Iwo Aona Ufuni wa Atumiki a Yahova
YOMARA na abale ace akuti ndi Marcelo na Hiver asakhala mucisa cing’ono ku Guatemala. Yomara atoma kupfundza Bhibhlya na Mboni za Yahova, pontho mukupita kwa ndzidzi, abale ace atomambo kupfundza Bhibhlya. Mbwenye utatu wawo ndi maboliboli, pontho nee akhadziwa kuleri Cibhraile. M’bale akhaapfundzisa Bhibhlya akhaleri ndima na mavesi a m’Bhibhlya iwo mbabvesera.
Pikhalimbo pyakunentsa kuna iwo kugumanika pa misonkhano, thangwi akhali kutali kakamwe na Nyumba ya Umambo. Mbwenye abale mu mpingo acita masasanyiro toera kuaphedza kuti agumanike pa misonkhano yonsene. Pontho pidatoma iwo kucita makhundu a anyakupfundza pa nsonkhano wa pakati pa sumana, abale na alongo akhaaphedza toera kukumbuka pinthu pikhafuna longa iwo.
Mwezi wa Maio wa caka ca 2019, misonkhano ya mpingo yatomambo kucitwa mucisa cawo. Buluka penepo, banja ibodzi ya apainiya a ndzidzi onsene yafuluka mbienda kakhala mucisa ceneci. Iwo akhazikisa cifuno cakuphedza anyakupfundza anewa atatu toera kudziwa kuleri na kulemba Cibhraile, maseze iwo nee akhadziwambo cilongero ceneci. Iwo aenda ku bhibhliyoteka, mbagula mabukhu a Cibhraile toera kuapfundza kuti akwanisembo kupfundzisa anango.
Marcelo ali kutawira pa nsonkhano wa mpingo
Mu miyezi mingasi, utatu wawo adziwa kuleri Cibhraile mwakukhonda nentsa, pontho pyenepi pyaaphedza toera kuthambaruka mwauzimu. Cincino Yomara, Marcelo na Hiver asatumikira ninga apainiya a ndzidzi onsene. Marcelo asatumikirambo ninga ntumiki wakutumikira. Iwo asacita mabasa mazinji auzimu ntsiku zonsene pa sumana. Citsandzo cawo cakutumikira Yahova mwaphinga cisaphedza anango toera kucitambo pibodzi pyene.
Abale athu anewa atatu asapereka takhuta kakamwe na ciphedzo ca abale na alongo mu mpingo. Yomara alonga: “Kutomera ntsiku yakutoma idacedza ife na Mboni za Yahova, takwanisa kuona kuti iwo asapangiza ufuni wandimomwene Wacikristu.” Marcelo athimiza: “Ife tiri na axamwali adidi mu mpingo, pontho tiri na abale na alongo pa dziko yonsene yapantsi akuti ndi akuphatana, pontho asafunana.” Yomara na abale ace asadikhira mwakutsandzaya ndzidzi wakuti Yahova anadzafungula maso awo na kucinja dziko yapantsi mbikhala paraizu.—Mas. 37:10, 11; Iza. 35:5.
