KUNA ANYAKUBALA
6: Kusandika
PYENEPI PISABVEKANJI
Fala yakuti kusandika isabveka kutsogolera peno kupfundzisa. Midzidzi inango fala ineyi isalonga pya kusumula mwana angatoma kucita pinthu pyakuipa. Mbwenye kazinji kene fala ineyi isalonga pya kupfundzisa mwana makhaliro adidi toera akwanise kucita pisankhulo pyadidi.
THANGWI YANJI KUSANDIKA NDI KWAKUFUNIKA
Pisaoneka kuti mu pyaka pya cincino, anyakubala azinji nee asasandika anawo. Iwo asagopa kuti angaasandika ana anaona ninga nkhabe funiwa panyumba. Mbwenye anyakubala audziwisi asakhazikisa mitemo yakulinganira mbaphedza anawo toera kuibvera.
“Ana asafunika kupangwa pinafunika iwo kucita na pinafunika iwo kukhonda kucita toera angakula akhale anthu akunyindirika. Ana akuti nkhabe kusandikwa, asakhala ninga mwadiya wakusowa ng’ombo wakuti mukupita kwa ndzidzi unakwekwetwa mbulobzweka.”—Pamela.
PINAFUNIKA IMWE KUCITA
Lekani kucinja-cinja. Mwananu angakhonda kubvera mitemo idakhazikisa imwe, musafunika kunsandika. Mbwenye ndzidzi onsene khalani dzololo toera kusimba mwananu angabvera mitemo idakhazikisa imwe.
“Mu dziko ino yakuti ana azinji nkhabe kubvera anyakubalawo, ine ndisasimba kazinji kene ananga thangwi yakundibvera. Tingakhala na nsambo wakusimba ana pisakhala pyakukhonda nentsa kuna iwo kutawira kusandikwa angadodomeka.”—Christine.
PINALONGA BHIBHLYA: “Cinabzwala munthu, ndico cinafuna kudzabvuna iye.”—Agalata 6:7.
Sandikani mwananu mwakubverana na thunga yace. Mungasandika mwana musafunika kunyerezera thunga yace, pinthu pinakwanisa iye kucita na kukula kwa pyakuipa pidacita iye. Mwacitsandzo, mwana angakhonda kubvera mitemo idakhazikisa imwe thangwi yakuphatisira ntokodzi, imwe munakwanisa kun’khondesa kucita pinthu pinango mu ntokodzi peno kunkwatira mu ntsiku zingasi. Mu ndzidzi ubodzi ene, calirani kuipirwa na pinthu ping’ono, basi ene thangwi nee mwakomerwa napyo.
“Mbandidzati kusandika mwananga pakutoma ndisanyerezera khala iye nee andibvera thangwi yakufuna kwace peno acita dodoma. Mwana angakhonda kubvera mwakubwereza-bwereza mphyadidi kunsandika. Mbwenye khala acita kudodomeka pinakhala mwadidi basi ene kumpasa uphungu”—Wendell.
PINALONGA BHIBHLYA: “Lekani kutsukwalisa ananu, toera iwo akhonde kufewa manungo.”—Akolose 3:21.
Pangizani ufuni. Pisakhala pyakukhonda nentsa kuna ana kutawira kusandikwa mbabvera angadzindikira kuti anyakubalawo acita pyenepi thangwi ya kuafuna.
“Mu ndzidzi ukhadodoma mwanathu, ife tikhampanga kuti tisakomerwa kakamwe na pinthu pyadidi pinacita iye. Pontho ife tikhampanga kuti tiri dzololo toera kum’phedza kuti asasanyire madodo ace, thangwi mbadakhonda kucita pyenepi iye mbadapswipisa makhaliro ace adidi.”—Daniel.
PINALONGA BHIBHLYA: “Ufuni ndi wakukhurudzika na wakukoma ntima.”—1 Akorinto 13:4.
