Fäeag hete‘ “painia” a‘mou ạligen iris ne aoa ut fo‘ou ma säe sal la iris ne tore la tạupir sin. Jisu iạ painia, ne fekạu‘ạkim la a‘sokoa garue maragat ne la säea sal ne a‘mȧür‘ạkiga se famori. (Mataio 20:28) ‘On lelea‘ rak tē, ‘e ‘on ‘i‘i, tạupir se iạ ‘e ‘es‘av‘ȧk ne ‘oris ava ‘la rē tisaipel.’ (Mataio 28:19, 20) Ma‘oit pō ma ‘es väeag ‘e garuet ne ‘ạmis he‘ garue ne painia.

Painia ‘ea se le‘et ne garue a‘mou la marag‘ạkia rog heg ta. Famör Uetnes ‘atakoa ‘on Jihova marag‘ȧk rog heg ta. Ka iris ‘on rereag rē puer vȧh ‘oris mạuri la painia hạisokoag, ta‘ag ‘e laloag ne hulet iris la garue aoa 70 ‘e garue marag ta. Iris he his garue tög ‘e terȧn he his la pō la iris la nā av la painia. Ma iris hoi‘ȧk hil la painia a‘pumuạ‘ạki la marag‘ạkia Pure‘ag ‘on ‘Ạitu,‘e ut ne pa ‘es lelea‘ garue ma‘oi. Iris garue‘ȧk aoa 130 ne sir, ‘e te‘ ne huạl ‘i se garue marag ta. Iris a‘vavhinen ‘oris mạuri, ‘e rēko iris tua‘nȧk se Jihova la nā‘ia tē ne iris kop la ‘es ‘e ‘oris mạuri ‘e te‘ ne terạni. (Mataio 6:31-33; 1 Timoti 6:6-8) Iris ne kat pō ra la painia a‘mou, la pō la painia hạiasoag ‘e av ne iris la pō, ta‘ag la ‘ut‘ạkia se muạ ‘oris garue marag ta se aoa 30 ne 50 hulet.

Hanisi se ‘Ạitu ma famori ta rue‘ạkia le‘et la painia. La fak se Jisu, ‘ạmis räe ne ma‘oit ‘e terạni te ‘i pa ‘es pạu la ‘inea‘ia ‘Ạitu ma ‘on ‘amnạki. (Mareko 6:34) ‘Inea tēet ne täe ‘e ‘ạmisa, la pō la hạiasoagan famori ‘e ‘on ‘i‘i la a‘ne‘ne‘ạkia ‘oris ạiröt‘ạkiga se avat ne ‘ut‘utum. Hanisi se ‘on kạinaga ta rue‘ạkia iạ ne painia la nā ‘on ava ma ‘on ne‘ne‘i la hạiasoag fak‘atan iris ne tore. (Mataio 22:39; 1 Tesalonaika 2:8) ‘On a‘sokoag ne tē ‘i täla a‘ne‘ne‘ạkia ‘on pilifi, ‘on hại‘eleag ma ‘Ạitu, ma iạ la ‘oaf‘oaf a‘ti‘.​—Garue 20:35.

• Ka garue tese ta iạ ne painia a‘soko?

• Ka tes ta rue‘ạkia iris ‘e ‘on rerege la garue painia a‘mou?