Ni pswaliwe a Paddington, ku nga xidoropana lexi a ku tsrhama vhanu vanyingi xa le Londres a Inglaterra. A ni tsrhama na mamana ni vamana vanga vazrazru. A hi nga twanani na papayi hi mhaka ya leswi a a famba a hi siya hikusa a a nwa ngopfu.

Na ne he ntsrongo, mamana a ni dondzrise leswaku ni fanela ni khongota wusiku byin’wana ni byin’wana. A ni ni Bibele dzra dzritsrongo ledzri a dzri ni buku dzra Amapsalma ntsena, nakone a ni tihambele manota akuva ni ta kota ku ma yimbelela. Siku dzrin’wana na ni dondzra buku dzrin’wana ni kume mazritu lawa ma ni khumbiki. Mazritu ya kone a ma ku: “Siku dzrin’wana hi ta yetlela hi nga ha pfuki.” Mazritu wolawo ma ni tsrone wuzrongo lakakuva ni hete wusiku hinkwabyu na ni li kazri ni yanakanyisisa hi wumundzruku. Hi wugamu ni tivutise leswi: ‘Xana wutomi byi ni nkongometo?’ Ni tlhele ni tivutisa ni ku: ‘Xana ni hanyela yini?’ A ni txhava ku fa!

Ni sungule ku djula ku tiva swinyingi hi wungoma. Ni sungule ku phahla, ku ya a masizreni ni vanghanu vanga va le xikole nakone a hi hlalela mafilme ya ku txhavisa. Nambi leswi a swi hi txhavisa, a swi hi nyonxisa.

Na ni ni malembe ya khume, ni sungule ku ka ni nga ha lawuleki. Ni sungule ku dzraha masigari nakone swi nga si ya kwini a swi ni nghene ngatini. Hi ku famba ka nkama ni sungule ku dzraha mbangi. Na ni ni malembe ya 11, ni dondzre ku nwa byala. Nambi leswi a byi bava, a ni nyonxisiwa hi ku popswa, nakone a ni zrandzra wuyimbeleli ni ku kina. A ni ya a swinkhubyaneni ni le mimbangwini ya ku hungata ka yone a wusikwini. A ni timela a kaya a wusikwini, ni buya a mpundzrwini. Hi mundzruku ka kone a ni va na ni kazrhale ngopfu nakone a xikole a ni bela homana. A siku a ni txhuka ni ya a xikole, a ni tolovela ku tsrutsruma ni ya n’wa byala na ka ha dondzriwa.

Loko ni tlhase ka lembe dzranga dzra wugamu dzra xikole, ni xumbarile. Leswi mamana a nga yi tivi ndlela leyi a ni hanya ha yone, u hele ntamu a tlhela a hlundzruka loko a twa leswaku ni xumbarile. Hi holovile ni va ni zruzra a kaya. Ni zruzre ni ya tsrhama ni djaha dzranga Tony ledzri a dzri li Murasta. A dzri yiva dzri tlhela dzri xavisa timbangi nakone a dzri tiviwa ngopfu hi madzolonga. Swinga si ya kwini, ni kume nyimba nakone loko ni ni malembe ya 16 ni pswale n’wana wa djaha.

Ni tlhangane ni Timboni ta Yehovha hi khambi dzra ku sungula loko na ha tsrhama a mutini wa kukazri lowu a wu zruzrela vamamana lava nga tekiwangakiki ni vana vavu. Valawuli va mbangu wolowo va ni nyike kwartu ledzri a ni tsrhama ka dzrone. Nkama ni nkama Timbhoni tibidzri ta xisati a ti yendzrela vamamana van’wana lava na vone a va tsrhama kolanu. Siku dzrin’wana na mine ni hlengelile loko va li kazri va dondzra. Nkongometo wanga a ku li ku komba Timboni leswaku leswi ti swi dondzrisaka a hi ntiyiso. Kambe hi moya wa ku zrula ni hi ndlela leyi twisisekaka, ti hlamule swivutiso swanga hinkwaswu hi ku tizrisa Bibele. Lexi ni nyonxisiki ha tone hi leswaku a ti li ni timpswalu ni xinghanu. Hi kola ka leswo, ni pfumelile leswaku ti ni dondzrela Bibele.

