JULIAN alonga: “Pidabva ine cidziwiso kuti mwananga wamamuna abuluswa m’mpingo, ndaona ninga dziko ikhadamala kwa ine. Iye akhali mwananga wankulu, ife tikhanfuna kakamwe; pontho tikhacita pinthu pizinji pabodzi pene. Ndzidzi onsene iye akhali mwana wa citsandzo cadidi, mbwenye mwakukhonda dikhira, iye atoma kupangiza makhaliro akukhonda thema. Nkazanga alira mu ntsiku zizinji, ine nee ndikhadziwa kuti mbidam’balangaza tani. Tapitiriza kubvundzika khala ciripo cidaphonya ife ninga anyakubala.”

Nakuti kubuluswa m’mpingo kusatsukwalisa kakamwe, thangwi yanji tinakwanisa kulonga kuti anewa ndi masasanyiro aufuni? Ndi mathangwi api a m’Bhibhlya anaphedzera kutonga kweneku? Makamaka, ninji cinacitisa munthu kubuluswa m’mpingo?

Pana mathangwi mawiri anacitisa kuti m’bodzi wa Mboni za Yahova abuluswe m’mpingo. Thangwi yakutoma, khala Nkristu wakubatizwa acita madawo makulu. Thangwi yaciwiri, iye nee atcinyuka ku madawo ace.

Maseze Yahova nee asaphemba kuti ticite pinthu ninga anthu aungwiro, iye ali na midida yakucena yakuti asafuna kuti atumiki ace aitowezere. Mwacitsandzo, Yahova asapitiriza kutipanga kuti tisafunika kucalira madawo makulu ninga ulukwali, upombo, kulambira madzimunthu, umbava, kupokosera anthu pinthu, kupha, na kukhulupira mizimu.​—1 Akor. 6:9, 10; Apok. 21:8.

Nee musakhulupira kuti midida yakucena ya Yahova ndi yakulinganira, pontho isatitsidzikiza? Tonsene tisafuna kukhala pakati pa anthu antendere, anthu a makhaliro adidi na akunyindirika. Tisagumana anthu anewa pakati pa abale athu auzimu. Ife tisapangiza makhaliro anewa thangwi ya pikiro idacita ife mu ndzidzi udaperekeka ife kwa Yahova toera kukhala maso mwakubverana na pitsogolero pinagumanika m’Mafalace.

Mbwenye ndiye tani khala Nkristu acita madawo makulu thangwi yakusowa kwace ungwiro? Atumiki akale akukhulupirika a Yahova acitambo madodo anewa, ngakhale tenepo, Yahova nee aakhonderatu mwakucimbiza. Mambo Dhavidhi ndi citsandzo cakudziwika kakamwe ca munthu adacita pyenepi. Iye acita upombo, pontho apha munthu; mbwenye mprofeta Natane ampanga: ‘Yahova anakulekerera madawo ako.’​—2 Sam. 12:13.

Mulungu alekerera madawo a Dhavidhi thangwi iye apangiza kutcinyuka kwandimomwene. (Sal. 32:1-5) Munjira ibodzi ene, lero ntumiki wa Yahova anadzabuluswa m’mpingo, basi ene angakhonda kutcinyuka peno angapitiriza kucita pinthu pyakuipa. (Mach. 3:19; 26:20) Akulu a mpingo anatsalakana nkhani ya munthu adacita madawo angakhonda kuona kutcinyuka kwandimomwene, iwo asafunika kubulusa munthu unoyu m’mpingo.

Pakutoma, panango tinaona kuti kubulusa m’mpingo munthu adacita madawo ndi kutonga kwakupiringana midida peno kwakuipa, makamaka khala  munthu adabuluswa ndi xamwali peno wacibale. Mbwenye Bhibhlya isatipasa mathangwi akubveka mwadidi toera kunyindira kuti anewa ndi masasanyiro aufuni.

Yezu alonga kuti ‘kulungama kwa ndzeru kunadziwika na macitiro.’ (Mat. 11:19) Kutonga kubulusa m’mpingo munthu adacita madawo mbakhonda kutcinyuka kusabweresa maphindu adidi. Onani maphindu matatu:

Kubulusa nyakudawa kusapasa mbiri dzina ya Yahova. Nakuti tisacemerwa na dzina ya Yahova, mwakukhonda penula, macitiro athu asakhuya dzina yace. (Iza. 43:10) Ninga macitiro a mwana anakwanisa kupasa mbiri peno kupasa manyadzo anyakubalace, midzidzi inango maonero a anthu thangwi ya Yahova asanyindira makhaliro adidi na akuipa anaona iwo mwa atumiki ace. Dzina yadidi ya Mulungu isalemedzwa khala anthu anacemerwa na dzina ineyi asaphatisira midida yace yapadzulu mu umaso wawo. Ndi pyenepi pikhacitika mu ntsiku za Ezekyele mu ndzidzi wakuti anthu akunja akhaona Ayuda ninga anthu a dzina ya Yahova.—Ezek. 36:19-23.

