere phralența, te cheres tuche neve amala hai te zuriares le amalimata cai si tut acana. Mai but, daștis te ajutis le phralen neve sau codolen cai si-len nevoia tutar. Cana ajutis averen, pașios vi mai but le Iehovastar anda codoia că le ciace creștini sile prinjiande anda i iubirea cai sicaven-la. (Ioan 13:35) Daștis te pachias ciaces că „le Devles ciaiol-les cadal jertfe”. (Evr. 13:16)

Chiar cana sas-len but pharimata, but phrala daisarde te aven bucurime hai te cheren but buchia ande penghi nevi congregația. Jianas ciaces că vi tu daștis te cheres cadaia! I Anne-Lise phenel: „Anda codoia că muchisailem ande iech nevi congregația, daisardem te prinjianav mai bute phralen hai pheian”. I Kazumi phenel anda sea o ilo: „Cana muchis tut, daștis te diches o vast le Iehovasco sar ci mai dichlean-les”. Hai vi o Jules phenel: „Le neve amala cai cărdem-len manghe ajutisarde man te na mai simțov man sar cana ci somas anda codo than. Acana, ciaiol man cadea de but i nevi congregația, că avelas manghe pharo dacă trebulas te jiav ande aver than”.