Mafokotozero anewa ndi thangwi yakuti bukhu ya Apokalipse isapangiza Sathani Dyabo ninga ntsogoleri wa kupomokerwa kunafuna kudzacitwa atumiki a Mulungu pa dziko yonsene. (Apok. 12:1-17) Natenepa, pikhanyerezerwa kuti Goge ndi dzina inango ya Sathani yaciprofesiya.

Mbwenye mafokotozero anewa abweresa mibvundzo mingasi yakufunika kakamwe. Thangwi yanji? Nyerezerani basi: Thangwi ya ndzidzi unafuna kukundwa Goge, Yahova alonga: ‘Ndinadzapereka ntembo wako ninga cakudya ca mitundu yonsene ya mbalame na pikala pyonsene pya ntsanga.’ (Ezek. 39:4) Buluka penepo Yahova athimiza: ‘Ine ndinadzafikira pantsi Goge mu Israele. Ande, ndinamuikhisa kweneko Goge na anyankhondo ace azinji.’ (Ezek. 39:11) Mphapo pinakwanisika tani kuti Sathani ninga munthu wauzimu adyiwe na ‘mitundu yonsene ya mbalame na pikala pyonsene pya ntsanga’? Kodi Sathani mbadakwanisa tani ‘kufikirwa’ pa dziko yapantsi? Bhibhlya isapangiza pakweca kuti Sathani anadzafungirwa n’djenje mu pyaka 1.000, tayu kudyiwa peno kufikirwa.​—Apok. 20:1, 2.

Bhibhlya isalonga kuti pakumala kwa pyaka 1.000, Sathani anadzabuluswa n’djenje, ‘iye anadzanyengeza anthu a mitundu yonsene, Goge na Magoge, mbaagumanya toera acite nkhondo.’ (Apok. 20:8) Mphapo khala Sathani ndi Goge, anakwanisa tani kunyengeza Goge? Natenepa, “Goge” analongwa mu profesiya ya Ezekyele na m’bukhu ya Apokalipse nee ndi Sathani.

Mphapo mbani Goge wa Magoge? Toera kutawira mbvundzo unoyu, tisafunika kufufudza Malemba toera kudziwa kuti mbani anafuna kupomokera atumiki a Mulungu. Bhibhlya nee isalonga basi ene pya kupomokera kwa Goge wa Magoge, mbwenye isalongambo pya kupomokera kwa ‘mambo wa kunkwiriro’ na kupomokera kwa “amambo a pantsi pano.” (Ezek. 38:2, 10-13; Dan. 11:40, 44, 45; Apok. 17:14; 19:19) Kodi kupomokera kweneku ndi kwakusiyana? Panango nkhabe. Mwakukhonda penula, Bhibhlya isaphatisira madzina akusiyana toera kulonga kupomokera kubodzi kwene. Thangwi yanji tisalonga tenepo? Thangwi Malemba asatipanga kuti madzindza onsene pa dziko yapantsi anadzacita khundu mu kupomokera kweneku kwakumalisa kwakuti kunadzatomesa nkhondo ya Armagedoni.​—Apok. 16:14, 16.

 Tingalandanisa Malemba anewa onsene analonga pya kupomokerwa kwakumalisa kwa atumiki a Mulungu, pisaoneka pakweca kuti Goge wa Magoge nee ndi Sathani, mbwenye ndi kuphatana kwa madzindza. Kodi kuphatana kweneku kwa madzindza kunadzatsogolerwa na “mambo wa kunkwiriro” wakuphiphirisa? Nee tinakwanisa kulonga na cinyindiro consene. Mbwenye maonero anewa asaoneka ninga ndi akubverana na pinalonga Yahova thangwi ya Goge: ‘Unadzabwera kubulukira kunkwiriro na anyankhondo azinji amphambvu adagumanya iwe m’madziko akusiyana-siyana. Iwo anadzabwerambo na makavalo awo.’​—Ezek. 38:6, 15.

Munjira ibodzi ene, mprofeta Dhanyeli wakuti akhala maso mu ndzidzi ubodzi ene na Ezekyele, alonga thangwi ya mambo wa kunkwiriro: ‘Iye anadzadzudzumika na mphangwa zakubuluka kukhundu ya kunkwiriro na ya ku mabulukiro a dzuwa. Thangwi ya ipyo, iye anadzaipirwa kakamwe mbacita nkhondo na ukali onsene toera kufudza anthu azinji. Anadzamanga misasa yace ya umambo pakati-nakati uku bara uku phiri ya nyumba ya Mulungu, mbwenye anadzafa nee kubvunulirwa na munthu.’ (Dan. 11:44, 45) Pyenepi pisabverana kakamwe na pinalonga bukhu ya Ezekyele thangwi ya mabasa a Goge.​—Ezek. 38:8-12, 16.

Ninji pinafuna kudzacitika ninga pyakubwereswa pya kupomokera kweneku kwakumalisa? Dhanyeli alonga: “Mu ndzidzi unoyu Mikele [Yezu Kristu] anadzakhala dzololo [pa Armagedoni], nkulu wa aanju wakuti ali dzololo [kutomera caka 1914] toera kutsidzikiza atumiki anu. Mwandimomwene kunadzaoneka ndzidzi wa nyatwa [nyatwa ikulu] yakuti cipo yaoneka kale, kutomera pakucitwa kwa anthu mpaka ndzidzi unoyu. Mu ndzidzi unoyu, atumiki anu anadzapulumuka, ule onsene wakuti dzina yace yalembwa m’bukhu ya Mulungu.” (Dan. 12:1, Tradução do Novo Mundo) Basa ineyi ya muimiriri wa Mulungu, Yezu, isalongwambo pa Apokalipse 19:11-21.

Mphapo mbani “Goge na Magoge” analongwa pa Apokalipse 20:8? Nkati mwa kuyeserwa kwakumalisa kunkhomo kwa pyaka 1.000, ale akuti anadzapandukira Yahova anapangiza makhaliro mabodzi ene ausumankha ninga ‘Goge wa Magoge,’ akuti ndi madzindza anafuna kudzapomokera atumiki a Mulungu kunkhomo kwa nyatwa ikulu. Misoka ineyi miwiri inadzaona nyatwa ibodzi ene​—kufa kwa kwenda na kwenda! (Apok. 19:20, 21; 20:9) Natenepa, mphyakuthema kulonga kuti anyakupandukira anewa onsene kunkhomo kwa Pyaka Cikwi acemerwe ‘Goge na Magoge.’

Ninga anyakupfundza aphinga a Mafala a Mulungu, tisadikhira na cifuno cikulu toera kuona kuti mbani anafuna kudzakhala “mambo wa kunkwiriro.” Mbwenye mwakukhonda tsalakana kuti mbani anafuna kudzatsogolera kuphatana kwa madzindza, ife tiri na cinyindiro ca pinthu piwiri: (1) Goge wa Magoge na anyankhondo ace anadzakundwa mbafudzwa; na (2) Mambo wathu Yezu Kristu, anadzapulumusa atumiki a Mulungu mbaatsogolera ku dziko ipswa ya ntendere na ya citsidzikizo candimomwene.​—Apok. 7:14-17.