Tingacita ulukwali, ife tinatikanisa dzina yakucena ya Mulungu. Mpostolo Pedhro apereka uphungu uyu kuna Akristu: ‘Ninga ana akubvera, lekani pontho kutoweza pikhasirira imwe kale, mbamudzati kupfundziswa pya undimomwene. Mbwenye khalani anthu akucena m’makhaliro anu onsene, mbamutoweza Wakucena adakucemerani. Thangwi pyalembwa m’bukhu ya Mulungu kuti: ‘Munadzakhala akucena, thangwi ine ndine wakucena.’’ (1 Ped. 1:14-16) Makhaliro adidi na akucena asapasa mbiri dzina ya Mulungu.

Mbwenye, m’bodzi wa Mboni za Yahova angacita pinthu pyakuipa, mwakukhonda penula, axamwali ace na ale anadziwana na iye, anabva peno anaona pyenepi. Angabuluswa m’mpingo, pinapangiza kuti Yahova ali na anthu akucena akuti asatowezera pitsogolero pya Bhibhlya toera kupitiriza kukhala akucena. Mamuna unango aenda kumisonkhano pa Nyumba ya Umambo ku Suíça, iye alonga kuti akhafuna kucita khundu ya mpingo unoyu, thangwi m’bale wace wankazi akhadabuluswa m’mpingo thangwi ya ulukwali. Iye alonga kuti akhafuna kukhala mu uphemberi wakuti “nkhabe kutawirisa makhaliro akuipa.”

Kubulusa munthu m’mpingo kusatsidzikiza mpingo wakucena Wacikristu. Mpostolo Paulu acenjeza Akorinto pya ngozwi yakutawirisa anyakudawa cakhomo toera kupitiriza pakati pawo. Iye alandanisa makhaliro akuipa na pyakufufumisa pyakuti pisatupisa ufa onsene wakumunywa. Iye alonga: ‘Nsunga pang’ono unatupisa ufa onsene wa nkate.’ Buluka penepo iye aapasa uphungu: ‘Bulusani pakati panu munthu wakuipa.’​—1 Akor. 5:6, 11-13, Mphangwa Zadidi.

Pisaoneka kuti ‘munthu wakuipa’ adalonga Paulu, akhacita pyaulukwali mbadziwika na anthu onsene. Anthu anango a m’mpingo akhaona pyenepi ninga macitiro akutawirika. (1 Akor. 5:1, 2) Madawo makulu anewa mbadasiyiwa, Akristu anango mbadakhala na cipendamiro cakutowezera makhaliro na misambo yaulukwali ikhacitwa mu nzinda unoyu ukhakhala iwo. Kulekerera madawo akuti asacitwa cakhomo, kusakulumiza anthu toera kukhala na cipendamiro ca kupwaza midida ya Mulungu. (Koel. 8:11) Kusiyapo pyenepi, anyakudawa akukhonda kutcinyuka mbadakhala ninga ‘mathombo peno miyala yakubisalika m’madzi’ mbilobzwesa cikhulupiro ca anango m’mpingo.​—Yuda 4, 12.

Kubulusa munthu m’mpingo, kunamphedza toera kudzindikira kudawa kwace. Pa ndzidzi unango, Yezu alonga pya mphale adabuluka panyumba ya babace, mbabvunga unthaka wace na makhaliro akuzuda. Mwana wakusandikika apfundza mwakutsukwalisa kuti umaso kunja kwa nyumba ya anyakubalace ukhali wapezi na wakusowa ntsisi. Pakumalisa, mwana unoyu adzindikira, atcinyuka mbacita masasanyiro toera kubwerera kuna acibale ace. (Luka 15:11-24) Mafala a Yezu akuti baba waufuni akomerwa thangwi yakucinja makhaliro kudacita mwanace, asatiphedza toera kubvesesa mabvero a Yahova. Iye asatipanga: ‘Pinafuna Ine makamaka nkhuona nyakudawa mbasiya njira yace yakuipa mbapulumuka.’​—Ezek. 33:11.

