Yezu aciri ku Yerusalemu pa Phwando ya Misasa, mbapitiriza kupfundzisa undimomwene. Ayuda anango akuti akhadagumanikambo pa phwando apanga Yezu: ‘Ife ndife a dzindza ya Abhrahamu, pontho cipo takhala mabitcu a munthu.’ Yezu aatawira: ‘Ine ndisadziwa kuti ndimwe a dzindza ya Abhrahamu. Mbwenye imwe musafuna kundipha, thangwi nee musatawira mafala anga. Ine ndisalonga pinthu pidaona ine pikhali ine pabodzi na Baba wanga, mbwenye imwe musacita pinthu pidabva imwe kuna baba wanu.’—Juwau 8:33, 37, 38.

Yezu akhafuna kulonga kuti Babace akhali wakusiyana na baba wawo. Nakuti Ayuda nee akhadabvesesa, iwo apitiriza kulonga: ‘Baba wathu ndi Abhrahamu.’ (Juwau 8:39; Izaiya 41:8) Iwo akhali ana a Abhrahamu mwaunyama. Natenepa, iwo akhanyerezera kuti akhali na cikhulupiro ninga ca Abhrahamu wakuti akhali xamwali wa Yahova.

Mbwenye iwo adzumatirwa na ntawiro wa Yezu. Iye alonga: ‘Imwe mbamudakhala ana a Abhrahamu, mbamudacitambo pidacita Abhrahamu.’ Mwandimomwene mwana asatowezera pinacita babace. Yezu aapanga: ‘Mbwenye cincino imwe mukusaka ndzeru za kundipha. Abhrahamu nee acita pyenepi.’ Buluka penepo, Yezu alonga pontho mafala akuti aadzudzumisa: ‘Imwe musacita mabasa a baba wanu.’—Juwau 8:39-41.

Ayuda adzati kubvesesa kuti mbani analonga Yezu. Iwo apitiriza kulonga kuti iwo akhali ana andimomwene, mbalonga: ‘Ife nee tabalwa mu ulukwali, Baba wathu ndi m’bodzi basi, Mulungu.’ Kodi Mulungu akhalidi Baba wawo? Yezu aapanga: ‘Mulungu mbadakhala Baba wanu, mbamudandifuna, thangwi ine ndabuluka kuna Mulungu mbandidza pano. Ine nee ndabwera thangwi yakufuna kwanga, mbwenye ndi Mulungu adandituma.’ Yezu acita mbvundzo mbautawira ekhene: ‘Thangwi yanji imwe nkhabe kubvesesa pinalonga ine? Thangwi ndimwe akukhonda kubvera mafala anewo.’—Juwau 8:41-43.

Yezu ayesera kuapangiza ngozwi yakukhonda kun’khulupira. Iye alonga mwapakweca: ‘Imwe ndimwe ana a baba wanu Dyabo, pontho musafuna kucita pinafuna baba wanu.’ Ndi api makhaliro a baba wawo? Yezu afokotoza: ‘Iye ndi nyakupha anthu kubulukira padatoma iye, pontho iye nee apitiriza mu undimomwene.’ Yezu apitiriza kulonga: ‘Ana a Mulungu asabvesera mafala a Mulungu. Mbwenye imwe nkhabe kubvesera thangwi simwe ana a Mulungu tayu.’—Juwau 8:44, 47.

Ayuda aipirwa kakamwe thangwi ya mafala a Yezu, mbalonga: ‘Ife tingalonga kuti iwe ndiwe Nsamariya, pontho uli na dimonyo, tadawisa?’ Pakucemera Yezu ninga ‘Nsamariya,’ iwo akhampwaza. Mbwenye Yezu nee adzudzumika na pyenepi, iye aatawira: ‘Ine nee ndiri na dimonyo, ndisalemedza Baba wanga, mbwenye imwe musandipwaza.’ Yezu apangiza kuti pikhalonga iye pikhali pinthu pyakufunika kakamwe. Iye apikira: ‘Munthu anabvera mafala anga, cipo anadzafa.’ Iye nee akhalonga kuti apostolo ace na anthu anango akhantowera nee mbadafa. M’mbuto mwace, iwo nee mbadaona kufa kwa kwenda na kwenda, peno “kufa kwaciwiri” kwakusowa cidikhiro cakulamuswa muli akufa.—Juwau 8:48-51; Apokalipse 21:8.

Mbwenye Ayuda abvesera mafala a Yezu mwakuphonyeka, mbalonga: Cincino tisadziwa kuti iwe uli na dimonyo. Abhrahamu afa, aprofeta afambo, mbwenye iwe usalonga kuti, munthu anabvera mafala ako, iye cipo anadzafa. Kodi iwe ndiwe nkulu kakamwe kupiringana baba wathu Abhrahamu? Iye afa. Kodi iwe usanyerezera kuti ndiwe ani?’—Juwau 8:52, 53.

Yezu akhapangiza kuti iye akhali Mesiya. Mbwenye m’mbuto mwakulonga mwapakweca kuti iye akhali ani, iye alonga: ‘Ndingapasika mbiri ndekhene, mbiri yanga ndi yakusowa basa. Anandipasa  mbiri ndi Baba wanga, ule analonga imwe kuti ndi Mulungu wanu. Imwe nkhabe kundziwa, mbwenye ine ndisandziwa. Ndingalonga kuti ine nkhabe kundziwa, mbidakhala nyauthambi ninga imwe.’—Juwau 8:54, 55.

Buluka penepo Yezu alonga pontho thangwi ya Abhrahamu baba wawo wakukhulupirika: ‘Baba wanu, Abhrahamu, akomerwa nakuona ntsiku yanga, aiona mbakomerwa kakamwe.’ Abhrahamu akhakhulupira pikiro ya Mulungu, mbadikhira ndzidzi wakufika kwa Mesiya. Mbwenye mwakusowa cikhulupiro Ayuda ambvundza: ‘Iwe udzati kukhala na pyaka makumaxanu, ngakhale tenepo wam’mona Abhrahamu?’ Yezu aatawira: ‘Ine ndinakupangani na cinyindiro consene kuti, Abhrahamu mbadzati kubalwa, ine ndikhalipo kale.’ Yezu akhalonga pya ndzidzi ukhali iye kudzulu ninga anju wamphambvu.—Juwau 8:56-58.

Ayuda aipirwa kakamwe mudalonga Yezu kuti iye akhalipo Abhrahamu mbadzati balwa, mbafuna kumponyera miyala. Mbwenye Yezu abuluka mbakhonda kuphekeswa.