Papela ledzri yaka ka Varoma 14:1-23
14 Mu yamukelani mhunu lweyi a nga ni lipfumelo ledzri tsraniki, kambe mi nga va yavanyisi lava nga ni mavonela lama hambaniki ni yenu.
2 Mhunu lweyi a nga ni lipfumelo ledzri tiyiki a da hinkwaswu, kambe lweyi a nga ni lipfumelo ledzri tsraniki o da matsavu ntsena.
3 Lweyi a daka hinkwaswu, a nga fanelanga a mu vonela hansi lweyi a kalaka a nga di hinkwaswu, ni lweyi a kalaka a nga di hinkwaswu a nga fanelanga a yavanyisa lweyi a daka hinkwaswu, hikusa Xikwembu Nkulukumba a mu yamukelile mhunu lweyo.
4 U mani wene akuva u yavanyisa nandzra wa mun’wana? A n’winyi wake hi yene a fanelaka ku hlaya leswaku leswi nandzra wake a swi yentxaka i swinene kumbe swi bihile.* Nakunene, hi ku pfuniwa hi Yehovha a nga swi kota ku yentxa leswinene.
5 Van’we va pimisa leswaku siku dzra kukazri i dzra lisima ngopfu swinene ku tlula masiku man’wana; nakasi van’wana va pimisa leswaku masiku hinkwawu ma fana; mun’wana ni mun’wana a fanela ku tiyiseka leswaku leswi a swi kholwaka i swinene.
6 Lava va vonaka siku dzra kukazri na dzri li dzra lisima ngopfu ku tlula masiku man’wana, va swi yentxela ku twalisa Yehovha. Lava va daka hinkwaswu, na vone va dela ku twalisa Yehovha, hikusa va mu tlangela Xikwembu Nkulukumba hi swakuda swoleswo; ni lava va kalaka va nga di, na vone va mu twalisa Yehovha nakone va mu tlangela.
7 Nakunene a nga kone ni mun’we wezru lweyi o ko tihanyela, nakone a nga kone ni mun’we wezru lweyi o ko tifela.
8 Hikusa loko hi hanya, hi hanyela Yehovha, ni loko hi fa, hi fela Yehovha. Xileswo, loko hi hanya ni loko hi fa, hi va Yehovha.
9 Nakunene hi leswo swi yentxiki leswaku Kriste a fa a tlhela a hanya, akuva a ta va Hosi ya lava fiki ni ya lava hanyaka.
10 Kambe ha yini u yavanyisa makwenu? Kumbe ha yini u mu vonela hansi makwenu? Hikusa hinkwezru hi ta yavanyisiwa hi Xikwembu Nkulukumba.*
11 Hikusa ku tsraliwe leswi: “‘Swanga hi leswi nakunene ni hanyaka’, ku hlaya Yehovha, ‘hinkwavu va ta ni khinsamela,* nakone hinkwavu va ta* pfumela leswaku ni Xikwembu Nkulukumba’.”
12 Xileswo mun’wana ni mun’wana wezru a ta tihlamulela ka Xikwembu Nkulukumba.
13 Kutani hi nga ha yavanyisananeni, a matsrhan’wini ya leswo, a hi tiyimiseleni ku va hi nga txhuki hi yentxa ntxhumu wa kukazri lowu nga tsranisaka lipfumelo dzra makwezru kumbe wu mu wisa.*
14 Swanga mulandzreli wa Hosi Yesu, na swi tiva nakone na kholwiseka leswaku a ku na ntxhumu lowu tinyamisiki* ha wuswawone; kambe loko mhunu a pimisa leswaku ntxhumu wa kukazri wu nyamile, kutani swi va na swi bihile kwake kuva a wu da.
15 Hikusa loko makwenu a vaviseka hi mhaka ya swakuda leswi u swi daka, u va na u nga ha kombisi lizrandzru. U nga hohloti lipfumelo dzra lweyi Kriste a mu feliki hi mhaka ya swakuda leswi u swi daka.
16 Xileswo, mi nga yentxi leswaku ku vulavuliwa ku biha hi mintxhumu leyinene leyi mi yi yentxaka.
17 Hikusa akuva mhunu a nghena a Mfun’wini wa Xikwembu Nkulukumba, a swi yi hi leswi a swi daka ni ku swi nwa, kambe a fanela ku va lweyi a lulamiki, a va ni ku zrula ni vhanu van’wana ni ku nyonxa, leswi a swi kumaka hi ku pfuniwa hi moya wa ku xwenga.
18 Hikusa mun’wana ni mun’wana lweyi a tizrelaka Kriste hi ndlela leyi, awa yamukelaka ka Xikwembu Nkulukumba ni le ka vhanu.
19 Xileswo a hi yentxeni hinkwaswu leswi hi nga swi kotaka akuva hi byala ku zrula hi tlhela hi tiyisanana.
20 Tsrhikani ku hohlota ntizro wa Xikwembu Nkulukumba hi mhaka ya swakuda ntsem. I ntiyiso leswaku swakuda hinkwaswu swa yamukeleka, kambe swi bihile ku da ntxhumu wa kukazri loko a li leswaku swi ta tsranisa lipfumelo dzra mhunu mun’wana.*
21 Swa yampswa ku va u nga di nyama kumbe ku nwa vhinyu, kumbe ku yentxa ntxhumu wun’wana lowu taka tsranisa lipfumelo dzra makwenu.*
22 Leswi u swi pfumelaka mayelanu ni timhaka leti, a swi ve swaku na Xikwembu Nkulukumba. Awa nyonxa mhunu lweyi a kalaka a nga titwi nandzru hi ku va a yentxa mintxhumu leyi a yi vonaka yi li yinene.
23 Kambe loko a ganaganeka, a va na a ni nandzru loko a da, hikusa leswi a swi yentxaka a nga swi yentxi hi ku susumetiwa hi lipfumelo. Nakunene, hinkwaswu leswi hi swi yentxaka na hi nga susumetiwi hi lipfumelo, i xidoho.
Tintlhamuxelo ta le hansi
^ Hi ku kongoma: “Loko a yima a yimela n’winyi wake, ni loko a wa a wela n’winyi wake”.
^ Hi ku kongoma: “hi ta yima mahlweni ka xitsrhamu xa wuyavanyisi xa Xikwembu Nkulukumba”.
^ Hi ku kongoma: “a matsrolo hinkwawu ma ta ni khinsamela”.
^ Hi ku kongoma: “a tindzrimi hinkwatu ti ta”.
^ Hi ku kongoma: “ku va hi nga beki zribye dzra ku wisana kumbe xihinga a mahlweni ka makwezru”.
^ Kumbe: “tintxhimisiki”.
^ Hi ku kongoma: “swi ta wisa mhunu mun’wana”.
^ Hi ku kongoma: “lowu taka wisa makwenu”.
