Mangwana mwace, n’Dimingu Nisane 9, Yezu na anyakupfundzace abuluka ku Bhetanya mbaenda ku Yerusalemu. Mukhafika iwo cifupi na Bhetifaji, pa Phiri ya Milivera, Yezu apanga anyakupfundzace awiri.

Iye alonga: “Ndokoni ku cisa ciri patsogolo panu, kweneko munagumana buru idamangirirwa yakuti iri pabodzi na mwanace wamamuna. Asudzuleni mbamubwera nawo kuna ine. Munthu angakubvundzani, mpangeni kuti ‘Mbuya asaafuna.’ Penepo pene iye anakusiyani toera muabwerese.”—Mateu 21:2, 3.

Anyakupfundza nee abvesesa kuti pipfundziso pya Yezu pikhaphataniza profesiya ya Bhibhlya. Mbwenye mukupita kwa ndzidzi, iwo abvesesa kukwanirisika kwa profesiya ya Zakariya. Iye alonga mwanyapantsi kuti Mambo wakupikirwa na Mulungu anakwira pa buru ing’ono mbapita mu Yerusalemu ‘mwakucepeseka.’—Zakariya 9:9.

Pidaenda anyakupfundza ku Bhetifaji kakwata buru na mai wace, anthu akhali cifupi abvundza: “Thangwi yanji mukusudzula mwana buru?” (Marko 11:5) Mbwenye pidabva iwo kuti asafuna kupasa Mbuya, iwo atawirisa anyakupfundza toera kuenda nawo kuna Yezu. Anyakupfundza aikha nguwo zawo pa buru ikulu na ing’ono ene, mbwenye Yezu akwira buru ing’ono.

Mwinji wa anthu ukhathimizirika pikhafika Yezu dhuzi na Yerusalemu. Azinji a iwo athasika nguwo zawo mu nseu. Anango agwanda nthawi za micindu mbazithasikambo. Onsene akhakhuwa: “Mpulumuseni, tisakuphembani! Mbapaswe nkhombo ule anabwera mu dzina ya Yahova! Mbupaswe nkhombo Umambo unafuna kudza wa baba wathu Dhavidhi!” (Marko 11:8-10) Afarisi akhali pakati pa mwinji aipirwa kakamwe na mafala anewa. Natenepa iwo apanga Yezu: “Mpfundzisi, pangani anyakupfundza anu toera amatame.” Yezu alonga: ‘Ine ndinakupangani kuti iwo angamatama, miyala inadzakhuwa.’—Luka 19:39, 40.

Mudaona Yezu Yerusalemu, alira mbalonga: “Ndikhafuna kuti udzindikire pinthu pyakuti mbapidakubweresera ntendere, mbwenye pinthu pyenepi wapibisirwa toera ukhonde kupiona.” Yerusalemu anadzatamba nyatwa thangwi mwakufuna nee abvera. Yezu alonga: “Anyamalwa ako anadzamanga mpanda wa miti yakusongolwa, iwo anakuzungulira mbakuthabusa m’makhundu onsene. Iwo anadzakugwisa pantsi mbafudza anthu anakhala muna iwe. Nee anadzasiya mwala padzulu pa mwala undzace muna iwe.” (Luka 19:42-44) Toera kukwanirisa mafala a Yezu, Yerusalemu afudzwa mu caka 70 N.W.

Pidapita Yezu mu Yerusalemu, ‘anthu onsene mu nzinda adzudzumika kakamwe, anango akhabvundza: “Unoyu mbani?”’ Mwinji wa anthu ukhapitiriza kulonga: “Uyu ndi Yezu, mprofeta wa ku Nazareti, ku Galileya!” (Mateu 21:10, 11) Anango mwa anthu akhali pa mwinji adaona Yezu mbakalamusa Lazaro muli akufa, apanga andzawo thangwi ya cirengo ceneci. Afarisi akhadungunya mbalonga kuna unango na ndzace: “Anthu onsene ali kuenda kuna iye.”—Juwau 12:18, 19.

Kazinji kene Yezu angaenda ku Yerusalemu, akhapita mu templo toera kupfundzisa. Mwenemo iye awangisa boliboli na nyakulamala. Akulu a anyantsembe na apfundzisi a mwambo aipirwa pidaona iwo pikhacita Yezu na kubva kukhuwa kwa ana mu templo kuti, “Mulungu tisakuphembani, pulumusani Mwana wa Dhavidhi!” Natenepa atsogoleri auphemberi abvundza Yezu: “Usabva pinalonga ana awa?” Iye aatawira: “Kodi imwe nee mwaleri mafala adalembwa kuti, ‘Imwe mwacitisa kuti nkanwa mwa anang’ono na mwa akhombwani mubuluke mafala akukusimbani’?”—Mateu 21:15, 16.

Yezu ayang’ana pinthu pikhali mu templo. Nakuti kukhadoka, iye abuluka mbaenda pabodzi na apostolo. Mbidzati fika ntsiku 10 ya Nisane, Yezu abwerera pontho ku Bhetanya, mbagona kweneko n’Dimingu.