Yezu aciri ku Samariya peno ku Galileya, Afarisi ambvundza kuti Umambo unabwera lini. Iwo acita mbvundzo unoyu, thangwi akhadikhira kuona pinthu pyakupambulika na kutsandzaya kakamwe na pinthu pya Umambo unoyu. Mbwenye Yezu alonga: “Umambo wa Mulungu nee unabwera munjira yakuti unadzindikirwa na anthu onsene. Pontho anthu nee anadzalonga kuti: ‘Onani, iwo uli pano!’ peno, ‘Uli kule!’ Thangwi Umambo wa Mulungu uli pakati panu.”—Luka 17:20, 21.

Anango akhanyerezera kuti Yezu akhalonga kuti Umambo usakhala m’mitima ya atumiki a Mulungu. Mbwenye nee ndi pyenepi thangwi Umambo nee ukhali muntima mwa Afarisi akhalonga na Yezu. Mbwenye Umambo unoyu ukhali pakati pawo thangwi Yezu adasankhulwa toera kukhala Mambo wa Umambo wa Mulungu akhali pakati pawo.—Mateu 21:5.

Panango pidamala kuenda Afarisi, Yezu apanga anyakupfundzace mphangwa zinango zinalonga thangwi yakubwera kwa Umambo. Yezu alonga pinthu pikhafuna kucitika pakutoma kwace kutonga ninga Mambo. Iye aacenjeza: “Zinadzafika ntsiku zakuti munadzafuna kuona ndzidzi wakuti Mwana wa munthu mbadakhala na imwe, mbwenye nee munadzauona.” (Luka 17:22) Yezu akhafuna kupangiza kuti Mwana wa munthu mbadatoma kutonga mu Umambo ntsogolo. Mbudzati fika ndzidzi unoyu, anyakupfundza anango anadzasaka Umambo unoyu mwaphinga, mbwenye iwo anadzapitiriza kudikhira mpaka ndzidzi udakhazikisa Mulungu wakubwera kwa Mwana wa munthu.

Yezu apitiriza kulonga: “Anthu anadzakupangani kuti: ‘Onani, iye ali kule!’ peno ‘Iye ali pano!’ Lekani kuenda, nee kuatowera. Thangwi ninga njazi isacetuma kukhundu ibodzi yakudzulu mpaka kukhundu inango, tenepo pinadzacitikambo pa ntsiku yakuonekera kwa Mwana wa munthu.” (Luka 17:23, 24) Kodi anyakupfundza a Yezu mbadatsidzikizwa tani toera akhonde kutowera amesiya authambi? Yezu alonga kuti kubwera kwa Mesiya wandimomwene kunadzakhala ninga kucetuma kwa njazi kwakuti kusaonekera nakutali. Pidzindikiro pinapangiza kuti Yezu ali kutonga pinadzaoneka mwadidi kuna anthu onsene anadikhira Umambo unoyu mwaphinga.

Buluka penepo, Yezu alandanisa pyakucitika pya kale toera kupangiza kuti makhaliro a anthu mbadakhala tani ntsogolo. Iye alonga: “Ninga pidacitika mu ntsiku za Nowa, pinadzacitikambo mu ntsiku za Mwana wa munthu . . . Sawasawa na pidacitika mu ntsiku za Loti: Anthu akhadya, akhamwa, akhagula pinthu, akhagulisa, akhabzwala mbeu mbamanga nyumba. Mbwenye pidabuluka Loti mu Sodhoma, wabvumba moto na safuli buluka kudzulu mbupha anthu onsene. Pinadzacitikambo sawasawa pa ntsiku yakuonekera kwa Mwana wa munthu.”—Luka 17:26-30.

Yezu nee akhalonga kuti anthu a mu ntsiku za Nowa na za Loti aphiwa thangwi ya pinthu pinasaka anthu ntsiku na ntsiku ninga pyakudya, pyakumwa, kugula, kugulisa, kubzwala na kumanga nyumba. Nowa na Loti na mabanja awo akhacitambo pinthu ninga pyenepi. Mbwenye anthu anango akhafuna kakamwe pinthu pyenepi mbakhonda kucita pinafuna  Mulungu, pontho akhapwaza pidzindikiro pya mu ndzidzi wawo. Na thangwi ineyi, Yezu acenjeza anyakupfundzace toera acite pinafuna Mulungu mbakhala aphinga pakucita mabasa a Mulungu. Munjira ineyi, Yezu aphedza anyakupfundzace kudziwa pinthu pikhafunika iwo kucita toera kupulumuka Mulungu angafudza anthu akuipa.

Anyakupfundza nee akhafunika kudzudzumika na pinthu pya dziko, ‘pinthu pidasala nduli.’ Yezu alonga: “Pa ntsiku ineyi, munthu ali pa ntsoi wakuti pinthu pyace piri n’nyumba, mbaleke kutcita toera kukwata pinthu pyenepi. Munjira ibodzi ene, ule ali kumunda mbaleke kubwerera toera kukwata pinthu pidasiya iye nduli. Kumbukani pidacitika kuna nkazi wa Loti.” (Luka 17:31, 32) Iye asanduka mbakhala culu ca munyu.

Mukupitiriza kulonga pinthu pinafuna kucitika Mwana wa munthu angatoma kutonga, Yezu panga anyakupfundzace: “Ine ndinakupangani kuti pa masiku anewa, anthu awiri anadzakhala pa talimba ibodzi ene, m’bodzi anadzakwatwa, mbwenye unango anadzasiyiwa.” (Luka 17:34) Natenepa, anango anadzapulumuka, mbwenye anango anadzaphiwa.

Anyakupfundza abvundza: “Mbuya, pyenepi pinadzacitika kupi?” Yezu atawira: “Panagumanika cinyama cakufa ndi penepo panafuna kugumanyikana pyapungu.” (Luka 17:37) Inde, anango anadzakhala na maso akuona kutali ninga pyapungu. Anyakupfundza anewa anadzagumanyikana na Kristu wandimomwene wakuti ndi Mwana wa munthu. Pa ndzidzi unoyu, Yezu anadzapfundzisa anyakupfundzace undimomwene wakuti unaaphedza toera kugumana umaso thangwi yakun’khulupira kwawo.