Mintizro ya Vapostola 9:1-43
9 Kambe leswi Sawulo a a ha tiyimisele ku xanisa ni ku dlaya vadondzrisiwa va Hosi, a ye ka muprista lwenkulu
2 a tlhasa a mu kombela mapapela leswaku a ma yisa masinagogeni a Damaska, akuva a ta khoma hinkwavu lava lumbaka Ndlela, vavanuna ni vavasati, a va buyisa Yerusalema na va tsrimbiwile.
3 Nkama lowu a yendzraka, na a li kusuhi ni ku tlhasa Damaska, ku tekela ku va ni ku vaninga loku pfaka hi le tilweni ku mu tsrandzrela,
4 kutani a wa hansi, a yingela zritu dzri mu yangula dzri ku: “Sawulo, Sawulo, u ni xanisela yini?”
5 Sawulo a vutisa a ku: “Hi wene mani, Hosi?” Yene a ku: “Hi mine Yesu, lweyi u mu xanisaka.
6 Kambe sekeleka u nghena a doropeni, u ta byeliwa leswi u fanelaka ku swi yentxa.”
7 Kutani vavanuna lava a va yendzra na yene va yima va ku tititi, nakunene a va wu twa mpfumawulu wa zritu kambe a va nga voni mhunu.
8 Hiloko Sawulo a sekeleka hansi. Nambileswi a matihlo yake a ma pfulekile, a a nga ha voni ntxhumu, xileswo va mu khungisa hi voko va famba na yene Damaska.
9 A hete masiku mazrazru na a nga voni, a nga di nambi ku nwa ntxhumu.
10 A Damaska a ku ni mudondzrisiwa lweyi a a vitaniwa Ananiya, kutani a Hosi yi mu yangula lozrweni yi ku: “Ananiya!” Yene a ku: “Hi mine lweyi, Hosi.”
11 A Hosi yi mu byela yi ku: “Suka u ya xitaratwini lexi vitaniwaka Lulama, u ya kaya ka Yudasi u ya djuletela Sawulo wa le Tarso, hikusa swoswi hi vulavulaka a le ku khongoteni.
12 Nakone a ku vonile wene Ananiya a lozrweni na u nghena u mu tlhanteka mavoko akuva a tlhela a vona.”
13 Kambe Ananiya a mu hlamula a ku: “Hosi, ni yingele vhanu vanyingi va khanela hi wanuna lweyi, mayelanu ni mintxhumu hinkwayu ya ku biha leyi a yi yentxiki vaxwengi vaku a Yerusalema.
14 Nakone yene a lani hi mpfumelelo wa vaprista lavakulu akuva a ta khomelela* hinkwavu lava vitanaka vito dzraku.”
15 Kambe a Hosi yi mu byela yi ku: “Famba! Hikusa wanuna lweyi i xibya lexi ni xi hlawuliki akuva a twalisa vito dzranga ka matiko, ka tihosi ni ka vana va Israyele.
16 Hikusa ni ta mu komba ha hombe mahlomulo hinkwawu lawa a taka kumana na wone hi kola ka vito dzranga.”
17 Xileswo Ananiya a famba, a tlhasa a nghena mutini a mu tlhanteka mavoko a ku: “Sawulo, makwezru, Hosi Yesu lweyi a humeleliki kwaku a ndleleni na wa ha buya halenu, a ni zrume akuva u ta tlhela u vona ni kuva u tala hi moya wa ku xwenga.”
18 Ku tekela ku wa mintxhumu ya ku fana ni mayaya na yi sukela matihlweni yake a va a tlhela a vona, kutani a sekeleka a babatisiwa,
19 a tlhela a da swakuda a kuma ntamu.
A tsrhame masikunyana ni vadondzrisiwa a Damaska,
20 a va hi nkama wolowo a sungula ku zrezra a masinagogeni mayelanu na Yesu, leswaku Yesu i N’wana wa Xikwembu Nkulukumba.
21 Kambe hinkwavu lava a va mu yingela a va hlamala ngopfu swinene va ku: “A hi yene wanuna lweyi a a xanisa lava a va khanela hi vito ledzri a Yerusalema, a nga tanga lani akuva a ta va khoma* a va yisa ka vaprista lavakulu?”
22 Kambe Sawulo a a ya mahlweni a kuma ntamu nakone a Vayuda lava a va tsrhama a Damaska a va pfilunganyeka nkama lowu a va tlhamuxelaka hi ku khanya leswaku Yesu i Kriste.
23 Ntsrhaku ka masiku manyingi, a Vayuda va kunguhate ku mu dlaya.
24 Nambitanu, Sawulo a ma tivile makungu lawa a va li na wone. Va patsre ni ku zrindzra a tinyangweni ta doropa wusiku ni nhlikanhi akuva va kota ku mu dlaya.
