NSOLO 4
Iye Akomeresa Yahova na Babace
Ndi pikiro ipi ikucita Yefte kuna Yahova?
Pikhali pyakunentsa, mbwenye mwana wa Yefte acita pidapikira babace
Ukuona ntsikana pa cithundzithundzi?— Iye ndi mwana wa mamuna anacemerwa Yefte. Bhibhlya nee isalonga dzina yace, mbwenye ife tisadziwa kuti iye akomeresa Yahova na babace. Tende tipfundze pya iye na babace.
Yefte akhali mamuna wadidi, iye aphatisira ndzidzi uzinji toera kupfundzisa mwanace pya Yahova. Pontho akhali mamuna wakuwanga na ntsogoleri wadidi. Na thangwi ineyi, Aisraele amphemba toera kuatsogolera pa kumenyana na anyamalwa awo.
Yefte aphembera kuna Mulungu toera akwanise kuwina. Yefte apikira kuti angawina, mbadapereka kuna Yahova munthu wakutoma wa panyumba yace akhafuna kuonana na iye pakubwerera kunyumba. Munthu unoyu mbadakhala ku tabernakulu ya Mulungu mbaphata basa kweneku mu umaso wace onsene. Tabernakulu ikhali mbuto ikhaenda anthu kalambira Mulungu mu ndzidzi unoyu. Yefte akunda anyamalwa anewa. Usadziwa mbani munthu wakutoma wa panyumba yace adaonana na iye pidabwerera iye kunyumba?—
Inde, ndi mwanace wankazi! Unoyu ndi mwana m’bodzi basi akhali na iye, natenepa, akhafunika kuntumiza ku tabernakulu. Pyenepi pyantsukwalisa kakamwe. Mbwenye kumbuka, iye acita pikiro. Pa ndzidzi unoyu mwanace alonga: ‘Baba, imwe mwacita pikiro kuna Yahova, natenepa musafunika muikwanirise.’
Pyaka pyonsene, axamwali a mwana wa Yefte akhaenda kamuona
Mwana wa Yefte atsukwalambo. Ku tabernakulu, iye nee mbadasembwa na kubala ana. Mbwenye iye akhafuna kakamwe kukwanirisa pikiro ya babace, na kukomeresa Yahova. Pyenepi pikhali pyakufunika kakamwe kwa iye kupiringana kumanga banja na kubala ana. Natenepa, iye abuluka panyumba, mbakhala ku tabernakulu mu umaso wace onsene.
Usanyerezera kuti pidacita iye pyakomeresa Yahova na babace?— Inde! Ungabvera mbufuna Yahova, unakhalambo ninga mwana wa Yefte. Unadzakomeresambo kakamwe Yahova na anyakubala ako.
