Yego rwose. Bibiliya n’inkuru z’ibyabaye ku bantu, bigaragaza ko Imana isubiza amasengesho. Bibiliya igira iti “azahaza ibyifuzo by’abamutinya, kandi azumva ijwi ryo gutabaza kwabo maze abakize” (Zaburi 145:19). Ariko ahanini kugira ngo Imana isubize amasengesho yawe, biterwa nawe.

Icyo Imana igusaba

•   Jya usenga Imana, aho gusenga Yesu, Mariya, abatagatifu, abamarayika cyangwa ibishushanyo. Yehova wenyine, ni we “wumva amasengesho.”​—Zaburi 65:2.

•   Jya usenga usaba ibihuje n’ibyo Imana ishaka, biboneka muri Bibiliya.​—1 Yohana 5:14.

•   Jya ugaragaza ko wemera umwanya Yesu afite, usenge mu izina rye. Yaravuze ati “nta muntu ujya kwa Data atanyuzeho.”​—Yohana 14:6.

•   Jya usenga wizeye, nibinaba ngombwa usabe Imana kukongerera ukwizera.​—Matayo 21:22; Luka 17:5.

•   Jya wicisha bugufi kandi wirinde uburyarya. Bibiliya igira iti “Yehova ari hejuru nyamara areba uworoheje.”​—Zaburi 138:6.

•   Jya usenga ubudacogora. Yesu yaravuze ati “mukomeze gusaba muzahabwa.”​—Luka 11:9.

Icyo Imana ititaho

•   Ubwoko bwawe cyangwa igihugu ukomokamo. ‘Imana ntirobanura ku butoni, ahubwo muri buri gihugu umuntu uyitinya kandi agakora ibyo gukiranuka ni we yemera.’​—Ibyakozwe 10:34, 35.

•   Uko uba wifashe mu gihe usenga. Ushobora gusenga Imana wicaye, wunamye, upfukamye cyangwa uhagaze.​—1 Ibyo ku Ngoma 17:16; Nehemiya 8:6; Daniyeli 6:10; Mariko 11:25.

•   Gusenga bucece cyangwa mu ijwi ryumvikana. Imana isubiza n’amasengesho ya bucece.​—Nehemiya 2:1-6.

•   Kumenya niba ibyo usaba bikomeye cyangwa byoroheje. Imana igusaba ‘kuyikoreza imihangayiko yawe yose kuko ikwitaho.’​—1 Petero 5:7.