Ni dondzre hi mintxhumu yimbeni a Bibeleni leyi txintxiki wutomi byanga. Ku sukela loko ne he ntsrongo a ni txhava ku fa. Kambe swoswi kutani ni tiva leswi Yesu a swi dondzrisiki mayelanu ni ku pfuxiwa ka vafi! (Yohan 5:28, 29) Ni tlhele ni dondzra leswaku Yehovha awa zron’weka ha mine. (1 Petros 5:7) Ni khumbiwe ngopfu hi mazritu lama kumekaka ka Yeremiya 29:11, lama liki: ‘Hikuva ndzri tiva swipimiso leswi ndzri swi pimisaka ha n’wine, ku hlaya Yehovha, a swipimiso swa ku zrula, swi nge swa khombo, ku n’wi nyika ku lavisela a ku heleni kwenu.’ Ni sungule ku dumba leswaku na mine ni nga va na kone ku lavisela ka ku hanya hi la ku nga helikiki a misaveni leyi nga Paradeyisi.—Amapsalma 37:29.

Timboni ta Yehovha ti ni kombe lizrandzru dzra ntiyiso. Loko ni ye a mintlhanganwini ya tone hi khambi dzra ku sungula, vhanu va kone hinkwavu a va nyonxile va tlhela va va ni xinghanu! (Yohan 13:34, 35) Ndlela leyi ti ni khomiki ha yone, a yi hambane swinene ni leyi a ni khomiwe ha yone a kezrekeni dzra lomu a ni tsrhama kone. Timboni ti ni yamukele hi mandla mabidzri, nambi leswi mahanyela yanga a ma nga li manene. Ti ni lehisele mbilu, ti ni khoma ha hombe, ti ni yingiseta loko ni vulavula ti tlhela ti ni pfuna. Ni titwe na ni yamukelekile nakone na ni li a kaya.

Loko ni li kazri ni dondzra Bibele, ni xiye leswaku ni fanela ku txintxa mahanyela yanga loko ni djula ku nyonxisa Xikwembu Nkulukumba. A swi ni bindzrela swinene ku tsrhika ku dzraha masigari. Ni tlhele ni xiya leswaku wuyimbeleli byin’wana lebyi a ni byi yingiseta, a byi yentxa leswaku ni navela ku dzraha mbangi, kutani ni teke xiboho xa ku byi tsrhika. Leswi a ni djula ku tsrhika ku popswa ni tsrhike ku ya a swinkhubyaneni ni ku ya a mimbangwini ya hungata ka yone a wusikwini. Ni tlhele ni djula vanghanu lava a va ta ni kutxetela ku yentxa mintxhumu leyinene.—Amaproverbia 13:20.

Tony na yene a sungule ku dondzra Bibele ni Timboni ta Yehovha. Loko Timboni ti hlamule swivutiso swakwe hi ku tizrisa Bibele, a kholwile leswaku leswi a a swi dondzra i ntiyiso. A txintxe wutomi byakwe, a tlhela a tsrhika vanghanu vakwe lava nga ni madzolonga, a tsrhika ku yiva ni ku dzraha mbangi. Leswaku hi nyonxisa Yehovha, ha wubidzri byezru hi txintxe mahanyela yezru ya khale kutani hi wundla n’wanezru wa djaha hi ndlela leyinene nakone hi 1982 hi tekane hi nawu.

Ni djuletele tinhlokomhaka leti vulavulaka hi vhanu lava va kotiki ku txintxa wutomi bya ku fana ni lebyi a ni byi hanya ka revhixta dzra Xihondzro xa Zrindzra ni Pfukani! * Swikombiso swavu swi ni kutxe swinene nakone swi yentxe leswaku ni nga godoli. A ni khongota ka Yehovha ni kombela leswaku a nga ni tsrhiki. Mine na Tony hi babatisiwile hi va Timboni ta Yehovha hi Julhu wa 1982.

Ku va ni wuxaka na Yehovha Xikwembu Nkulukumba swi huluxe wutomi byanga. Nakone mine na Tony hi vone ndlela leyi Yehovha a hi seketeliki ha yone hi nkama wa mahlomulo. Hi dondzre ku tsrutsrumela ka Yehovha hi minkama yoleyo ya ku kazrata swinene nakone ha swi xiya leswaku minkama hinkwayu awa hi seketela ni ku hlayisa ndangu wezru.—Amapsalma 55:22.

Ni tlhele ni dondzrisa vana vezru ku zrandzra Yehovha ku fana ni ndlela leyi ni mu zrandzraka ha yone. Swoswi ni nyonxa swinene loko ni vona vatukulu vanga na vone va zrandza Yehovha. Swoswi ni nyonxa swinene loko ni vona vatukulu vanga na vone va zrandza Yehovha.

A wusikwini a na ha kazrateki hi ku vilela hi wumundzruku kumbe hi ku txhava ku fa. Mine na Tony hi khomekile hi ntizro wa yendzrela mabandla ya ku hambanahambana ya Timboni ta Yehovha vhiki ni vhiki akuva hi ma tiyisa. Nakone hi tikholisa hi ku dondzrisa van’wana leswaku loko va va ni lipfumelo ka Yesu, na vona va nga tikholisa hi vutomi lebyi nga helikiki.