Amafoto y’i Warwick (Igice cya 6: Werurwe–Kanama 2016)
Aya mafoto agaragaza ukuntu imirimo yo kubaka icyicaro gikuru cy’Abahamya ba Yehova yagiye ikorwa n’ukuntu abavolonteri bashyigikiye iyo mirimo kuva muri Werurwe kugeza muri Kanama 2016.
Dore uko akurikirana:
Igaraji
Parikingi y’abashyitsi
Inzu Urwego Rushinzwe Kwita ku Mazu n’Ibikoresho ruzakoreramo, ikaba irimo na parikingi y’abagize umuryango wa Beteli
Inzu y’amacumbi ya B
Inzu y’amacumbi ya D
Inzu y’amacumbi ya C
Inzu y’amacumbi ya A
Inzu y’ibiro ikorerwamo n’indi mirimo
Tariki ya 16 Werurwe 2016: Ku kibanza cy’i Warwick
Abatera ubusitani barimo barapakurura ibiti. Ku kibanza cya Warwick hazaterwa ibiti bigera ku 1.400.
Tariki ya 23 Werurwe 2016: Mu igaraji
Abakora i Warwick bizihiza Ifunguro ry’Umwami rya Nimugoroba. Aha hateraniye abantu 384, kandi Abahamya ba Yehova bo ku isi hose bizihiza uwo muhango buri mwaka.
Tariki ya 15 Mata 2016: Ku kibanza cy’i Warwick
Bashyira amadirishya ku nzu yo ku marembo. Abakora ku marembo bazajya bakira abashyitsi, bacunge umutekano w’ikigo kandi bakurikirane uko imodoka zinjira n’uko zisohoka.
Tariki ya 19 Mata 2016: Inzu y’ibiro ikorerwamo n’indi mirimo
Umwana na se basasa uduce twa tapi mu kirongozi, mu igorofa rya kabiri. Ahantu abantu bakunze kunyura, hashyizwe uduce twa tapi kuko byoroha kudusimbuza.
Tariki ya 27 Mata 2016: Inzu y’ibiro ikorerwamo n’indi mirimo
Bashyiraho inkuta zimukanwa zitandukanya ibiro. Ibyo bizajya bituma bahindura uko ibiro biteye bihuje n’ibizaba bikenewe.
Tariki ya 10 Gicurasi 2016: Inzu y’ibiro ikorerwamo n’indi mirimo
Umukozi utunganya ahazashyirwa ubwiherero hafi y’aho bakirira abantu.
Tariki ya 26 Gicurasi 2016: Ku kibanza cy’i Warwick
Abagize ikipi ishinzwe kuzimya umuriro bari mu myitozo. Iyo myitozo ibafasha kurokora ubuzima bw’abantu n’ibintu, no korohereza inzego zishinzwe kuzimya umuriro zo muri ako gace.
Tariki ya 30 Gicurasi 2016: Inzu y’ibiro ikorerwamo n’indi mirimo
Umuntu urimo yicaza abakora i Warwick mu cyumba cyo kuriramo, mbere y’uko batangira gukurikirana gahunda yo gusenga ya mu gitondo ibera ahandi hantu.
Tariki ya 31 Gicurasi 2016: Inzu Urwego Rushinzwe Kwita ku Mazu n’Ibikoresho ruzakoreramo, ikaba irimo na parikingi y’abagize umuryango wa Beteli
Umukozi ashyiraho icyapa kizajya kiyobora abagize umuryango wa Beteli n’abashyitsi. Hazashyirwaho ibyapa bigera ku 2.500.
Tariki ya 1 Kamena 2016: Inzu y’ibiro ikorerwamo n’indi mirimo
Umuntu usudira arimo arashyiraho utwuma tugota esikariye zigana mu cyumba abagize umuryango wa Beteli bazajya bateraniramo. Uwo mwenda ugaragara, ni wo akoresha kugira ngo atangiza ibyarangije kubakwa.
Tariki ya 9 Kamena 2016: Inzu y’ibiro ikorerwamo n’indi mirimo
Umwubatsi urimo akora finisaje ku rukuta rwerekeye ahazajya habera imurika rivuga ngo “Kugaragaza ukwizera;” aho ni hamwe mu hantu hatatu umuntu azajya yitembereza. Imyubakire y’ahantu izajya iba ijyanye n’ibikorwa biherekanirwa.
