Bibele dzri dzrungula leswaku ntsrhaku ka loko va-Midian va teke Yosefa va famba naye a Egipta, mupatriarka Yakobe ni ndangu wakwe va suke Kanana va zruzrela a tikweni dzra Egipta. Va ye tsrhama a mugangeni lowu vitaniwaka Goxen, a Nkoveni wa Nile. (Gn 47:1, 6) Va-Israyele va sungule ku ‘yandzrisisa, va va vanyingi ngopfu’. Xileswo, va-Egipta va sungule ku txhava va-Israyele ni ku va sindzrisa leswaku va va swikazrawa.​—Eks 1:7-14.

Tintivi ta kukazri ta masiku lawa ti mpfhave dzrungula dzra Bibele ledzri kombisiwaka lani henhla, ti hlaya leswaku a hi dzra ntiyiso. Nambitanu, ku ni wumboni lebyi kombisaka leswaku va-Xemi * va ve swikazrawa a Egipta wa khale.

Hi xikombiso, vayembuli va gungule mazrumbi a n’walungu ka Egipta. Dotori John Bimson a dzrungule leswaku ku ni wumboni bya ku tlula 20 wa mimbangu leyi ku nga mazrumbi ya va-Xemi a n’walungu ka Egipta. Handle ka leswo, James Karl Hoffmeier, lweyi a kambisisaka minkhuva ya va-Egipta, a te: “Hi kolomu ka ma-1800 ku ya ka ma-1540 M.N.Y., a tiko dzra Egipta a dzri li mbangu lowu a wu naveliwa hi va-Xemi lava a va huma a Ásia Ocidental leswaku va zruzrela ka dzrone.” A yengetele a ku: “Nguva leyo yi kotlana ni nkama lowu tiviwaka swanga ‘Nguva ya Vapatriarka’. Xileswo, yi kotlana ni nguva ni swiyentxakalo leswi ku khaneliwaka ha swone ka buku dzra Genesis.”

Ku ni wumboni byin’wana lebyi kumiwiki a nyingitimu wa Egipta. Papela dzra xikhale ledzri nga dzra kolomu ka 2000 ku ya ka 1600 M.N.Y. dzri ni mavito ya swikazrawa leswi a swi tizra a mutini wa kukazri a nyingitimu wa Egipta. Mavito lama tlulaka 40 wa wone i ya vhanu va lixaka dzra va-Xemi. Swikazrawa leswi, kumbe malandzra, a swi tizra ka ku sweka, ka ku luka ni ka ku yentxa mintizro yin’wana. Hoffmeier, lweyi a kambisisaka mikhuva ya va-Egipta, a kombise leswi: “Leswi va-Xemi lava tlulaka 40 a va tizra ka muti wun’we a Thebaid [nyingitimu wa Egipta], nhlayu ya va-Xemi lava nhingeniki a Egipta, ngopfu-ngopfu a Nkoveni wa Nile, yi tikomba na yi li yikulu.”

David Rohl, lweyi a tizraka swanga muyembuli, a tsrale leswaku man’we ka mavito ya swikazrawa leswo lama kumekaka ka papela dzra xikhale ledzri kumiwiki “ma fana swinene ni mavito lawa ku khaneliwaka ha wone Bibeleni”. Hi xikombiso, papela ledzro dzri ni mavito ya ku fana ni ya ku Yissakar, Axer na Xifra. (Eks 1:3, 4, 15) Rohl a gamise hi ku hlaya leswi: “Ku ni wumboni lebyi nga ntiyiso bya leswaku va-Israyele va ve swikazrawa a Egipta.”

Dotori Bimson a te: “Leswi Bibele dzri swi hlayaka mayelanu ni wukazrawa a Egipta xikan’we ni ku zruzra ka vhanu swa seketeliwa hi matimu.”