NYIMBO zikhali zakufunika kakamwe kuna Aizraeli akale. Bhibhlya kazinji kene isalonga pya anthu akuti akhaimba na kuphatisira pinthu pya kuimba napyo. Makhundu mangasi a Bhibhlya ndi nyimbo. Mwacitsandzo, Masalmo, Nyimbo ya Salomoni na Nyimbo ya Ciliro. Bukhu ibodzi inalonga pya umaso wa mu ndzidzi wakale yalonga kuti “Bhibhlya isapangiza kuti Aizraeli akhaphatisira nyimbo m’makhundu akusiyana-siyana mu umaso wawo.”

Kuphatisirwa kwa nyimbo ntsiku na ntsiku. Aizraeli akhaimba nyimbo toera kupangiza mabvero awo. (Iza. 30:29) Akazi akhaimba mapandero, akhaimba nyimbo mwakutsandzaya, akhabvina m’maphwando, pontho akhaimba mu ndzidzi ukakhazikiswa amambo, anyankhondo angawina ku nkhondo na m’maphwando a ulambiri. (Aton. 11:34; 1 Sam. 18:6, 7; 1 Ama. 1:39, 40) Aizraeli akhaimbambo toera kupangiza kutsukwala kukakhala na iwo angaferwa. (2 Kro. 35:25) Ninga pinalonga bukhu inango, “mwakukhonda penula, Ahebheri akhakomerwa kakamwe na nyimbo.”

Amambo a Aizraeli akhakomerwa kakamwe na nyimbo. Mwacitsandzo, Mambo Sauli acemeresa Dhavidhi toera amuimbire arpa. (1 Sam. 16:18, 23) Mukupita kwa ndzidzi, pidakhazikiswa Dhavidhi ninga mambo iye asasanya pyakuimba napyo, aimba nyimbo zadidi kakamwe, pontho akhazikisa nsoka toera kuimba pa templo ya Yahova. (2 Kro. 7:6; Amosi 6:5) Pontho Mambo Salomoni akhali na anyakuimba amuna na akazi toera kuimba pa nyumba yace ya umambo.—Ekl. 2:8.

Kuphatisira nyimbo pa ulambiri. Cakufunika kakamwe ndi cakuti Aizraeli akhaphatisira nyimbo pakulambira Yahova. Mwacitsandzo, amuna 4000 aphatisira pyakuimba napyo toera kuimba pa templo mu Yerusalemu. (1 Kro. 23:5) Iwo akhaimba na pyakuimba napyo pya utale, pya nkhambala na maarpa. (2 Kro. 5:12) Mbwenye nee akhali iwo basi akhalambira Yahova na nyimbo. Aizraeli azinji akhaimba mu ndzidzi ukhaenda iwo ku Yerusalemu kacita maphwando. Zinango mwa nyimbo zenezi zikhacemerwa Nyimbo Zakukwira Nazo ku Mizinda. (Mas. 120-134) Mwakubverana na mphangwa zinalonga pya Ayuda, Aizraeli akhaimba Masalmo a peno nyimbo zakusimba Yahova mu ndzidzi wa Paskwa.

Nyimbo zisapitiriza kukhala zakufunika kakamwe kuna atumiki a Mulungu. (Tiya. 5:13) Kuimba kusacita khundu ya ulambiri wathu. (Aef. 5:19) Ife tisakhala akuphatana kakamwe na abale na alongo athu tingaimbira Yahova pabodzi. (Akol. 3:16) Kusiyapo pyenepi, nyimbo zisatiphedza kakamwe m’midzidzi yakunentsa. (Mabasa 16:25) Mwakukhonda penula, nyimbo ndi njira yadidi kakamwe yakupangiza cikhulupiro cathu kuna Yahova na ufuni wathu kuna iye.