Tariki ya 16 Kamena 2016: Igaraji
Abakozi barimo batunganya beto kugira ngo ibe ikomeye. Ibyo bituma aho iri hakomera cyane, hakamara igihe kirekire kandi hagasukurwa mu buryo bworoshye.
Tariki ya 29 Kamena 2016: Inzu y’ibiro ikorerwamo n’indi mirimo
Abakora igisenge barimo barashyiraho amabati abonerana hejuru y’aho bakirira abantu. Ayo mabati abonerana atuma hinjira urumuri.
Tariki ya 29 Kamena 2016: Inzu y’ibiro ikorerwamo n’indi mirimo
Umugabo n’umugore we barimo barashyiraho amabuye imbere y’aho abashyitsi bazajya baca bagiye mu nzu irimo imurika rivuga ngo “Bibiliya n’izina ry’Imana.”
Tariki ya 6 Nyakanga 2016: Inzu y’ibiro ikorerwamo n’indi mirimo
Umukozi utera intebe mu cyumba abagize umuryango wa Beteli bazajya bateraniramo; icyo cyumba kizajyamo intebe 1.018. aho ni ho hazajya habera icyigisho cy’Umunara w’Umurinzi n’izindi porogaramu z’iby’umwuka zigenewe abagize umuryango wa Beteli.
Tariki ya 9 Nyakanga 2016: Inzu y’ibiro ikorerwamo n’indi mirimo
Abakozi barimo bashyiraho icyapa cyo guha ikaze abashyitsi.
Tariki ya 13 Nyakanga 2016: Inzu y’ibiro ikorerwamo n’indi mirimo
Abakozi babiri bazaniye abubatsi amazi yo kunywa. Mu gihe cy’ubushyuhe, abubatsi baterwaga inkunga yo kwirinda umwuma.
Tariki ya 19 Nyakanga 2016: Inzu y’ibiro ikorerwamo n’indi mirimo
Umukozi ashyiraho udusanduku tuzajya dushyirwamo Bibiliya zerekanwa mu imurika rivuga ngo “Bibiliya n’izina ry’Imana”. Muri iryo murika hazajya herekanwa ubuhinduzi bwa Bibiliya butandukanye n’ibindi bintu bifitanye isano na Bibiliya.
Tariki ya 22 Nyakanga 2016: Inzu y’ibiro ikorerwamo n’indi mirimo
Umukozi yifashishije projegiteri, arimo arashyira igihugu cya Ositaraliya n’ibirwa biri mu majyepfo y’iburasirazuba bwa Aziya ku ikarita iri aho bakirira abantu. Kuri urwo rukuta hagaragara izina ry’Abahamya ba Yehova mu ndimi zisaga 700.
Tariki ya 23 Nyakanga 2016: Inzu y’ibiro ikorerwamo n’indi mirimo
Abagize umuryango wa beteli bari mu nama ibafasha kumenya neza Beteli. Inama nk’izo zateguriwe kuyobora abazaza gukora kuri Beteli no kubafasha kumenya ibintu bakwirinda bikiri mu kibanza bishobora kubateza akaga.
Tariki ya 17 Kanama 2016: Sitidiyo ya televiziyo ya JW
Barimo bashyiraho ibyuma bishyirwaho amatara yo muri sitidiyo za Televiziyo ya JW. Ibyinshi mu bikoresho byimuwe bivanywe aho sitidiyo yahoze i Brooklyn.
Tariki ya 24 Kanama 2016: Ku kibanza cy’i Warwick
Umuhanga mu by’amashanyarazi arimo arashyira amatara ku cyapa kiri ku marembo. Guhera ku itariki ya 1 Nzeri, inzego z’imirimo nyinshi zo ku cyicaro gikuru zatangiye gukorera i Warwick.
Ibindi wamenya
IMISHINGA Y’UBWUBATSI
Amafoto y’i Warwick (Igice cya 7: Nzeri 2016—Gashyantare 2017)
Ubu amazu yacu yose ari i Warwick arakoreshwa. Abantu basaga 250 bifatanyije mu mushinga wo gukora amamurika atatu, kuva atangiye kugeza arangiye.
IMISHINGA Y’UBWUBATSI
Abandi baturanyi i Warwick
Abatuye i Warwick muri New York bagize icyo bavuga ku mushinga w’Abahamya wo kubaka icyicaro gikuru cyabo.
AMAKURU
Abahamya basannye urugomero rw’i Warwick rumaze imyaka 60
Abahamya ba Yehova basannye urugomero ruri hafi y’aho bubatse icyicaro cyabo gikuru.