25 Xileswo a vadondzrisiwa vake va mu teka ni wusiku va mu humesa hi mbangu wa kukazri lowu a wu pfulekile ka khumbi dzra doropa, va mu xikisa na a li ka ntsrhava wa wukulu.
26 Loko a tlhasa a Yerusalema, a yentxe minzamu ya kuva a tipatsra ni vadondzrisiwa kambe hinkwavu a va mu txhava hikusa a va nga kholwi leswaku a ndzruluke mudondzrisiwa.
27 Xileswo Barnaba a ya mu pfuna a mu yisa ka vapostola, a tlhasa a va tlhamuxela hi wunyaminyami ndlela leyi Sawulo a voniki Hosi ha yone a ndleleni, ndlela leyi yi vulavuliki na yene ha yone ni ndlela leyi a vulavuliki ha yone hi xixixi hi vito dzra Yesu a Damaska.
28 Kutani Sawulo a tsrhama na vone, a fambafamba Yerusalema na a ntsrhunxekile* a tlhela a vulavula hi vito dzra Hosi na a nga txhavi ntxhumu.*
29 A a vulavula ni ku phikisana ni Vayuda lava a va vulavula Xigriki kambe vone a va djuletela tindlela ta ku mu dlaya.
30 Loko vamakwezru va swi gungula, va fulamela na yene va ya Khezariya lani va gamiki va mu zrumela a Tarso.
31 Nakunene, a mabandla hinkwawu ya le Yudeya, Galileya ni le Samariya ma ve ni ku zrula, ma tiyisiwa; nakone a nhlayu ya vadondzrisiwa yi ya yi yengeseleka hikusa a va hanya hi ku txhava Yehovha ni hi ku tiyisiwa hi moya wa ku xwenga.
32 Na Petro a fambafamba a mugangeni hinkwawu a tlhase ni ka vaxwengi lava a va tsrhama a Lida.
33 Kolanu a kume wanuna lweyi a vitaniwaka Eneya, lweyi a a ni 8 wa malembe na a tsrhama na a yetlelile a mubedweni wake hikusa a a wome swizro.
34 Petro a mu byela a ku: “Eneya, Yesu Kriste awa ku hanyisa, pfuka u bekisa mubede waku.” Hi nkama wolowo a tekela ku sekeleka.
35 Loko hinkwavu lava tsrhamaka Lida ni Sarona va mu vona, va pfumela ka Hosi.
36 A Yopa a ku ni mudondzrisiwa lweyi a a vitaniwa Tabita, leswi loko swi ndzruluteliwa swi liki “Dorka.”* A a yentxa mintxhumu yinyingi leyinene nakone a a tlhela a swi pfuna ngopfu swinene swisiwana.
37 Kambe a masikwini wolawo na Petro a ha li Lida. Dorka a vabyile a gama a fa. Xileswo va mu hlampswa va mu beka ka kwartu dzra kukazri ledzri a dzri kumeka henhla.
38 Leswi Lida a ku li kusuhi ni Yopa, loko vadondzrisiwa va twa leswaku Petro a le doropeni dzroledzro, va zruma vavanuna vabidzri akuva va ya mu kombela va ku: “Hi kombela u kahlula u buya halenu kwezru.”
39 Xileswo Petro a suka a famba na vone. Loko a tlhasa, va mu yisa ka kwartu ledzri a dzri kumeka henhla, kutani a vafelwa hinkwavu va mu tsrhindzrekelela na va dzrila, va mu komba timpahla hinkwatu leti Dorka a va hambeliki tone na a ha na vone.
40 Ntsrhaku ka leswo, Petro a humesa hinkwavu handle a gama a khinsama a khongota. Kutani a ndzruluka a lavisa ntsrumbu, a ku: “Tabita, pfuka!” Hiloko Tabita a pfula matihlo, kutani loko a vona Petro, a pfuka a tsrhama.
41 Petro a mu khoma hi voko a mu sekelekisa a gama a vitana vaxwengi ni vafelwa, hinkwavu va swi vona leswaku Tabita awa hanya.
42 Leswo swi tiviwe a doropeni hinkwadzru dzra Yopa, va va vhanu vanyingi va pfumela ka Hosi.
43 A tsrhame masiku ya manyingi a Yopa na Simoni muzrungi wa swikhumba.
Tintlhamuxelo ta le hansi
^ Hi ku kongoma: “a ta tsrimba”.
^ Hi ku kongoma: “a ta va tsrimba”.
^ Hi ku kongoma: “a nghena na a huma”.
^ Kumbe: “hi xixixi”.
^ Vito dzra Xigriki ledzri liki Dorka ni dzra Xiyaramayika ledzri liki Tabita ma tlhamuxela leswaku “Mhunti”.
