Na ngu 2011, mbeni koli ti kodro ti Érythrée so ayeke réfugié asi na Norvège. Na ngoi so aTémoin ti Jéhovah awara lo, lo tene na ala so na kodro ti lo lani, lo hinga ambeni Témoin ti Jéhovah. Lo tene so, na temps so lo yeke lani turugu lo bâ tongana nyen la aTémoin ti Jéhovah, so a bi ala na da ti kanga ndali ti tënë ti mabe ti ala, ake ti lï turugu atâa so même a sara ye ti ngangu mingi na ala.

 Mbeni ye asi gbagburu tongaso, na a bi koli ni na da ti kanga. Na yâ ti da ti kanga ni, lo wara terê na aTémoin ti Jéhovah ota: Paulos Eyasu, Negede Teklemariam, na Isaac Mogos so a kanga ala ndali ti tënë ti mabe ti ala depuis ngu 1994.

 Na temps so koli ni ayeke na da ti kanga, lo bâ tâ na lê ti lo wani so aTémoin ti Jéhovah ayeke sara ye alingbi na amama-ndia ti Bible so ala yeke fa ni na azo. Lo bâ so ala yeke sara ye na lege ni, nga so ala yeke kangbi même kobe ti ala na amba ti ala zo ti kanga. Lo bâ nga tongana nyen la aTémoin ti Jéhovah ni ayeke manda Bible ndo oko lango oko oko, nga ala yeke tisa amba ti ala zo ti kanga ti ga ti manda ni legeoko na ala. Na ngoi so a tene na ala so, tongana ala sû maboko na gbe ti mbeni mbeti ti fa so ala yeke aTémoin ti Jéhovah encore ape, a yeke zi ala na da ti kanga, ala ke.

 Ye so aTémoin ti Jéhovah ni asara so andu bê ti koli ni ngangu mingi. Na peko ti so lo gue lo sara kodro na Norvège, lo ye ti hinga ngbanga ti nyen la si aTémoin ti Jéhovah ayeke na kpengba mabe tongaso. Ni la, na temps so aTémoin ti Jéhovah awara lo, hio lo yeda ti tene ala manda Bible na lo nga lo komanse ti gue na abungbi.

 Na septembre 2018, lo wara batême lo ga Témoin ti Jéhovah. Fadeso lo yeke sara kua na alege kue so azi ti fa tënë na azo so alondo na kodro ti Érythrée nga na ti Soudan si aga na Norvège. Lo yeke encouragé ala ti manda Bible nga ti duti na kpengba mabe.