Munjira ibodzi ene, anthu adabuluswa m’mpingo Wacikristu​—akuti nee asacita khundu ya acibale awo auzimu—​anakwanisa kudzindikira mwai udaluza iwo. Nyatwa zinafuna kutambira iwo thangwi ya madawo awo, na anganyerezera pya midzidzi yakutsandzayisa ikhali na iwo mu ndzidzi ukhali iwo na uxamwali wadidi na Yahova pabodzi na atumiki ace, pinakwanisa kuaphedza toera kudzindikira kudawa kwawo.

 Ufuni na kukhala wakutonga ndi pyakufunika toera kugumana maphindu adidi. Nyamasalmo Dhavidhi alonga: ‘Nyakulungama angandimenya, apangiza kukoma ntima kwa ine. Angandisandika, ndi ninga akuikha mafuta pa nsolo panga.’ (Sal. 141:5) Mwacitsandzo, nyerezerani munthu wakuti akucita ulendo wakulapha pa ntsiku yakutonthola kakamwe, iye akhala pantsi thangwi aneta kakamwe. Manungo ace akutoma kuuma na mphepo, pontho akubva citulo kakamwe. Angagona m’makhaliro anewa, iye anafa. Mu ndzidzi unadikhira iye ciphedzo, xamwali wace midzidzi inango anakwanisa kum’menya pa nkhope toera akhonde kugona. Kumenya kweneku panango kunapha pang’ono, mbwenye ndi kwakufunika toera akwanise kupulumuka. Munjira ibodzi ene, Dhavidhi adzindikira kuti munthu wakulungama mbadakwanisa kunsandika toera akhale mwadidi, maseze pisapha.

Kazinji kene, kubulusa munthu m’mpingo kusaperekwa cilango cinafuna nyakudawa. Mudapita pyaka khumi, mwana wa Julian adalongwa pakutoma kwa nsolo uno, acenesa umaso wace, mbabwerera m’mpingo, lero asatumikira ninga nkulu wa mpingo. Iye alonga: “Kubuluswa m’mpingo kwandicitisa kuthimbana na nyatwa ya makhaliro a umaso wanga. Ine ndikhafunika kutambira cilango ceneci.”​—Aheb. 12:7-11.

Mwandimomwene, kubuluswa m’mpingo ndi cidengwa cauzimu, mbwenye cidengwa ceneci nee cisafunika kukhala cakukhonda mala. Tonsene tinakwanisa kuphedzera toera kubuluswa kwa munthu m’mpingo kumphedze.

Akulu a mpingo akuti ali na basa yakunentsa kakamwe yakudziwisa munthu kuti abuluswa m’mpingo, asawangisira toera kupangiza ufuni wa Yahova. Pa kudziwisa munthu pya kutonga kwawo, mwaufuni iwo asafokotoza mwakubveka pisafunika iye kucita toera kubwezereswa m’mpingo. Toera kukumbusa ale adabuluswa m’mpingo kuti anakwanisa tani kubwerera kuna Yahova, mukupita kwa ndzidzi akulu a mpingo asacedzera ale akuti asapangiza macinjo. a

Acibale angalemedza masasanyiro akubuluswa kwa munthu, asapangiza ufuni kuna abale na alongo na kuna munthu adabuluswa. Julian afokotoza: “Iye akhapitiriza kukhala mwananga, mbwenye makhaliro a umaso wace aikha mpingizo pakati pathu.”

Anthu onsene m’mpingo anakwanisa kupangiza ufuni wakutsogolerwa na midida angacalira kucita uxamwali peno kucedza na munthu adabuluswa m’mpingo. (1 Akor. 5:11; 2 Jwau 10, 11) Munjira ineyi, iwo asapasa mphambvu cilango cidapereka Yahova kuna iye kubulukira kwa akulu a mpingo. Mwakuthimizira, abale na alongo anakwanisa kupangiza ufuni wakuthimizirika na ciphedzo kuna acibale a munthu adabuluswa m’mpingo, akuti asanentseka kakamwe, pontho nee asafunika kucitiswa kubva ninga asacalirwambo na Akristu andzawo.​—Arom. 12:13, 15.

Julian amalisa tenepa: “Kubuluswa m’mpingo ndi masasanyiro akufunika kwa ife, akuti asatiphedza toera kukhala maso mwakubverana na midida ya Yahova. Maseze kusapha, mukupita kwa ndzidzi kusabweresa maphindu adidi. Mbidatawirisa makhaliro akuipa a mwananga, iye cipo mbadabwerera.”