Intangiriro 6:1-22
6 Nuko abantu batangiye kuba benshi ku isi, bamaze no kubyara abakobwa,
2 abamarayika*+ babona ko abakobwa b’abantu ari beza, maze bafata abo batoranyije bose babagira abagore babo.
3 Hanyuma Yehova aravuga ati: “Sinzakomeza kwihanganira abantu ubuziraherezo+ kuko ari abanyabyaha. Ni yo mpamvu iminsi yabo izaba imyaka 120.”+
4 Muri icyo gihe ndetse na nyuma yaho, abamarayika bakomeje kugirana imibonano mpuzabitsina n’abakobwa b’abantu, babyarana abana b’abahungu, ari bo Banefili* bari abanyambaraga. Ni bo bya birangirire bya kera byabaye ku isi.
5 Nuko Yehova abona ko abantu bari barabaye babi cyane, kandi ko igihe cyose mu mitima yabo babaga batekereza ibintu bibi gusa.+
6 Yehova ababazwa cyane* n’uko yaremye abantu, bimutera agahinda kenshi.+
7 Nuko Yehova aravuga ati: “Ngiye kurimbura abantu naremye mbamare ku isi. Nzarimbura abantu, amatungo, inyamaswa zigenda ku butaka n’ibiguruka mu kirere, kuko mbabajwe n’uko nabiremye.”
8 Ariko Yehova akunda cyane Nowa.
9 Iyi ni inkuru ivuga iby’amateka ya Nowa.
Nowa yari umukiranutsi.+ Yari inyangamugayo atandukanye n’abantu bo mu gihe cye. Nowa yakomeje gukora ibyo Imana y’ukuri ishaka.*+
10 Nyuma y’igihe Nowa yabyaye abahungu batatu, ari bo Shemu, Hamu na Yafeti.+
11 Imana y’ukuri ibona ko isi yari yarabaye mbi cyane kandi ko yari yuzuye urugomo.
12 Nuko Imana yitegereza isi, isanga yarabaye mbi cyane+ bitewe n’uko abantu bose bari bafite imyitwarire mibi cyane.+
13 Hanyuma Imana ibwira Nowa iti: “Ubu niyemeje kurimbura abantu bose kubera ko bujuje urugomo mu isi. Ngiye kubarimbura, ndimbure n’isi.+
14 Ukore ubwato* mu mbaho zikomeye.*+ Uzabushyiremo ibyumba kandi uzabuhomeshe godoro*+ imbere n’inyuma ku buryo amazi atinjiramo.
15 Dore uko uzabwubaka: Buzabe bufite uburebure bwa metero 134,* ubugari bwa metero 22* n’ubuhagarike bwa metero 13.*
16 Ubwo bwato uzabushyireho idirishya* rizajya rinyuramo urumuri, urishyire kuri santimetero 44,5* uturutse hejuru aho ubwato burangirira. Uzashyire umuryango mu ruhande rw’ubwo bwato.+ Uzabwubake bufite etaje ya mbere, iya kabiri n’iya gatatu.
17 “Naho njyewe ngiye guteza isi umwuzure+ uzarimbura ibifite ubuzima byose biri munsi y’ijuru. Ikintu cyose kiri ku isi kizapfa.+
18 Kandi ngiranye nawe isezerano. Uzinjire mu bwato wowe n’abahungu bawe, umugore wawe n’abagore b’abahungu bawe.+
19 Uzinjize mu bwato inyamaswa zose,+ kuri buri bwoko winjize ebyiri ebyiri, ikigabo n’ikigore+ kugira ngo bizarokokane nawe.
20 Uzafate inyamaswa ebyiri ebyiri mu biguruka by’amoko atandukanye, mu matungo y’amoko atandukanye no mu zindi nyamaswa zose zigenda hasi ku butaka z’amoko atandukanye winjirane na zo kugira ngo zirokoke.+
21 Kandi uzashake ibyokurya bitandukanye, ubibike hafi yawe kugira ngo bizagutunge,+ bitunge n’inyamaswa muzaba muri kumwe.”
22 Nuko Nowa abigenza atyo, akora ibihuje n’ibyo Imana yari yamutegetse byose.+
Ibisobanuro ahagana hasi
^ Cyangwa “abana b’Imana.”
^ Bishobora no kuvugwa ngo: “Abagusha.” Ni ukuvuga, abatura abandi hasi. Reba Ibisobanuro by’amagambo.
^ Cyangwa “aricuza.”
^ Cyangwa “yakomeje kugendana n’Imana.”
^ Ni ibintu by’umukara bimatira bakunda gukoresha bakora imihanda ya kaburimbo.
^ Cyangwa “imbaho zo mu giti cy’ubwoko bwa goferi.”
^ Cyangwa “inkuge.” Yari imeze nk’igisanduku kinini.
^ Mu rurimi iki gitabo cyanditswemo ni mikono 300. Umukono umwe wanganaga na santimetero 44,5. Reba Umugereka wa B14.
^ Mu rurimi iki gitabo cyanditswemo ni mikono 50.
^ Mu rurimi iki gitabo cyanditswemo ni mikono 30.
^ Mu rurimi iki gitabo cyanditswemo ni “tsohar.” Bishobora kuba bisobanura “igisenge” cyangwa “idirishya.”
^ Mu rurimi iki gitabo cyanditswemo ni umukono umwe.
